ທາງການ ແຂວງ ອັຕຕະປື ຍອມຮັບວ່າ ປະຊາຊົນ ບໍ່ພໍໃຈ ຕໍ່ການ ອະນຸຍາດ ສັມປະທານ ທີ່ດິນ ໃຫ້ແກ່ ວິສາຫະກິດ ຈາກ ວຽດນາມ ທີີ່ນັບມື້ ຫລາຍຂຶ້ນ.
ເຈົ້າໜ້າທີ່ ແຂວງ ອັຕຕະປື ຜູ້ບໍ່ປະສົງ ອອກຊື່ ເປີດເຜີຍຕໍ່ ເອເຊັຽເສຣີ ວ່າບັນຫາ ທີ່ທ້າທາຍ ໃນການ ບໍຣິຫານ ແລະ ການຄຸ້ມຄອງ ໃນແຂວງ ອັຕຕະປື ໃນ ປັດຈຸບັນ ຄືຄວາມບໍ່ພໍໃຈ ຂອງ ປະຊາຊົນ ໃນການໃຫ້ ສັມປະທານ ທີ່ດິນ ແກ່ ບໍຣິສັດ ວຽດນາມ ທີ່ເພີ່ມຂຶ້ນ ນັບມື້.
ດ້ວຍເຫດນີ້ ກໍຍ້ອນວ່າ ການໃຫ້ ສັມປະທານ ທີ່ດິນ ພາຍໃຕ້ ສິດທິ ພິເສດ ໃນຖານະທີ່ ວຽດນາມ ມີສາຍພົວພັນ ມິຕພາບ ແບບພິເສດ ກັບລາວນັ້ນ ບໍ່ພຽງແຕ່ຈະໄປ ກວມເອົາທີ່ດິນ ທໍາກິນ ແລະ ທີ່ຢູ່ອາສັຍ ຂອງ ປະຊາຊົນ ເທົ່ານັ້ນ ແຕ່ໂຄງການຕ່າງໆ ຂອງ ວຽດນາມ ຍັງກໍ່ໃຫ້ເກີດ ຜົນກະທົບ ຕໍ່ສະພາບແວດລ້ອມ ໃນແຂວງ ອັຕຕະປື ນໍາອີກ. ໂດຍສະເພາະ ໂຄງການ ຂຸດຄົ້ນແຮ່ທາດ ແລະ ການຮ່ອນຄໍາ ໃນນໍ້າເຊກອງ, ການປູກພືດ ເສຖກິດ ເຊັ່ນ ຢາງພາລາ ມັນຕົ້ນ ອ້ອຍ ແລະ ໂຄງການ ສ້າງເຂື່ອນ ເຊກະໝານ1 ແລະ 3 ຊຶ່ງເປັນ ໂຄງການລົງທຶນ ທີ່ມີການຕັດໄມ້ ທໍາລາຍປ່າ ແລະ ມີການນໍາໃຊ້ ສານເຄມີ ທີ່ ສົ່ງຜົນກະທົບ ຕໍ່ຊີວິດ ການເປັນຢູ່ ຂອງ ປະຊາຊົນ ໃນແຂວງ ຊຶ່ງ ປະຊາຊົນ ກໍໄດ້ ສະແດງອອກ ເຖິງຄວາມ ບໍ່ພໍໃຈ ຫລາຍຂຶ້ນ ຈົນທາງການແຂວງ ຕ້ອງໄດ້ສົ່ງ ເຈົ້າໜ້າທີ່ ໄປສ້າງ ຄວາມເຂົ້າໃຈ ກັບປະຊາຊົນ. ເຈົ້າໜ້າທີ່ ເວົ້າວ່າ:
"ຄວາມບໍ່ເຂົ້າໃຈ ຂອງ ປະຊາຊົນ ຕໍ່ການໃຫ້ ຕ່າງປະເທດ ເຊົ່າສັມປະທານ ທີ່ດິນ ພ້ອມກັນນັ້ນ ການຕີຣາຄາ ແບບບໍ່ຈົບງາມ ເຣື່ອງການປູກ ຢາງພາລາ ຢູ່ແຂວງ ອັຕຕະປື ນີ້ ກໍມີສ່ວນ ໄດ້ແຜ່ອອກກວ້າງ ຢູ່ໃກ້ ແລະຢູ່ໄກ ເຖິງຢ່າງໃດ ກໍຕາມ ພວກຂະເຈົ້າ ໄດ້ພຍາຍາມ ໃຫ້ພະນັກງານ ສະມາຊິກ ພັກ ຢູ່ແຕ່ລະຂັ້ນ ໄດ້ລົງໄປ ອະທິບາຍ ໃຫ້ປະຊາຊົນ ລຽນຕິດ ລຽນຕໍ່ ເພື່ອໃຫ້ເຂົາເຈົ້າ ເຫັນເປົ້າໝາຍ".
ບໍຣິສັດ ວຽດນາມ ໄດ້ຮັບ ສັມປະທານ ທີ່ດິນ ໃນແຂວງ ອັຕຕະປື ແລ້ວ 50 ພັນກວ່າ ເຮັກຕາ ໂດຍສະເພາະ ແມ່ນການລົງທຶນ ຂອງ ກຸ່ມບໍຣິສັດ ຮອງແອງຫຍ່າລ້າຍ ພຽງຣາຍດຽວ ກໍມີພື້ນທີ່ ປູກ ຢາງພາລາ 30 ພັນ ກວ່າເຮັກຕາ. ຍິ່ງໄປກວ່ານັ້ນ ບໍຣິສັດ ວຽດນາມ ຍັງໄດ້ພາກັນ ນໍາເອົາ ຄົນງານ ວຽດນາມ ເຂົ້າມາແຂວງ ຫລາຍເພີ່ມຂຶ້ນ ອັນສົ່ງ ຜົນກະທົບ ຕໍ່ວຽກເຮັດ ງານທໍາ ຂອງ ປະຊາຊົນລາວ ໃນແຂວງ ອັຕຕະປື ອີກດ້ວຍ.
ໄດ້ເປັນໃຫຍ່ຍ້ອນວຽດນາມ ມີຫຍັງກໍ່ຕ້ອງຫວາຍໃຫ້ວຽດນາມ.
