ສປປລາວ ຂຶ້ນຂີ່ຫລັງເສືອ

ການຫາຍສາປສູນ ຂອງ ທ່ານສົມບັດ ສົມພອນ ທີ່ເປັນຂ່າວ ໂດ່ງດັ່ງ ມາຫລາຍ ອາທິດແລ້ວ ອາດມີຜູ້ຄຶດວ່າ ຈະຄ່ອຍມິດໄປ ເຊັ່ນດຽວກັບ ເຫດການ ອື່ນໆ ທີ່ ທາງການລາວ ບໍ່ຢາກໃຫ້ ໃຜຮູ້ ຫລື ເວົາເຖິງນັ້ນ ກັບກາຍເປັນວ່າ ຍິ່ງນັບມື ຂຍາຍວົງກ້ວາງ ອອກໄປ. ດັ່ງ ວຽງໄຊ ມີຣາຍງານ ມາສເນີທ່ານ.

ເດືອນນຶ່ງແລ້ວ ທີ່ ທ່ານສົມບັດ ສົມພອນ ຜູ້ສ້ຽວຊານ ດ້ານການປູກຝັງ ແລະ ການພັທນາຊຸມຊົນ ຂອງລາວ ເຈົ້າຂອງຣາງວັນ Magsaysay ປີ 2005 ໄດ້ຫາຍສາປສູນໄປ ຢ່າງບໍ່ມີຮ່ອງຮອຍ ໃນແລງວັນເສົາ ທີ່ 15 ທັນວາ 2012 ຫລັງຈາກ ທີ່ຕຳຣວດ ຈະຣາຈອນ ໄດ້ອັດຣົຖ ຂອງທ່ານ ເພື່ອກວດເອກສານ.

ສຳເນົາ ພາບບັນທຶກ ຈາກ ກ້ອງວົງຈອນປິດ ທີ່ຄອບຄົວ ແລະ ເພື່ອນຮ່ວມງານ ຂອງ ທ່ານ ສົມພອນ ໄດ້ເອົາລົງ ໃນສື່ສັງຄົມ Youtube ສະແດງ ໃຫ້ເຫັນວ່າ ທ່ານສົມບັດ ລົງຈາກຣົຖ ຍ່າງເຂົ້າໄປປ້ອມ ຕຳຣວດ ຕໍ່ມາ ລະຍະນຶ່ງ ກໍມີຊາຍຜູ້ນຶ່ງ ຂີ່ຣົຖຈັກ ມາຈອດຢູ່ໜ້າຣົຖ ຂອງ ທ່ານສົມບັດ ແລ້ວຂັບຣົຖ ຂອງ ທ່ານສົມພອນ ອອກໄປ ໂດຍປະຣົຖຈັກ ຂອງຕົນ ຈອດຖິ້ມໄວ້ ບ່ອນເກົ່າ.

ຕໍ່ມາອີກບໍ່ດົນ ກໍມີຊາຍຜູ້ນຶ່ງ ອອກມາຢືນຢູ່ ບ່ອນທີ່ຣົຖ ທ່ານສົມບັດ ເຄີຍຈອດໄວ້ ຄືກັບວ່າ ລໍຖ້າຜູ້ໃດ ຜູ້ນຶ່ງ ແລະ ອີກບໍ່ດົນ ກໍມີຣົຖກະບະ ສີອ່ອນ ຫລືສີຂາວ ທີ່ເປີດໄຟ ສຸກເສີນ ແລ່ນເຂົ້າມາຈອດ ຕໍ່ມາມີຊາຍ 2-3 ຄົນອອກມາ ຊຶ່ງສັນນິຖານ ວ່າແມ່ນ ທ່ານສົມພອນ ຜູ້ນຶ່ງ ທີ່ຟ້າວຂຶ້ນ ຣົຖກະບະ ຄັນດັ່ງກ່າວ ແລ້ວຟ້າວເລັ່ງ ອອກໄປ ທັ້ງໆທີ່ ປະຕູຣົຖ ກໍຍັງອັດ ບໍ່ທັນແຈບເທື່ອ.

