ປະຊາຊົນ ລາວ ເວົ້າວ່າ ມີບາງ ອົງການ ຂອງ ຣັຖບານ ມີສ່ວນພົວພັນ ກັບການ ຟອກເງິນຕຣາ ໃນລາວ.
ຊາວລາວ ຜູ້ນຶ່ງ ໄດ້ເປີດເຜີຍ ກ່ຽວກັບ ທຸຣະກິດ ການຟອກເງິນຕຣາ ຢູ່ລາວ ວ່າບາງອົງການ ຂອງຣັຖບານ ມີສ່ວນກ່ຽວຂ້ອງ ໃນການກະທຳ ດັ່ງກ່າວ ເນື່ອງຈາກວ່າ ເຈົ້າຂອງເງິນ ເຖື່ອນ ສ່ວນໃຫຍ່ ຈະເປັນຜູ້ທີ່ ມີອຳນາດ ໃນລາວ ຫລືກຸ່ມ ນັກທຸຣະກິດ ຜູ້ທີ່ມີ ເສັ້ນສາຍ ກັບທາງການ ຂອງລາວ ຊຶ່ງ ປະຊາຊົນລາວ ເຫັນວ່າ ການກະທຳນັ້ນ ເປັນປະກົດການ ຫຍໍ້ທໍ້ ໃນສັງຄົມລາວ ລາຍໃຫຍ່. ແຕ່ບໍ່ມີຜູ້ໃດ ກ້າເວົ້າ ຫຼືອອກປາກ ທັກທ້ວງໄດ້. ຄົນລາວຜູ້ນັ້ນ ເວົ້າວ່າ:
"ມີຫລາຍ ອົງການ ຣັຖບານ ມີສ່ວນກ່ຽວຂ້ອງ ໃນຣະບົບ ຕົວນີ້ ສ່ວນຫລາຍ ບັນດາ ນາຍພົລ ຕາມຊາຍແດນ ແຕ່ວ່າເຮົາ ກໍບໍ່ສາມາດ ເວົ້າໄດ້ ໃນຊ່ວງນີ້ ຄືຢາເສພຕິດ ກັບໄມ້ຂະຍຸງ".
ນາງເວົ້າ ຕໍ່ໄປວ່າ ໃນເມືອງລາວ ໃນທຸກມື້ນີ້ ຣັຖບານ ໄດ້ອະນຸຍາດ ໃຫ້ເປີດ ບ່ອນຫລີ້ນ ການພະນັນ ຊຶ່ງເປັນວິທີນຶ່ງ ທີ່ກຸ່ມພວກ ເຮັດການຄ້າ ໄດ້ເງິນມາແບບ ບໍ່ຖືກຕ້ອງ ແລ້ວກໍໃຊ້ ບ່ອນຫລີ້ນ ການພະນັນ ເປັນບ່ອນຟອກເງິນ ເພື່ອ ໃຫ້ເງິນທີ່ໄດ້ ມາຈາກ ການຄ້າ ຂອງເຖື່ອນຕ່າງໆ ກາຍເປັນເງິນ ສະອາດ ຖືກຕ້ອງຕາມ ກົດໝາຍ ຝາກໃນ ທະນາຄານ ໄດ້. ຄົນລາວອີກຜູ້ນຶ່ງ ເວົ້າກ່ຽວກັບ ການຟອກເງິນຕຣາ ໃນລາວ ວ່າ ເປັນຂອງ ຜູ້ມີອຳນາດ ເຖິງຈະຮູ້ ກໍເວົ້າບໍ່ໄດ້. ເລົາເວົ້າວ່າ:
"ຟອກເງິນມັນ ກໍເວົ້າຍາກ ເພາະວ່າເຮົາ ບໍ່ໄດ້ ເຮັດວຽກນຳ ຂັ້ນໃຫຍ່ ປານນັ້ນ ມັນກໍຍາກ ຂ້ອຍກໍບໍ່ເຂົ້າໃຈ ວຽກຟອກເງິນ ຂ້ອຍກໍເຮັດ ຫັຖກັມ ມັນກໍບໍ່ຄອ່ຍ ຮູ້ເຣື້ອງປານໃດ ຮູ້ກໍເວົ້າບໍ່ໄດ້ ຢູ່ລາວ ມັນກໍເວົ້າຍາກ".
ຕາມບົດຣາຍງານ ຂອງ ອົງການ UNODC ແຫລ່ງທີ່ມາ ຂອງເງິິນ ເຖື່ອນ ສົກກະປົກ ຫລາຍທີ່ສຸດ ໃນລາວ ແມ່ນການ ຄ້າຢາເສພຕິດ ແລະ ສາມາດ ເຮັດໃຫ້ເປັນເງິນ ສະອາດ ແລະ ຖືກຕ້ອງໄດ້ ຈາກບ່ອນຫລີ້ນ ການພະນັນ ໃນລາວ ຍ້ອນການໃຊ້ ອໍານາດ ໄປໃນທາງທີ່ຜິດ.
