ນັກເຄື່ອນໄຫວ ຈາກກໍາພູຊາ ເວົ້າວ່າ ອາຊຽນ ຕ້ອງສແດງຈຸດຢືນ ເພື່ອຮຽກຮ້ອງ ສິດທິມະນຸດ.
ນັກເຄື່ອນໄຫວ ສິດທິມະນຸດ ຈາກກໍາພູຊາ ທີ່ເດີນທາງມາຮ່ວມ ສັມມະນາ ທີ່ບາງກອກ ເວົ້າວ່າ ອາຊຽນ ຕ້ອງສແດງຈຸດຢືນ ເພື່ອຮຽກຮ້ອງ ໃຫ້ໄດ້ມາ ຊຶ່ງສິດທິມະນຸດ. ການສັມມະນາ ທີ່ຈັດຂຶ້ນ ເມື່ອວັນທີ່ 5 ກຸມພາ ຜ່ານມາ ຢູ່ມະຫາວິທະຍາໄລ ທັມມະສາຕ ຂອງໄທ ພາຍໃຕ້ຫົວ ເຣື້ອງວ່າ: “ເບິ່ງໄປໄກໆ ກ່ວາກໍຣະນີທ່ານ ສົມບັດສົມພອນ ຄວາມຮຸນແຮງ ໃນລຸ່ມນໍ້າຂອງ ຜົນກະທົບ ຂອງຄົນໜຸ່ມສາວ”. ໃນເວທີ ສັມມະນາ ທີ່ວ່ານີ້ ນັກເຄື່ອນໄຫວ ສິດທິມະນຸດ ຫລາຍໆຄົນ ໄດ້ຂຶ້ນມາ ສແດງ ຄວາມຄິດຄວາມເຫັນ ຄືກັນ ຢູ່ບ່ອນວ່າ ເຣື້ອງການຫາຍສາບສູນ ຂອງທ່ານ ສົມບັດ ສົມພອນ ນັກພັດທະນາ ຊຸມຊົນ ໃນລາວ ບໍ່ແມ່ນ ບັນຫາສະເພາະ ຊາວລາວ ເທົ່ານັ້ນ ແຕ່ມັນມີ ຄວາມສໍາຄັນ ຕໍ່ອາຊຽນ. ປະເທດໃນກຸ່ມອາຊຽນຄວນສແດງຈຸດຢືນ ເພື່ອຮຽກຮ້ອງ ເອົາສິດທິນີ້ ໃຫ້ຫລາຍຕື່ມ, ດັ່ງຍານາງ ນຽງ ໂສວັດທະນະ, ນັກເຄື່ອນໄຫວຊາວກໍາພູຊາ, ໄດ້ກ່າວ:
“ພວກເຮົາ ເປັນພູມີພາກ ອັນດຽວກັນ ບໍ່ເປັນປະເທດດຽວ ອີກແລ້ວ ດັ່ງນັ້ນ ພວກເຮົາ ຈຳເປັນຕ້ອງ ເຮັດວຽກຮ່ວມກັນ ຈັ່ງຊັ້ນແລ້ວ ຂ້ອຍຈຶ່ງມາ ທີ່ນີ້ ມາແຕ່ໄກ ຈາກປະເທດຂອງຂ້ອຍ ເພື່ອຮ່ວມ ຂະບວນການນີ້. ຍ້ອນການສູນຫາຍ ຂອງທ່ານ ສົມບັດ ສົມພອນ ນີ້ ມັນບໍ່ເປັນພຽງແຕ່ ເປັນພັຍຂົ່ມຂູ່ ນັກຕໍ່ສູ້ ເພື່ອສິດທິມະນຸດ ທັງຫລາຍ ໃນລາວ ເທົ່ານັ້ນ ແຕ່ມັນເປັນພັຍຂົ່ມຂູ່ ນັກຕໍ່ສູ້ ເພື່ອສິດທິມະນຸດ ທຸກໆຄົນ ໃນຫລາຍປະເທດ ເຊັ່ນ ກໍາພູຊາ, ໄທ ແລະ ວຽດນາມ. ອາຊຽນໂດຍທົ່ວໄປ ບໍ່ແມ່ນ ປະເທດລາວ ພຽງຜູ່ດຽວ.”
ຍານາງ ນຽງ ກ່າວຕໍ່ໄປວ່າ ສິ່ງທີ່ນັກເຄື່ອນໄຫວ ເຫັນວ່າ ສໍາຄັນທີ່ສຸດນີ້ ຣັຖບານ ລາວ ຄວນຊອກຫາ ທ່ານ ສົມບັດ ສົມພອນ ແບບມີຄວາມໂປ່ງໃສ ມີການເປີດເຜີຽ ຄວາມຄືບໜ້າ ຕໍ່ສາທາຣະນະຊົນ ຜ່ານສື່ມວນຊົນ ເປັນລະຍະໆ ເພື່ອສແດງ ໃຫ້ເຫັນວ່າ ຣັຖບານ ບໍ່ໄດ້ປະລະ ຄວາມເອົາໃຈໃສ່ ຕໍ່ກໍຣະນີ ທີ່ສັ່ນສະເທືອນ ສິດທິມະນຸດ ໃນບັນດາປະເທດ ໃນພູມີພາກ ອາຊຽນ.
ນັກວິຊາການ ແລະ ທັງເປັນນັກເຄື່ອນໄຫວ ສິດທິມະນຸດ ຈາກສະຖາບັນ ສັງຄົມ ຈຸລາລົງກອນ ມະຫາວິດທະຍາໄລ ທ່ານ ຈັກກະໄຊ ໂສມທອງດີ ຂຶ້ນມາກ່າວເທິງເວທີ ຢ່າງຍືດຍາວ, ຊຶ່ງສລຸບສັ້ນໆ ວ່າ ໜ້າທີ່ ຄວາມຮັບຜິດຊອບ ເຣື້ອງທ່ານ ສົມບັດ ສົມພອນ ນີ້ ບໍ່ແມ່ນແຕ່ສະເພາະ ຂອງປະເທດລາວປະເທດດຽວ ແຕ່ແມ່ນໜ້າທີ່ຮັບຜິດຊອບ ທີ່ປະເທດ ໃນອາຊຽນ ຕລອດທັງນັກລົງທຶນ ຄວນສແດງຈຸດຢືນ ຂອງຕົນ ຮຽກຮ້ອງ ຣັຖບານລາວຮ່ວມ ກັນແກ້ໄຂ.
ຜູ່ນໍາ ສປປ ລາວ ຄວນກັບເນື້ອກັບຕົວມາເປັນມິດກັບປະຊາຊົນຊາວໂລກ.