ເມື່ອ ພັລຍາຊາວ Singapore ຂອງ ທ່ານສົມພອນ ນາງ Ng Shui Meng ບໍ່ເຫັນສາມີ ມາກິນເຂົ້າແລງ ດັ່ງທີ່ນັດໝາຍກັນໄວ້ ເລີຍເກີດເປັນຫ່ວງ ຈຶ່ງອອກຊອກຖາມຫາ ຕາມໂຮງໝໍ ທົ່ວວຽງຈັນ ເພາະຢ້ານວ່າ ບາງທີ່ທ່ານອາດ ຈະປະສົບ ອຸບັດຕິເຫດ ກໍເປັນໄດ້ ແຕ່ປະກົດວ່າ ບໍມີໃຜຮູ້ ເຫັນຫຍັງເລີຍ. ເຈົ້າໜ້າທີ່ຕຳຣວດ ຝ່າຍສືບສວນ ຂອງ ນະຄອນວຽງຈັນ ກ່າວຕໍ່ ເອເຊັຍເສຣີ ວ່າໄດ້ຣັບແຈ້ງ ການຫາຍຕົວ ຂອງ ທ່ານສົມບັດ ຈາກທາງຄອບຄົວ ໃນມື້ວັນຈັນຕໍ່ມາ ແລະ ໄດ້ເລີ້ມ ສືບສວນແລ້ວ.

ເນື່ອງຈາກວ່າ ວຽກການ ຂອງ ທ່ານສົມບັດ ເຮັດໃຫ້ທ່ານ ເປັນທີ່ຮູ້ຈັກ ຢ່າງກວ້າງຂວາງ ໃນວົງການ ທີ່ກ່ຽວຂ້ອງ ກັບການພັທນາ ໃນຣະດັບ ຂົງເຂດ ແລະ ຣະດັບສາກົນ ຈຶ່ງມີຜູ້ໃຫ້ ຄວາມສົນໃຈ ກ່ຽວກັບ ການຫາຍສາປສູນ ແບບບໍ່ມີ ຮ່ອງຮອຍ ຂອງທ່ານ ແລະ ຕິດຕາມ ຟັງຂ່າວຄືບໜ້າ ຢ່າງໃກ້ຊິດ ພ້ອມທັງອອກມາ ຮຽກຮ້ອງ ໃຫ້ຣັຖບານລາວ ເລັ່ງສືບສວນ ແລະ ຊອກຫາ ທ່ານສົມບັດ ສົມພອນ ໄວທີ່ສຸດ ເທົ່າທີ່ຈະໄວໄດ້ ເພາະຕັ້ງແຕ່ ທ່ານສົມບັດ ຫາຍຕົວໄປ ນຶ່ງເດືອນແລ້ວ ທາງການລາວ ໄດ້ອອກຖແລງການ ພຽງສັ້ນໆ 2-3 ສະບັບ ແບບບໍ່ໃຫ້ ຣາຍລະອຽດ ພຽງແຕ່ບອກວ່າ ທ່ານສົມບັດ ອາດມີເຣື້ອງ ຂັດແຍ້ງ ທາງສ່ວນຕົວ ຫລື ທາງທຸຣະກິດ ຊຶ່ງທາງຄອບຄົວ ແລະ ຜູ້ທີ່ຮູ້ຈັກ ທ່ານດີ ບໍ່ຄຶດວ່າ ເປັນເຫດຜົນ ທີ່ແທ້ຈິງ.

Madame Karen B. Stewart ເອກອັຄຣາຊທູຕ ສະຫະຣັຖ ປະຈຳລາວ ກ່າວເວລາ ໃຫ້ສຳພາດວ່າ ເອົາແທ້ໆ ບໍ່ມີໃຜ ໄດ້ຍິນຫຍັງອີກ ນອກຈາກ ຖແລງການສັ້ນໆ ຂອງທາງການລາວ ທີ່ບໍ່ໄດ້ໃຫ້ ຄວາມກະຈ່າງແຈ້ງ ແຕ່ຢ່າງໃດ ບໍ່ມີຣາຍງານ ຄົບຖ້ວນ ວ່າການສືບສວນ ໄປຮອດໃສແລ້ວ ຫລືວ່າມີເຫດການ ຫຍັງແດ່ ໃນປັຈຸບັນ. ການສອບຖາມໃດໆ ກ່ຽວກັບເຣື້ອງນີ້ ຈະໄດ້ຮັບ ຄຳຕອບວ່າ ໃຫ້ຕິດຕາມເບິ່ງ ໃນສື່ທາງການລາວ ເທົ່ານັ້ນ ຊຶ່ງກໍເທົ່າກັບວ່າ ບໍມີການ ຖແລງຂ່າວ ຄືບໜ້າໃດໆ.

