ປັຈຈຸບັນ ມີຄົນງານ ຈີນ ແລະ ວຽດນາມ ຫາເຮັດວຽກ ຫາຢູ່ຫາກິນ ແບບເລື່ອນລອຍ ໃນນະຄອນຫລວງ ວຽງຈັນ ຢ່າງຫລວງຫລາຍ ແລະ ເຫັນວ່າຈະມີ ເພີ້ມຂຶ້ນ ເລື່ອຍໆ.
ຊາວລາວ ໃນ ນະຄອນຫລວງ ວຽງຈັນ ຜູ້ນຶ່ງ ເປີດເຜີຍວ່າ ໃນບໍ່ດົນມານີ້ ປະກົດວ່າ ມີແຮງງານ ຊາວຈີນ ແລະ ວຽດນາມ ຫາກິນແບບ ເລື່ອນລອຍ ເຂົ້າມາ ນະຄອນຫລວງ ຫລາຍຂຶ້ນ ຢ່າງຜິດຫູ ຜິດຕາ ໄປທາງໃດ ແຈໃດ ກໍພົບເຫັນ ຊາວຈີນ ເລາະ ຂາຍເຄື່ອງເລ ແລະ ເຫັນຊາວວຽດນາມ ເລາະຕາມບ້ານ ເກັບຕຸກນໍ້າ ຢ່າງຫລວງຫລາຍ ນອກຈາກນີ້ ຍັງມີຊາວຈີນ ເຂົ້າມາ ຊອກເຮັດວຽກ ຮັບຈ້າງ ຕາມໂຄງການ ກໍ່ສ້າງ ຕ່າງໆ ຢ່າງຫລວງຫລາຍ. ຜູ້ຍິງ ຊາວວຽດນາມ ຈໍານວນນຶ່ງ ພາກັນ ຫລັ່ງໄຫລ ເຂົ້າມາ ນະຄອນຫລວງ ວຽງຈັນ ເພື່ອ ເລາະຮັບຈ້າງ ຕາມເຮືອນຄົນ ເຮັດຕົກແຕ່ງເລັບ ແລະ ຂາຍເຄື່ອງຢູ່ ຂອງກິນ ດັ່ງ ຊາວລາວ ຜູ້ນີ້ ເວົ້າວ່າ:
“ຈີນກັບວຽດນີ້ ມາເປັນ ກັມມະກອນ ຕາມໂຄງການ ກໍ່ສ້າງ ໝົດ ໂຄງການ ມັນ ກໍບໍ່ເມືອ ຊອກເຊົ່າເຮືອນ ຢູ່ແຖວນີ້ ແຫລະ ຄັນຜູ້ຍິງ ກໍຊອກເກັບ ຕຸກນໍ້າ ຫຼື ບໍ ກໍຊອກເກັບ ເສດເຫລັກ ຜູ້ເຮັດເລັບ ກໍມີ ຜູ້ຂາຍ ປາເມີກ ກໍມີ ຂາຍໄຂ່ລູກ ກໍມີ”.
ຢ່າງໃດກໍຕາມ ຕໍ່ບັນຫາດັ່ງ ກ່າວນີ້ ທາງວິທຍຸ ເອເຊັຍເສຣີ ກໍເຄີຍ ອອກຂ່າວ ໄປຫລາຍເທຶ່ອແລ້ວ ກ່ອນໜ້ານີ້ ແລະເຄີຍ ສອບຖາມ ໄປຍັງ ເຈົາໜ້າທີ່ ກ່ຽວຂ້ອງ ຂອງ ທາງການລາວວ່າ ຈະແກ້ໄຂ ແບບໃດ ມາຮອດ ປັຈຈຸບັນນີ້ ຍັງບໍ່ໄປ ຮອດໃສ ຮ້າຍໄປ ກວ່ານັ້ນ ແຮງງານ ເລື່ອນລອຍ ຍິ່ງມີເພີ້ມ ຫລາຍກວ່າເກົ່າ.
