ເຈົ້າຫນ້າທີ່ລາວ ທ່ານນຶ່ງ ເວົ້າວ່າ ໃນປັດຈຸບັນ ຍັງບໍ່ມີ ຄວາມຄືບຫນ້າ ກ່ຽວກັບ ທ່ານ ສົມບັດ ສົມພອນ ນັກພັທນາກອນ ຄົນສຳຄັນ ໃນສປປລາວ ແຕ່ຢ່າງໃດ. ທາງການລາວ ໄດ້ຊີ້ແຈງວ່າ ຈະທຳການ ສືບສວນ ກ່ຽວກັບເຣື້ອງນີ້ ຢ່າງ ຮີບດວ່ນ ແລະ ບໍ່ໄດ້ມີສ່ວນ ກ່ຽວຂ້ອງກັບ ການຫາຍໂຕໄປ ຂອງ ທ່ານສົມບັດ. ດ່ັງທ່ານກ່າວ ໃນຕອນນຶ່ງວ່າ:
"ກ່ຽວກັບ ບັນຫານີ້ຫັ້ນບໍ ຄະດີ ທ້າວສົມບົດ ທາງເຈົ້າຫນ້າທີ່ ນະຄອນຫລວງ ພວກເຮົາ ກະຊວງ ພາກສ່ວນ ກ່ຽວຂ້ອງ ເພີ່ນກໍຍັງດຳເນີນ ສືບຕໍ່ໄປ ກໍດຳເນີນຢູ່ ຮີບດ່ວນ ຫັ້ນແຫລະ".
ໃນວັນທີ 4 ກຸມພາ ປີ 2013 ຫນັງສືພີມ ປະເທດລາວ ໄດ້ອອກຖແລງການ ຂອງ ຣັຖບານ ກ່ຽວກັບ ການສືບຫາ ທ່ານ ສົມບັດ ສົມພອນ ວ່າຍັງບໍ່ພົບເຫັນ ຜູ້ກ່ຽວ ແລະ ຫລັກຖານ ຂໍ້ມູນກ່ຽວກັບ ຜູ້ກ່ຽວ ແຕ່ຢ່າງໃດ ເຈົ້າຫນ້າທີ່ລາວ ບໍ່ໄດ້ຄຸມຂັງ ຜູ້ກ່ຽວ ທີ່ຜ່ານມາ ທາງເຈົ້າຫນ້າທີ່ ຕຳຣວດ ກໍໃຫ້ຄວາມຮ່ວມມື ເປັນຢ່າງດີ ເລີ້ມແຕ່ ການເບີ່ງກ້ອງ ວົງຈອນປິດ ໄປຮອດການ ເກັບກຳ ຂໍ້ມູນຕ່າງໆ ຈາກຜູ້ເຫັນ ເຫດການ ຈາກຍາດພີ່ນ້ອງ ຫຼື ປະຊາຊົນ ໃນບອ່ນເກີດເຫດ ພ້ອມທັງ ໄດ້ແຈ້ງໄປຍັງ ເຈົ້າຫນ້າທີ່ ຕຳຣວດ ໃນທົ່ວປະເທດ ໃຫ້ຕິດຕາມ ສືບຫາ ທ່ານ ສົມບັດ.
ຖແລງການຣະບຸ ອີກວ່າ ຮູບພາບ ທີ່ເຫັນໃນກ້ອງ ວົງຈອນປິດ ໃນມື້ວັນທີ 15 ທັນວາ ປີ 2012 ນັ້ນ ບໍ່ສາມາດ ຢືນຢັນໄດ້ວ່າ ຜູ້ຂັບຣົຖຈິບ ຫລື ຜູ້ມາຮັບເອົາ ຣົຖຈິບ ອອກໄປນັ້ນ ແມ່ນ ທ່ານ ສົມບັດ ຫລືແມ່ນໃຜ ແລະ ຣົຖກະບະ ທີ່ ແລ່ນເຂົ້າມາ ຈອດໃກ້ຣົຖຈິບ ແລ້ວແລ່ນ ອອກໄປນັ້ນ ກໍບໍ່ສາມາດ ຢືນຢັນ ໄດ້ວ່າແມ່ນໃຜ.
ເທົ່າເຖິງ ປັດຈຸບັນ ກໍເປັນເວລາ ເກືອບສອງເດືອນ ແລ້ວ ຫລາຍອົງການ ກໍຕິດຕາມ ກ່ຽວກັບ ເລື້ອງນີ້ ຢ່າງໃກ້ຊິດ ແຕ່ຍັງບໍ່ມີ ຮ່ອງຮອຍ ຂອງ ທ່ານ ສົມບັດ ສົມພອນ ເລີຍ.
ຖແລງການ ຂອງອົງການ ລາວ ເພື່ອ ສິດທິມະນຸດ ທີ່ ປະເທດ ຝຣັ່ງເສດ, ວັນທີ 1 ກຸມພາ ຮຽກຮ້ອງ ຜູ້ຕາງໜ້າ ສະຫະພາບ ຢູໂຣບ ທີ່ໄປຮ່ວມ ສົນທະນາ ບັນຫາ ສິດທິມະນຸດ ກັບ ຣັຖບານລາວ ໃນວັນທີ 4 ກຸມພາ ທີ່ ນະຄອນຫລວງ ວຽງຈັນ ວ່າ ຈົ່ງຢ່າປ່ອຍໃຫ້ ທ່ານ ສົມບັດ ສົມພອນ ກາຍເປັນ ນັກໂທດ ຂັງລັບ.
