ຍານາງ ສຸນທະຣີ ຫັດຖີ ເຊັງກຶງ ເລຂາທິການ ຄະນະ ກັມມະການ ປະສານງານ ອົງການ ພັທນາ ເອກກະຊົນ ໃນໄທ ວ່າ ການຫາຍສາບສູນ ຂອງ ທ່ານ ສົມບັດ ອາຈເຮັດໃຫ້ ຫຼາຍພາກສ່ວນ ໃນລາວ ເສັຽຂວັນ ຫວາດຣະແວງ.
ຍານາງ ສຸນທະຣີ ຫັດຖີ ເຊັງກຶງ ເວົ້າວ່າ ການຫາຍໄປ ຂອງ ທ່ານ ສົມບັດ ນັກພັທນາ ຄົນສໍາຄັນ ຂອງລາວ ຄົງຈະເຮັດໃຫ້ ຫລາຍພາກສ່ວນ ໃນສັງຄົມລາວ ເສັຽຂວັນ ເພາະບໍ່ມີໃຜ ຄາດຄິດ ມາກ່ອນ ວ່າຈະເກີດເຣື່ອງ ແບບນີ້ຂື້ນໄດ້:
"ຍານາງ ວ່າ ທີ່ພວກທ່ານ ກັງວົນກໍຄື ຢ່າງໜ້ອຍ ພາກປະຊາຊົນ ພາກປະຊາ ສັງຄົມ ໃນລາວ ບໍ່ແມ່ນແຕ່ຄົນ ທີ່ມີແນວຄິດ ຕ່າງໄປຈາກຣັຖ ແມ່ນແຕ່ຄົນ ທີ່ຕັ້ງໃຈ ຈະເຮັດວຽກ ຊ່ວຍຣັຖ ກໍຄົງເສັຽຂວັນ ໄປຫລາຍ ໃນເຣື່ອງນີ້ ຍ້ອນວ່າ ເປັນເຫດການ ທີ່ເກີດຂຶ້ນ ແບບສົດໆ ແລະ ທ່ານສົມບັດ ກໍເປັນນັກພັທນາ ອາວຸໂສ ຂອງສັງຄົມ".
ໂດຍສະເພາະ ບັນດາ ນັກພັທນາ ໃນລາວ ຈະຮູ້ສຶກ ຢ້ານກົວ ໃນການ ດໍາເນີນວຽກງານ ຕໍ່ໄປ ເພາະຕ້ອງ ຣະວັງຕົວວ່າ ອາດຈະຖືກ ລັກພາຕົວໄປ. ໃນເມື່ອ ນັກພັທນາ ບໍ່ມີ ກໍາລັງໃຈ ຊຸມຊົນ ກໍຈະໄດ້ຮັບ ຜົນກະທົບ ໃນຂັ້ນຕໍ່ໄປ. ຍານາງ ສຸນທະຣີ ກ່າວຕື່ມວ່າ ຫລັງຈາກທີ່ ບັນດາ ຕົວແທນຈາກ 61 ອົງການຂອງໄທ ໄດ້ຍື່ນໜັງສື ຕໍ່ສະຖານທູດລາວ ໃນບາງກອກ ເມື່ອວັນທີ 25 ທັນວາ 2012 ນັ້ນ ຈົນຮອດ ປັດຈຸບັນ ກໍຍັງບໍ່ມີ ຄວາມຄືບໜ້າໃດໆ ກ່ຽວກັບ ທ່ານ ສົມບັດ ສົມພອນ ກໍຫວັງວ່າ ຣັຖບານລາວ ຄົງຈະຕິດຕາມ ສືບສວນ ແລະ ນໍາທ່ານ ສົມບັດ ສົມພອນ ກັບມາ ຢ່າງປອດພັຍ.