ການທີ່ມີພາບ ບັນທຶກ ຈາກກ້ອງ ວົງຈອນປິດ ທີ່ ທາງການລາວ ໄດ້ຕິດຕັ້ງໄວ້ ເມື່ອສອງສາມ ປີກ່ອນ ເພື່ອຕິດຕາມ ກວດກາ ການເຄື່ອນໄຫວ ຂອງຄົນບໍ່ດີ (ຕາມຄວາມເວົ້າ ຂອງ ທາງການລາວ) ສະແດງ ໃຫ້ເຫັນວ່າ ທ່ານສົມບັດ ຫາຍສາປສູນໄປ ໃນເວລາ ທີ່ຢູ່ກັບ ເຈົ້າໜ້າທີ່ ຕຳຣວດນັ້ນ ຄົງປະຕິເສດ ໄດ້ຍາກ ວ່າຕຳຣວດ ບໍ່ຮູ້ເຫັນນຳ ເຖິງວ່າຈະມີ ສ່ວນກ່ຽວຂ້ອງ ໂດຍກົງ ຫລືບໍ່ກໍຕາມ ແລະ ການທີ່ຕໍ່ມາ ທາງການລາວ ບໍ່ຍອມໃຫ້ ທາງຄອບຄົວ ຢືມພາບ ທີ່ອັດຈາກກ້ອງ ວົງຈອນປິດ ເພື່ອນຳໄປໃຫ້ ຜູ້ສ້ຽວຊານ ວິຈັຍນັ້ນ ຍິ່ງເຮັດໃຫ້ ມີການລະແວງ ສົງໄສວ່າ ທາງການລາວ ພຍາຍາມ ປິດບັງ ຄວາມຈິງ ແລະ ຢາກໃຫ້ເຣື້ອງ ແກ່ຍາວອອກໄປດົນ ເທົ່າທີ່ຈະດົນໄດ້ ໂດຍຫວັງວ່າ ມັນຈະຄ່ອຍ ມິດໄປເອງ ດັ່ງຫລາຍໆເຫດການ ທີ່ສືບສວນ ບໍ່ເຂົ້າບໍ່ອອກ ຜ່ານມາ.

ປະກົດການ ທີ່ໜ້າສັງເກດຍິ່ງ ກໍຄື ຄົນລາວ ໃນປະເທດ ທີ່ບໍ່ກ້າອອກສຽງ ວິພາກວິຈານ ພັກຣັຖ ຢູ່ແລ້ວ ພາກັນອອກ ຄວາມເຫັນ ໃນສື່ສັງຄົມ ຫລື internet ຢ່າງຫລວງຫລາຍ ທີ່ພໍສລຸບໄດ້ວ່າ ທ່ານສົມບັດ ໄດ້ສະແດງ ທ່າທີ່ ຂັດແຍ້ງ ກັບພັກຣັຖ ຊຶ່ງເປັນສິ່ງທີ່ ບັນດາຜູ້ນຳຂັ້ນສູງ ຂອງ ສປປລາວ ຮັບບໍ່ໄດ້ ຈຶ່ງໄດ້ເຮັດໃຫ້ ທ່ານສົມພອນ ຫາຍສາບສູນໄປ ນອກນັ້ນ ຍັງເຊື່ອກັນວ່າ ເປັນໄປບໍ່ໄດ້ ທີ່ທາງການລາວ ຈະບໍ່ຮູ້ ວ່າແມ່ນໃຜ ເອົາຕົວທ່ານສົມບັດ ໄປ. ໃນຣະບອບ ຜເດັດການ ໃນສປປລາວ ປັດຈຸບັນ ແມ່ນແຕ່ ໄກ່ເສັຍຕົວນຶ່ງ ກໍຍັງສືບ ແລະ ຈັບຜູ້ຮ້າຍໄດ້ ພາຍໃນມື້ສອງມື້ ອັນນີ້ ແມ່ນຄົນຜູ້ນຶ່ງ ຣົຖຄັນນຶ່ງ ຫາຍໄປ ແຕ່ສືບບໍ່ໄດ້ ວ່າໄຜ ເອົາໄປໃສນັ້ນ ເປັນໄປບໍ່ໄດ້ ນອກຈາກວ່າ ເຮັດແບບ ໝີກິນເຜິ້ງ ເທົ່ານັ້ນ.

