ປະຊາຊົນ ລາວ ບໍ່ສາມາດ ຮູ້ໄດ້ວ່າ ໂຄງການ ພັທນາ ແບບຍືນຍົງ ຂອງ ຣັຖບານ ມີແທ້ຈິງ ຫລືບໍ່?
ຊາວນະຄອນ ຫລວງວຽງຈັນ ທ່ານນຶ່ງ ເວົ້າວ່າ ຖ້າຈະເວົ້າ ໂດຍທົ່ວໄປແລ້ວ ແມ່ນ ບໍ່ມີສິດຮູ້ ເພາະວ່າ ເປັນໂຄງການ ທີ່ທາງການ ໄປເຊັນສັນຍາ ກັບບໍຣິສັດ ເອກກະຊົນ ໂດຍທີ່ບໍ່ມີ ການແຈ້ງ ຣາຍລະອຽດ ຫຼືແຜນການ ໃຫ້ ປະຊາຊົນ ຮູ້ຢ່າງແຈ່ມແຈ້ງ:
"ແມ່ນແລ້ວ ຄັນສິເວົ້າ ເຣື່ອງເຂື່ອນ ຂະເຈົ້າ ເຮັດເພື່ອຕົວໃດ ເຮົາກໍບໍ່ຮູ້ແຈ້ງວ່າ ຜົນປະໂຫຍດ ຕົວຈິງ ມັນຈະໄປຫາ ພາກສ່ວນໃດ ບໍ່ວ່າຣາຍຮັບ ຣາຍຈ່າຍ ຫຍັງຕ່າງໆ ວ່າຊີ່ເຂົ້າ ພາກສ່ວນໃດ ເຮົາກໍບໍ່ຮູ້ ເຮົາກໍຈະເວົ້າ ບໍ່ໄດ້ວ່າ ເປັນການພັທນາ ແບບຍືນຍົງບໍ່ ຢູ່ລາວມັນຈະເປັນ ຣັຖວິສາຫະກິດ ແລະ ຮຸ້ນສ່ວນ ກັບເອກຊົນ ແຕ່ວ່າຕົວນີ້ ປະຊາຊົນເຮົາ ຈະບໍ່ມີ ສ່ວນຮ່ວມຫຍັງ".
ການພັທນາ ແບບຍືນຍົງ ໝາຍເຖິງ ການພັທນາ ເພື່ອຕອບສນອງ ຄວາມຕ້ອງການ ຂອງຄົນລຸ້ນ ປັດຈຸບັນ ແລະ ບໍ່ໃຫ້ມີ ຜົນກະທົບ ຕໍ່ຄົນລຸ້ນຕໍ່ໄປ ແຕ່ການພັທນາ ໃນປັດຈຸບັນ ສ່ວນຕົວແລ້ວ ບໍ່ເຂົ້າໃຈ ແລະ ບໍ່ຮູ້ວ່າ ໂຄງການ ແຕ່ລະຢ່າງ ທີ່ເກີດຂຶ້ນ ຢູ່ສປປ ລາວ ນັ້ນແມ່ນແບບໃດ ທາງຣັຖບານ ບໍ່ເຄີຍຊີ້ແຈງ ໃຫ້ ປະຊາຊົນ ຮັບຮູ້ເລີຍ.
ທ່ານກ່າວ ມ້ວນທ້າຍວ່າ ການພັທນາ ໂດຍທົ່ວໄປ ຄວນຈະເປັນ ການປັບປຸງ ສະພາບເສຖກິດ ແລະ ສັງຄົມ ໃຫ້ດີຂຶ້ນ ແຕ່ໃນທຸກມື້ນີ້ ບໍ່ມີຫຍັງ ດີຂຶ້ນ ຄົນທຸກ ກໍທຸກ ຢູ່ຄືເກົ່າ ການກະຈາຍ ຣາຍໄດ້ ທີ່ບໍ່ເທົ່າທຽມກັນ ໃນສັງຄົມ ກໍເປັນບັນຫາ ຢູ່ຕໍ່ໄປ
