ມີການເກີດຄວາມ ບໍ່ເຊື່ອຫມັ້ນ ໃນພາບພົດ ຂອງ ຄນະກັມມະທິການ ແມ່ນໍ້າຂອງ ໃນໂຄງການ ສ້າງເຂື່ອນ ໃນລາວ.
ຄນະກັມມະທິການ ແມ່ນ້ຳຂອງ ໃນບັນດາ 4 ປະເທດ ທີ່ມີຫນ້າທີ່ ປະສານງານ ໃນການປົກປ້ອງ ແມ່ນ້ຳຂອງ ມີບັນຫາ ໃນຄວາມເຊື່ອຫມັ້ນ ຫລັງຈາກ ຣັຖບານລາວ ບໍ່ປະຕິບັດ ຕາມສັນຍາ ກົດເກນ ໃນໂຄງການສ້າງ ເຂື່ອນ ໄຊຍະບູຣີ ໃສ່ແມ່ນໍ້າຂອງ ໃນລາວ.
ໃນກອງປະຊຸມ ຣະດັບ ຣັຖມົນຕຣີ ຂອງຄນະ ກັມມະທິການ ໃນອາທີດນີ້ ກຳພູຊາ ແລະ ວຽດນາມ ປະນາມ ສປປລາວ ທີ່ດໍາເນີນການ ສ້າງເຂື່ອນ ໄຊຍະບູຣີ ຊື່ງເປັນເຂື່ອນ ໃນ ແມ່ນ້ຳຂອງ ຕອນລຸ່ມ ທີ່ບໍ່ມີການ ເຫັນພ້ອມຈາກ ຄນະກັມມະທິການ ແມ່ນ້ຳຂອງ.
ນັກວິເຄາະ ຢ້ານຈະເກີດ ຜົລກະທົບ ຈາກ ເຂື່ອນດັ່ງກ່າວ ທີ່ຈະສົ່ງໄຟຟ້າ ໃຫ້ປະເທດໄທ ຊຶ່ງເປັນນຶ່ງ ໃນ ຄນະກັມມະທິການ ແມ່ນ້ຳຂອງ ແລະ ກໍມີຄຳຖາມ ຂື້ນມາວ່າ ຄນະກັມມະທິການ ມີໄວ້ເຮັດຫຍັງ ຖ້າບໍ່ສາມາດ ແກ້ໄຂບັນຫາ ຮ່ວມກັນໄດ້.
ຕົວແທນຈາກ ປະເທດ ກຳພູຊາ ກ່າວໃນກອງປະຊຸມ ທີ່ແຂວງ ຫລວງພຣະບາງ ວ່າ ປະເທດ ເຈົ້າພາບ ສປປລາວ ເຂົ້າໃຈຜິດ ໃນສົນທິສັນຍາ ແມ່ນ້ຳຂອງ ສະບັບປີ 1995 ທີ່ໄດ້ຮຽກຮ້ອງ ໃຫ້ຊຸມຊົນ ອົງການ ທີ່ບໍ່ຂື້ນກັບ ຣັຖບານ ແລະ ພາກສ່ວນ ທີ່ກ່ຽວຂ້ອງ ຕ້ອງໄດ້ຮັບ ການປືກສາ ແລະ ເຫັນພ້ອມກັນກ່ອນ ກ່ອນທີ່ຈະ ຕັດສີນໃຈສ້າງ. ແຕ່ນີ້ ສປປລາວ ຕັດສີນໃຈ ດ້ວຍໂຕເອງ ໃນການຢຸດການ ປຶຶກສາຫາລື ກັບ ຄນະ ກັມມະທິການ ແມ່ນ້ຳຂອງ ຫລັງຈາກ 6 ເດືອນ ທັ້ງໆ ທີ່ຍັງມີການ ຄັດຄ້ານ ຈາກ ຫລາຍປະເທດຢູ່ ແລະ ໃນປັດຈຸບັນ ເຂື່ອນ ດັ່ງກ່າວ ກໍສ້າງໂດຍ ບໍຣິສັດຂອງໄທ ແລະ ຜູ້ຮ່ວມຫຸ້ນແລ້ວ.
ຄນະ ກັມມະທິການ ແມ່ນ້ຳຂອງ ກໍເຮັດຫຍັງບໍ່ໄດ້ ມີແຕ່ຮຽກຮ້ອງ ໃຫ້ທົບທວນ ຄືນໃຫມ່ ແຕ່ທາງການລາວ ກໍບໍ່ສົນໃຈ ທີ່ຈະຮັບຟັງ.
