ຣັຖບານລາວ ປະເຊີນກັບ ນານາຊາດ ກົດດັນ ເພີ້ມອີກ ໃນກໍຣະນີ ການ ຫາຍສາບສູນ ຂອງ ນັກເຄື່ອນໄຫວ ດ້ານສິດທິມະນຸດ ຄົນສຳຄັນ ທ່ານ ສົມບັດ ສົມພອນ ໃນເດືອນ ພຶສຈິກາ ຜ່ານມາ.
ບາງອົງກອນ ໄດ້ຮຽກຮ້ອງ ໃຫ້ອາຊຽນ ເຂົ້າກ່ຽວຂ້ອງ ທີ່ ຮ່ວມດ້ວຍ ນັກການທູດ ຣະດັບສູງ ຈາກ ສະຫະຣັຖ ແລະ ປະເທດ ອອສເຕຣເລັຽ. ທ່ານ Bob Carr ຣັຖມົນຕຣີ ຕ່າງປະເທດ ອອສເຕຣເລັຽ ໄດ້ຍົກບັນຫາ ດ່ັງກ່າວ ກັບຄູ່ຮ່ວມ ຕຳແຫນ່ງ ຝ່າຍລາວ ແລະ ນາຍົກ ຣັຖມົນຕຣີ ລາວ ທ່ານ ທອງສິງ ທັມມະວົງ ໃນຊ່ວງການ ຢ້ຽມຢາມ ສປປລາວ ຂອງທ່ານ ໃນອາທິດ ທີ່ຜ່ານມາ ໂດຍໄດ້ບອກ ກັບ ທາງການລາວ ວ່າ ທ່ານສົມບັດ ມີຫມູ່ເພື່ອນ ຢ່າງຫລວງຫລາຍ ໃນອອສເຕຣເລັຽ ຜູ້ທີ່ ລື້ງແກ່ນ ແລະ ນິຍົມຊົມຊອບ ໃນ ວຽກງານ ຂອງທ່ານ ມີເປັນຫວ່ງ ໃນການ ຫາຍສາບສູນ ຂອງທ່ານ ໃນເວລານີ້.
ທ່ານ Carr ໄດ້ໃຊ້ຄຳເວົ້າ ຂອງທ່ານ ຢ່າງຣະມັດ ຣະວັງ ເພື່ອບໍ່ຢາກ ສ້າງຄວາມ ເສົ້າໃຈ ໃຫ້ແກ່ພັລຍາ ຂອງ ທ່ານສົມບັດ ສົມພອນ ນາງຊູມີງ ຜູ້ທີ່ກຳລັງ ຣົນນະຣົງ ໃຫ້ມີການ ປ່ອຍໂຕ ສາມີ ຂອງ ນາງ ທ່ານວ່າທ່ານ ໄດ້ຮັບການ ຄ້ຳປະກັນ ຈາກ ຜູ້ນຳລາວ ທີ່ຈະໃຫ້ ຫນ່ວຍງານ ທີ່ກ່ຽວຂ້ອງ ຕິດຕາມເຣື້ອງນີ້ ຢ່າງໃກ້ຊິດ ແລະ ບອກວ່າ ທາງການ ອອສເຕຣເລັຽ ກໍຈະສືບຕໍ່ ສົນໃຈ ໃນຄະດີ ດັ່ງກ່າວ ໃຫ້ຫລາຍຂຶ້ນ.
ທ່ານ Caar ໄດ້ກ່າວ ກ່ຽວກັບເລື້ອງນີ້ ຕໍ່ກຸ່ມນັກຂ່າວ ທີ່ ບາງກອກ ຫລັງຈາກ ທີ່ທ່ານ ກັບຈາກການໄປ ຢ້ຽມຢາມ ລາວ ແລະ ຫລັງຈາກ ທ່ານ Daniel Baer ຮອງຜູ້ຊ່ອຍ ຣັຖມົນຕຣີ ຕ່າງປະເທດ ສະຫະຣັຖ ຫ້ອງການ ປະຊາທິປະຕັຍ ສິດທິມະນຸດ ແລະ ແຮງງານ ໄດ້ຮຽກຮ້ອງ ໃຫ້ຣັຖບານ ລາວ ສືບສວນ ກ່ຽວກັບ ເຣື້ອງນີ້ ຢ່າງຮິບດ່ວນ.
