ອາຊຽນ ຕ້ອງເຂົ້າ ສືບສວນ ກ່ຽວກັບ ການລັກພາໂຕ ທ່ານ ສົມບັດ ສົມພອນ.
ຫ້ອງການ ເອເຊັຽ ດ້ານ ສິດທິມະນຸດ ແລະ ການພັທນາ ເປັນອົງການ ປົກປ້ອງ ສິດທິມະນຸດ ໃນຂົງເຂດ ແລະ ເປັນຕົວແທນ ຂອງອົງການ ທີ່ບໍ່ຂື້ນກັບ ຣັຖບານ ຈາກ 16 ປະເທດ ໃນເອເຊັຽ ໄດ້ສົ່ງຫນັງສື ເປີດຊອງ ໄປຫາ ທ່ານ ອາມັດ ບິນ ຈູມາ ຫົວຫນ້າ ຄະນະ ກັມມະທິການ ດ້ານ ສິດທິມະນຸດ ຣະຫວ່າງ ຣັຖບານ ອາຊຽນ ໃຫ້ສືບສວນ ກ່ຽວກັບ ການລັກພາໂຕ ຂອງ ທ່ານ ສົມບັດ ສົມພອນ.
ໃນຈົດຫມາຍ ດັ່ງກ່າວ ໄດ້ສະແດງ ຄວາມເປັນຫ່ວງນໍາ ການຫາຍສາບສູນ ຂອງ ທ່ານ ສົມບັດ ສົມພອນ ນັກປັນຍາຊົນ ນັກພັທນາ ຄົນສຳຄັນ ໃນລາວ ຜູ້ທີ່ໄດ້ ຫາຍສາບສູນໄປ ແຕ່ວັນທີ 15 ທັນວາ 2012 ແລະ ເທົ່າເຖິງ ປັດຈຸບັນ ຍັງບໍ່ມີ ຮ່ອງຮອຍ ກ່ຽວກັບ ຄວາມປອດພັຍ ແລະ ການລັກພາໂຕໄປ. ພັລຍາຂອງ ທ່ານ ສົມບັດ ນາງ ຊູມິງ ບອກວ່າ ເຫັນສາມີ ເທື່ອສຸດທ້າຍ ແມ່ນເວລາ 6 ໂມງແລງ ຂອງວັນນັ້ນ ຫລັງຈາກໄດ້ ແຍກທາງກັນ ກັບບ້ານ ຕອນເລີກງານ.
ອົງການ ດ່ັງກ່າວ ເວົ້າວ່າ ມີຂໍ້ສົງສັຍ ຫລາຍຢ່າງ ໃນການຫາຍໂຕໄປ ຂອງ ທ່່ານ ສົມບັດ ຕົວຢ່າງ: ເປັນຫຍັງ ເຈົ້າຫນ້າທີ່ ຈຶ່ງອະນຸຍາດໃຫ້ ທ່ານ ສົມບົດ ອອກໄປກັບຄົນ ທີ່ຂີ່ ຣົຖກະບະ ສີຂາວ ໃນຄືນນັ້ນ ແລະ ເປັນຫຍັງ ເຈົ້າຫນ້າທີ່ ຕຳຣວດ ຈຶ່ງບໍ່ດຳເນີນ ພຶດຕິກັມ ຢ່າງຮີບດ່ວນ ໃນການສືບສວນ ກ່ຽວກັບ ການລັກພາໂຕ ທັ້ງໆ ທີ່ຖແລງການ ຂອງ ທາງການ ໄດ້ຣະບຸໄວ້ ໃນເຄືອຂ່າຍ ອິນເຕີແນັດ ຂອງທາງການ ໃນວັນທີ 19 ທັນວາ 2012.
ຫ້ອງການ ເອເຊັຽ ໄດ້ຮຽກຮ້ອງໃຫ້ ຄະນະ ກັມມະທິການ ດ້ານ ສິດທິມະນຸດ ຣະຫວ່າງ ຣັຖບານ ອາຊຽນ ທີ່ຮັບຜິດຊອບ ແລະ ສົ່ງເສີມ ປົກປ້ອງ ສິດທິມະນຸດ ໃນອາຊຽນ ເລັ່ງລັດ ໃນການໂອ້ລົມ ກັບເຈົ້າຫນ້າທີ່ ລາວ ໃຫ້ທຳການ ສືບສວນ ຢ່າງຮີບດ່ວນ ເພື່ອຄ້ຳປະກັນ ຄວາມປອດພັຍ ໃນການກັບບ້ານ ໄປຫາຄອບຄົວ ແລະ ຍາຕຕິພີ່ນ້ອງ ຂອງ ທ່ານ ສົມບັດ.