ອົງການລາວ ເພື່ອ ສິດທິມະນຸດ ທີ່ ປະເທດ ຝຣັ່ງເສດ ສົ່ງຖແລງການ ເຖິງຜູ້ຕາງໜ້າ ສະຫະພາບ ຢູໂຣບ ວ່າພວກຕົນ ຂໍກ່າວຢໍ້າເຖິງ ຄວາມເປັນຫ່ວງ ຢ່າງສຸດຊຶ້ງ ກ່ຽວກັບ ຂໍ້ມູນ ການສືບສວນ ຂອງ ທາງການລາວ ທີ່ຂາດ ປະສິດທິພາບ ແລະ ຍັງເຊື່ອຖື ບໍ່ໄດ້ ກ່ຽວກັບ ທ່ານ ສົມບັດ ສົມພອນ ທີ່ຫາຍໄປ ຕໍ່ໜ້າຕໍ່ຕາ ຂອງ ເຈົ້າໜ້າທີ່ ຕໍາຣວດ ເມື່ອວັນທີ່ 15 ທັນວາ 2012 ແລະວ່າ ຄໍາຖແລງການ ຂອງ ກະຊວງ ການຕ່າງປະເທດ ແລະ ທູຕ ສປປ ລາວ ປະຈໍາ ສະຫະປະຊາຊາຕ ທີ່ ນະຄອນ ເຈນີວາ ນັ້ນບໍ່ເປັນໜ້າ ເຊື່ອຖືໄດ້ ແລ້ວ ຍັງປະປ່ອຍໃຫ້ ການຖືກບັງຄັບ ໃຫ້ຫາຍສາບສູນ ເກີດເປັນຄວາມ ຢ້ານກົວ.
ຖແລງການ ຣະບຸວ່າ ທ່ານ ສົມບັດ ສົມພອນ ເປັນທີ່ ນັບໜ້າຖືຕາ ຢູ່ໃນລາວ ແລະ ໃນເອເຊັຽ, ເປັນຜູ້ສ້າງຕັ້ງ ສູນອົບຮົມ ຮ່ວມພັທນາ, ເປັນຜູ້ໄດ້ຮັບ ຮາງວັນ ຣາມອນ ແມັກໄຊໄຊ ເມື່ອປີ 2005, ພັທນາ ຊຸມຊົນ ກ່ຽວກັບ ວິທີການ ປັບປຸງ ຊີວິດ ການເປັນຢູ່ ໂດຍອີງໃສ່ ຫລັກການ ພັທນາ ທີ່ຍືນຍົງ, ປົກປ້ອງ ສິ່ງແວດລ້ອມ ແລະ ວັທນະທັມ.
ອົງການລາວ ເພື່ອ ສິດທິມະນຸດ ໄດ້ຮຽກຮ້ອງ ຜູ້ຕາງໜ້າ ສະຫະພາບ ຢູໂຣບ ເພື່ອຂໍໃຫ້ ຣັຖບານລາວ ໃຊ້ກົດໝາຍ ມາຕຣາ 13 ຂອງຖແລງການ ວ່າດ້ວຍການ ປົກປ້ອງ ທຸກຄົນ ຕໍ່ການບັງຄັບ ໃຫ້ຫາຍສາບສູນ. ຖແລງການ ເວົ້າວ່າ ການສົນທະນາ ຣະຫ່ວາງ ຢູໂຣບ ກັບຣັຖບານ ສປປ ລາວ ມີຂື້ນ ໃນຖ້າມກາງ ຄວາມເປັນຫ່ວງນໍາ ຊະຕາກັມ ຂອງ ທ່ານ ສົມບັດ ສົມພອນ ຊື່ງກໍເປັນ ໂອກາດ ສໍາລັບ ຢູໂຣບ ທີ່ຈະໃຊ້ເຄື່ອງມື ທັງດ້ານ ເສຖກິດ ແລະ ການເມືອງ ທີ່ມີຢູ່ ກົດດັນ ໃຫ້ມີ ການປັບປຸງ ສິດທິມະນຸດ ຢູ່ໃນລາວ.
ອົງການລາວ ເພື່ອ ສິດທິມະນຸດ ໄດ້ຮຽກຮ້ອງ ທາງການລາວ ຊອກຫາ ທ່ານ ສົມບັດ ສົມພອນ ແລະ ນໍາທ່ານກັບມາ ດ້ວຍຄວາມປອດພັຍ, ພ້ອມທັງ ໃຫ້ປ່ອຍໂຕ ຜູ້ທີ່ຖືກ ຄຸມຂັງ ຍ້ອນໃຊ້ ສິດທິພື້ນຖານ ເຊັ່ນທ່ານ ທອງປະເສີດ ເກື້ອກຸນ ແສງອະຣຸນ ແພງພັນ ບົວວັນ ຈັນມະນີວົງ ແລະ ແກ້ວໃຈ ທີ່ຖືກຂັງ ຕັ້ງແຕ່ ປີ 1999, ແລະ ຂໍໃຫ້ປ່ອຍ ບຸກຄົນ ທີ່ຖືກຈັບ ແລະ ຫາຍສາບສູນ ໃນວັນທີ 2 ພຶສຈິກາ 2009 ຄື ນາງກິ່ງແກ້ວ ທ່ານ ສຸບັນ ທ່ານ ສວນ ທ່ານ ສິນປະສົງ ທ່ານ ຄໍາສອນ ທ່ານ ນູ ນາງສາວ ສົມຈິດ ທ່ານ ສົມຄິດ ແລະ ສຸຣິຍາ.
