ນັກປັນຍາຊົນ ລາວ ເວົ້າວ່າ ສະຖານທີ່ ໃຊ້ເປັນບ່ອນ ຜລິດຢາບ້າ ໃນລາວ ມີນາຍທະຫານ ຂັ້ນ ນາຍພົນ ຢູ່ເບຶ້ອງຫລັງ.
ນັກວິຊາການ ດ້ານຣັຖສາຕ ໃນລາວ ທ່ານນື່ງ ໄດ້ເວົ້າເຖີງ ແຫລ່ງຜລິດຢາບ້າ ໃນບໍຣິເວນ ຊາຍແດນ ຕິດກັບ ປະເທດ ເພື່ອນບ້ານ ນັ້ນມີທະຫານ ຕໍາແໜ່ງ ຂັ້ນນາຍພົນ ເປັນຜູ້ຄວບຄຸມ ແລະ ເຖີງແມ່ນວ່າ ແຫລ່ງຜລິດ ດັ່ງກ່າວ ຈະຖືວ່າເປັນ ຄວາມລັບ ແຕ່ປະຊາຊົນ ທົ່ວໄປ ກໍຮູ້ເຣື້ອງດີ ແຕ່ບໍ່ສາມາດ ເວົ້າຫຍັງໄດ້ ແລະ ກໍບໍ່ສາມາດ ເຂົ້າໄປໃກ້ ສະຖານທີ່ ນັ້ນໄດ້. ທ່ານເວົ້າວ່າ:
“ບັນດາ ນາຍພົນ ມັນມີ ໂຮງງານ ຜລິດຢາບ້າ ເອງ ແຖວບໍຣິເວນ ຊາຍແດນ ລາວ-ວຽດ ລາວ-ໄທ ທີ່ອັນຕຣາຍ ທີ່ສຸດ ກໍຄື ແຖວບໍ່ແກ້ວ ບໍຣິຄໍາໄຊ ຄໍາມ່ວນ ສວັນນະເຂດ ສ່ວນຫລາຍ ເປັນຂອງຄົນທີ່ ມີບົດບາດ ຣະດັບ ນາຍພົນ ແຕ່ວ່າເຮົາ ກໍບໍ່ສາມາດ ເວົ້າຫຍັງໄດ້”.
ທ່ານກ່າວ ຕໍ່ໄປວ່າ ຣັຖບານລາວ ໄດ້ໃຫ້ຄໍາ ປະຕິຍານ ວ່າຈະເຮັດໃຫ້ ປະເທດລາວ ປອດຢາເສພຕິດ ພາຍໃນປີ 2015 ແຕ່ເມື່ອເບິ່ງ ຈາກສະພາບຕົວຈີງ ແລ້ວ ຄົງຈະບໍ່ມີທາງ ເປັນໄປໄດ້ ທີ່ຈະປະສົບ ຜົນສໍາເຣັດ ເພາະ ຢາເສພຕິດ ຍັງມີການ ລັກລອບ ນໍາເຂົ້າ-ສົ່ງອອກ ຢູ່ເປັນປະຈໍາ. ໃນ ສປປລາວ ກໍມີຄົນຕ່າງຊາຕ ເຂົ້າມາໃຊ້ ເປັນສາງເກັບ ຊຸກເຊື່ອງ ຢາເສພຕິດ ໂດຍສະເພາະ ໃນບ່ອນທີ່ ໃກ້ກັບເຂດ casino.
ໃນຂະນະດຽວກັນ ທາງເຈົ້າໜ້າທີ່ ຕໍາຣວດ ປ້ອງກັນ ຢາເສພຕິດ ແຂວງບໍ່ແກ້ວ ກໍໃຫ້ ອະທິບາຍ ໃນເຣື້ອງ ດັ່ງກ່າວວ່າ ບໍ່ມີຄວາມຈີງ:
“ບໍ່ມີ ເດີ ບໍ່ຮູ້ຄືກັນ ດຽວນີ້ ບໍ່ມີແລ້ວ ເພາະວ່າ ຕໍາຣວດ ພວກເຮົາ ກໍສະກັດກັ້ນຢູ່ ບໍ່ມີບ່ອນໃດ ຜລິດໄດ້ແລ້ວ”.
ເຈົ້າໜ້າທີ່ ທ່ານນີ້ ກ່າວມ້ວນທ້າຍວ່າ ຜ່ານມາ ແຫລ່ງຜລິດຢາບ້າ ຢູ່ແຂວງບໍ່ແກ້ວ ກໍບໍ່ເຄີຍມີ ຕາມທີ່ມີການ ກ່າວຫາມານັ້ນ ແລະ ເວົ້າວ່າຢາກຮູ້ ຄືກັນ ວ່າມີຢູ່ໃສ. ຖ້າຜູ້ໃດ ມີຂໍ້ມູນ ກໍໃຫ້ແຈ້ງ ຕໍ່ທາງການ ແລ້ວທາງແຂວງ ຈະຈັດການ ກັບເຣື້ອງນີ້ ຢ່າງເດັດຂາດ ແນ່ນອນ.