ຖ້າທາງການລາວ ຄຶດວ່າ ເຣື້ອງ ການຫາຍສາປສູນ ຂອງ ທ່ານສົມບັດ ສົມພອນ ຈະຄ່ອຍມິດໄປນັ້ນ ຄົງຈະເປັນການ ຄາດຄະເນຜິດ ຢ່າງໃຫຍ່ຫລວງ ເພາະ ຍິ່ງດົນໄປເທົ່າໃດ ຄວາມເປັນຫ່ວງນຳ ຊະຕາກັມ ຂອງທ່ານ ຍິ່ງມີ ຫລາຍຂຶ້ນ ແລະ ອົງການ ຈັດຕັ້ງສາກົນ ຕ່າງໆ ກໍບໍ່ໄດ້ປ່ອຍ ໃຫ້ລືມໄດ້ ໂດຍສະເພາະ ອົງການ ຈັດຕັ້ງຕ່າງໆ ໃນປະເທດໄທ ທີ່ລຶ້ງເຄີຍ ກັບທ່ານສົມບັດ ເປັນຢ່າງດີ ເນື່ອງຈາກ ເຄີຍຮ່ວມງານ ຢ່າງໃກ້ຊິດ ກັບທ່ານມາເປັນ ເວລາ ດົນນານ ເຊັ່ນດຽວກັນກັບ ນັກວິເຄາະ ແລະ ໜັງສືພິມ ທີ່ມີສື່ສຽງ ຂອງ ສະຫະຣັຖ ເຊັ່ນ New York Times ແລະ Asia Wall Street Journal ເປັນຕົ້ນ.

ບົດຂຽນສ່ວນຫລາຍ ຈະຮັບຮູ້ວ່າ ປີ 2012 ເປັນປີທີ່ ສປປລາວ ໄດ້ປະສົບ ຜົນສຳເຮັດໃນ ຫລາຍດ້ານ ດັ່ງຈະເຫັນໄດ້ ຈາກການເປັນເຈົ້າພາບ ກອງປະຊຸມ ສຸດຍອດ ASEM ໃນເດືອນ ພຶສຈິກາ 2012 ຊຶ່ງມີສ່ວນເຮັດໃຫ້ ສປປລາວ ຖືກສິ້ງຊອມ ຫລາຍຂຶ້ນ. ແຕ່ເກົ່າມາຫລັງ ຍ້ອນວ່າ ທາງການລາວ ຄວບຄຸມສື່ມວນຊົນ ຢ່າງເຂັ້ມງວດ ແລະ ໃຊ້ເປັນອາວຸດ ໃນການ ໂຄສນາຊວນເຊື່ອ ການປາປປາມ ຜູ້ທີ່ບໍ່ເຫັນພ້ອມ ຫລື ຜູ້ທີ່ມີພຶດຕິກັມ ທີ່ຂັດກັບ ແນວທາງ ຂອງພັກຣັຖ ຈຶ່ງບໍ່ຄ່ອຍມີການ ກ່າວເຖິງ. ນັກວິເຄາະ ການເມືອງຫລາຍຄົນ ເຊື່ືອວ່າ ການລັກພາຕົວ ບຸກຄົນທີ່ສຳຄັນ ຢ່າງທ່ານສົມບັດ ໄປນັ້ນ ເປັນການເຕືອນ ອົງການຈັດຕັ້ງ ເອກຊົນອື່ນໆ ບໍ່ໃຫ້ແຕະຕ້ອງ ພັກຣັຖ ເປັນອັນຂາດ.

ທ່ານ Thomas Fuller ແຫ່ງ ໜັງສືພິມ New York Times ຂອງ ສະຫະຣັຖ ເວົ້າວ່າ ໃນລະຍະຫລາຍປີ ຜ່ານມານີ້ ສປປລາວ ຄ່ອຍປັບປຸງ ຣະບົບພັກໂທນ ໃຫ້ທັນສະໄໝຂຶ້ນ ແຕ່ຫາກຍັງ ປາປປາມ ຜູ້ທີ່ຄັດຄ້ານ ຕົນຢູ່ຕໍ່ໄປ ແລະ ຝ່າຍປ້ອງກັນ ຄວາມສງົບ ກໍເຄີຍມີສ່ວນ ກ່ຽວຂ້ອງ ກັບການສັງຫານ ພວກອົພຍົບລາວ ທີ່ຕໍ່ຕ້ານ ສປປລາວ ຢູ່ປະທດໄທ ມາແລ້ວ.

