ທາງການລາວບໍ່ຈິງຈັງ ເຣື້ອງທ່ານສົມບັດ

ຊາວລາວ ບາງກຸ່ມ ໃນ ນະຄອນຫຼວງ ວຽງຈັນ ເຫັນວ່າ ທາງການລາວ ບໍ່ຈິງຈັງ ຫລື ອາຈເມີນເສີຍ ໃນການ ສືບສວນ ສອບສວນ ເຣື່ອງ ການລັກພາຕົວ ທ່ານ ສົມບັດ ສົມພອນ.

ຜ່ານມາເກືອບ 1 ເດືອນແລ້ວ ທີ່ ທ່ານສົມບັດ ສົມພອນ ຖືກລັກພາຕົວ ແຕ່ປາກົດວ່າ ການສືບສວນ ສອບສວນ ບໍ່ມີຄວາມ ຄືບໜ້າເລີຍ ມີພຽງແຕ່ ຖແລງການ ຂອງ ກະຊວງການ ຕ່າງປະເທດ ແລະ ຂອງ ທ່ານທູດ ສປປລາວ ປະຈໍາ ອົງການ ສະຫະປະຊາຊາດ ເພື່ອ ສິດທິມະນຸດ ຊຶ່ງຖແລງວ່າ ຣັຖບານລາວ ບໍ່ໄດ້ມີສ່ວນ ກ່ຽວຂ້ອງໃດໆ ທັງໝົດ ແລະ ຍັງງເວົ້າວ່າ ອາດເປັນຍ້ອນ ເຣື່ອງ ສ່ວນຕົວ ຂອງ ຜູ້ກ່ຽວເອງ.

ເຖິງຢ່າງໃດ ກໍຕາມ ບໍ່ວ່າຈະເປັນ ເຣື່ອງ ສ່ວນຕົວ ຫລື ເຣື່ອງອັນໃດ ທາງການລາວ ກໍຄວນ ມີຄວາມ ຮັບຜິດຊອບ ແລະ ສືບສວນ ສອບສວນ ຢ່າງເຕັມທີ່ ເພາະ ທ່ານ ສົມບັດ ສົມພອນ ເປັນພົລເມືອງ ລາວ ແລະ ເປັນບຸກຄົນ ທີ່ ມີຜົນງານ ເປັນທີ່ນັບໜ້າ ຖືຕາ ຂອງປະຊາຊົນ ລາວ ໂດຍທົ່ວໄປ ໃນຖານະທີ່ ທ່ານເປັນ ນັກພັທນາ ຜູ້ດີເດັ່ນ ຂອງປະເທດ. ຕາມຄໍາເວົ້າ ຂອງ ຊາວນະຄອນ ຫລວງວຽງຈັນ ທ່ານນຶ່ງ ທີ່ບໍ່ປະສົງ ອອກຊື່:

"ຄັນເພິ່ນ ຊິຊອກຫາ ເປັນຫຍັງ ຊິຊອກບໍ່ໄດ້ ທາງການ ເພິ່ນເຮັດໄດ້ ທຸກຢ່າງຢູ່ແລ້ວ ທາງການ ມີພາຫານະ ຕີນມືຢູ່ແລ້ວ".

ທ່ານກ່າວ ຕໍ່ໄປວ່າ ປົກກະຕິແລ້ວ ປ້ອມຍາມ ແຕ່ລະຈຸດ ຕ້ອງມີ ຕໍາຣວດ ຢ່າງໜ້ອຍ 4 ຄົນ ປະຈໍາຢູ່ ຖ້າຫາກວ່າ ທາງການ ຢາກນໍາຫາ ທ່ານ ສົມບັດ ສົມພອນ ແທ້ໆນັ້ນ ກໍສາມາດ ຮຽກຕໍາຣວດ ທັງ 4 ຄົນ ນັ້ນມາ ສອບຖາມໄດ້ ເພາະເປັນຜູ້ເຫັນ ເຫດການ ທຸກຢ່າງ ຕັ້ງແຕ່ຕົ້ນຈົນຈົບ ອີກຢ່າງນຶ່ງ ຫລັກຖານ ຈາກ ກ້ອງວົງຈອນປິດ ກໍບັນທຶກພາບ ໄວ້ຢູ່ແລ້ວ.

ທ່ານກ່າວ ສລຸບວ່າ ເມື່ອທຸກຢ່າງ ຍັງເປັນ ຄືແນວນີ້ ມັນຍິ່ງເປັນການ ຕອກຢໍ້າ ໃຫ້ຊາວລາວ ແລະ ຊາວໂລກເຫັນວ່າ ການລັກພາຕົວ ທ່ານ ສົມບັດ ສົມພອນ ເປັນສິ່ງທີ່ ກົງກັນຂ້າມ ກັບ ຖແລງການ 2 ສະບັບ ຂອງ ທາງການລາວ ແລະ ກໍບົ່ງບອກ ເຖິງຄວາມ ໃຈດໍາ ອັມມະຫິດ ຂອງ ຜູ້ລັກພາຕົວ ທ່ານສົມບັດ ສົມພອນ.