ນາງສີວັນໄຊ ໄດ້ອອກຄຸກແລ້ວ

ນາງ ສີວັນໄຊ ພົມມະລາດ ຜູ່ທີ່ຖືກ ກັກຂັງ ຢູ່ແຂວງຄຳມ່ວນ ຍ້ອນຕໍ່ສູ້ ເພື່ອສິດທິດິນ ຂອງຕົນເອງນັ້ນ ຖືກປ່ອຍ ເປັນອິສຣະ ແລ້ວ ໃນວັນສຸກ ທີ 8 ເດືອນ ກຸພາ 2013.

ພາຍຫລັງ ທີ່ໄດ້ຖືກ ກັກຂັງ ມາເປັນເວລາ ເກືອບ 3 ເດືອນ ໃນຂໍ້ຫາ ປຸກລະດົມ ປະຊາຊົນ ກໍ່ຄວາມ ວຸ້ນວາຍນັ້ນ, ນາງ ສີວັນໄຊ ພົມມະລາດ, ໄດ້ຖືກປ່ອຍໂຕ ອອກຈາກຄຸກ ໃນຕອນແລງ ມື້ວັນສຸກ ທີ 8 ເດືອນ ກຸມພາ ໂດຍ ໄດ້ເສັຍຄ່າ ປັບໃໝ ປະມານ 7 ແສນ ກວ່າກີບ ພ້ອມກັບ ສັນຍາວ່າ ຈະປະຕິບັດ ຕາມເງື່ອນໄຂ ທີ່ເຈົ້າໜ້າທີ່ ໄດ້ກໍານົດໄວ້. ກ່ຽວກັບ ການປ່ອຍໂຕ ຄັ້ງນີ້ ນາງ ສີວັນໄຊ ສະແດງ ຄວາມຮູ້ສຶກ ວ່າ:

“ນ້ອງກະດີໃຈ ແຫລ໋ະ, ເຖິງນ້ອງຊິໄດ້ ດິນຄືນ ຫລືບໍ່ໄດ້ ນ້ອງກະບໍ່ເສັຍໃຈດອກ. ແຕ່ວ່າ ນ້ອງກໍໄດ້ ເຮັດສຸດ ຄວາມສາມາດ ຂອງນ້ອງແລ້ວ, ສູ້ເພື່ອ ປະຊາຊົນ ຫລາຍຄົນ, ສູ້ເພື່ອຫລາຍຄົນ. ນ້ອງກະພູມໃຈ ຕົນເອງ ລະອ້າຍເອີຍ.”

ການປ່ອຍຕົວ ຄັ້ງນີ້ ມີຂຶ້ນ ພາຍຫລັງ ທີ່ ນາງສີວັນໄຊ ແລະ ສາມີ ສັນຍາ ວ່າຈະ ປະຕິບັດ ຕາມທາງຂອງ ເຈົ້າໜ້າທີ່ ໄດ້ຕັ້ງເງື່ອນໄຂ ໃຫ້ເປັນພົລເມືອງ ທີ່ດີ ແລະ ຈະບໍ່ສ້າງ ຄວາມປັ່ນປ່ວນ ອີກຕໍ່ໄປ, ດັ່ງທ່ານ ສຸກພະອຸ່ນ ພົມມະລາດ, ໄດ້ອ່ານເງື່ອນໄຂ ບາງຕອນ ໃຫ້ຟັງວ່າ:

“ຈະບໍ່ໂຄສນາ ຊວນເຊື່ອ, ປຸກລະດົມ ຂົນຂວາຍ ເອົາກຸ່ມຄົນ ເຂົ້າຮ່ວມເຄື່ອນໄຫວ ທີ່ຜິດຕໍ່ລະບຽບ ກົດໝາຍ ແຫ່ງ ສປປລາວ ເດັດຂາດ. ໃນຕໍ່ໜ້າ ຈະເປັນ ພົລເມືອງດີ ຂອງສັງຄົມ, ບໍ່ຄວນເຄື່ອນໄຫວ ກະທຳຜິດ ຕໍ່ຂໍ້ກຳນົດ ກົດໝາຍ ແຫ່ງ ສປປລາວ ທີ່ວາງອອກ ໃນແຕ່ລະ ລະຍະ.”

ນາງ ສີວັນໄຊ ພົມມະລາດ ໄດ້ຖືກຈັບ ໃນວັນທີ 19 ເດືອນ ພຶສຈິກາ ປີ 2012 ໃນຂໍ້ຫາ ເປັນຜູ້ລະດົມ ເຕົ້າໂຮມ ຊາວບ້ານ ສ້າງຄວາມປັ່ນປ່ວນ ໃນຂະນະທີ່ ນາງ ໄດ້ພາຊາວບ້ານ 20 ກ່ວາຄົນ ໂດຍມີ ຈຸດປະສົງ ໄປພົບ ເຈົ້າໜ້າທີ່ ອາວຸໂສ ທ່ານນຶ່ງ ໃນ ບໍຣິເວນ ຂົວມິຕພາບ ລາວ-ໄທ ແຂວງ ສວັນນະເຂດ, ຊຶ່ງນາງ ແລະ ຊາວບ້ານ, ຮວມທັງ ຜູ້ເຖົ້າຜູ່ແກ່ ເຊື່ອວ່າ ເຈົ້າໜ້າທີ່ ທ່ານນັ້ນ ຈະສາມາດ ຊ່ອຍແກ້ໄຂ ຄວາມຂັດແຍ່ງ ເຣື້ອງທີ່ດິນ ທີ່ຊາວບ້ານ ຖືວ່າ ບໍ່ມີຄວາມ ຍຸຕິທັມ ສຳລັບ ຂະເຈົ້າ. ແຕ່ໃນທີ່ສຸດ ພວກຂະເຈົ້າ ກໍບໍ່ໄດ້ພົບ ເຈົ້າໜ້າທີ່ ຄົນດັ່ງກ່າວນັ້ນ ແລະ ຕໍ່ມາ ນາງ ສີວັນໄຊ ຖືກຈັບ ແລະ ກັກຂັງ ເກືອບຮອດ 3 ເດືອນ ໂດຍໄດ້ປະ ລູກສາວ ອາຍຸ 3 ປີ ຢູ່ກັບ ສາມີ ແລະ ພີ່ນ້ອງ ມາຕັ້ງແຕ່ ເດືອນ ພຶສຈິກາ ປີ 2012.