ໃນຂະນະທີ່ ສປປລາວ ເປີດປະເທດ ແລະ ຫັນໄປຫາຣະບົບ ນາຍທຶນຫລາຍຂຶ້ນ ຄວາມເຄັ່ງຕຶງ ກໍເພີ້ມຂຶ້ນເຊັ່ນກັນ ຣະຫວ່າງຜູ້ນຳ ຮຸ່ນເກົ່າ ແລະ ຜູ້ນຳຮຸ່ນໃໝ່ ຣະຫວ່າງຣັຖບານ ທີ່ຢາກໃຫ້ ມີຄວາມໂປ່ງໄສ ຫລາຍຂຶ້ນ ແລະ ຜູ້ທີ່ນິຍົມ ຣະບົບທີ່ປິດລັບ ຜູ້ທີ່ຕໍ່ສູ້ກັບ ຣັຖບານ ທີ່ມີສາຫະຣັຖ ໜູນຫລັງ ໃນຊຸມປີ 1960 ແລະ 1970.

ເຖິງວ່າຈະແມ່ນ ຜູ້ໃດ ເອົາຕົວ ທ່ານສົມບັດ ສົມພອນ ໄປກໍ່ຕາມ ແຕ່ເພື່ອເປັນການສະແດງ ໃຫ້ໂລກເຫັນວ່າ ສປປລາວ ເປັນປະເທດ ທີ່ມີຄື່ມີແປ ແລະ ຮັບຜິດຊອບ ເຫດການ ທີ່ເກີດຂຶ້ນ ໃນປະເທດ ພາຍໃຕ້ ການຮູ້ເຫັນ ຂອງ ເຈົ້າໜ້າທີ່ ຕຳຣວດ ທາງການລາວ ຄວນອອກມາເປີດເຜີຍ ໃຫ້ຮູ້ ເປັນລະຍະ ກ່ຽວກັບ ຜົນການສືບສວນ ທີ່ວ່າກຳລັງ ດຳເດີນຢູ່ ເພື່ອເປັນທັງຂວັນ ກຳລັງໃຈ ແກ່ຄອບຄົວ ແລະ ເພື່ອນຮ່ວມງານ ທັງຫລາຍ ຂອງ ທ່ານສົມບັດ.

ຖານະຂອງ ພັກຣັຖລາວ ໃນປັດຈຸບັນ ບໍ່ຕ່າງຫຍັງກັບ ຂີ່ຢູ່ເທິງຫລັງເສືອ. ພັກຣັຖ ຈະເປັນຜູ້ຕັດສີນວ່າ ຈະເລືອກທາງລົງ ໄດ້ຢ່າງສງ່າງາມ ແລະ ປອດພັຍ ຫລືວ່າຈະເຣັດ ຫູໜວກກິນຟານ ຊຶ່ງອາດຈະເຮັດໃຫ້ ຕົກໄປຢູ່ໃນ ທ້ອງເສືອ ກໍເປັນໄດ້.

ເລື້້ອງ  ດຣ. ສົມບັດ ສາເຫດອາດຈະເປັນເພາະຣັຖະບານ  ສປປລາວ ບໍ່ມັກຄົນທີ່ກະທຳດີມີຄຸນນະທັມຕໍ່ປະຊາຊົນລະດັບ

ຮາກຫ້ຍາປຸກຈິດສຳນືກເພິ່ງຕົນເອງກູ້ມຕົນເອງ ນີ້ແມ່ນນັກພັດທະນາທີ່ພັກລັດເຫັນວ່າບໍ່ສອດຄອ່ງຕໍ່ກັບແນວທາງອັບປະວິໂຍກ

ຕີຫຼົບຖົບໄດ້ມີສັນດານໂຈນຜູ້ນຳແບບເພີ່ນຈິ່ງເໝາະສົມຢູ່ກັບສັງຄົມຄອມມຸນິດນີ້ໄດ້, ສະນັ້ນພວກເພີ່ນຈື່ງທຳການສັ່ງໜ່ວຍສະເພາະກິດ

ລັກຕົວໄປແບບບໍ່ຮູ້ຮ່ອງຮອຍ ລອງເບີ່ງຈະຂີ່ຫຼັງເສືອໄປໄດ້ໄກຂະໜາດໃດ? ຢ່າເຊື່ອໝັ້ນຕົວເອງຫຼາຍເກີນໄປ ຫາກພາດຈະບໍ່ມີຫັຍງເຫຼືອອີກ.