ຊາວເຜົ່າມົ້ງ ຖືກສິ້ງຊອມ

ສປປລາວ ແລະ ວຽດນາມ ເຂັ້ມງວດ ຕໍ່ການເຄື່ອນໄຫວ ຂອງ ຊາວເຜົ່າມົ້ງ ຣະຫວ່າງ ສອງປະເທດ ຫລາຍຂຶ້ນ.

ເຈົ້າຫນ້າທີ່ ປ້ອງກັນ ຄວາມສງົບ ຜູ້ທີ່ຂໍສງວນຊື່ ທ່ານນຶ່ງ ກ່າວຕໍ່ ເອເຊັຽເສຣີ ວ່າ ສານອາຍາ ແຂວງຊຽງຂວາງ ໄດ້ຕັດສີນ ຈຳຄຸກ ຊາວມົ້ງ 14 ຄົນ ເປັນເວລາ ຣະຫວ່າງ 1-18 ປີ ພ້ອມທັງ ປັບໄຫມ ເປັນເງິນແຕ່ 1 ລ້ານ ໄປຮອດ 80 ລ້ານກີບ ໃນຄະດີ ມີຄວາມຜິດ ກ່ຽວກັບ ການໂຈຣະກຳ ຕາມ ມາດຕຣາ 67 ແລະ ມາດຕຣາ 165 ໃນກົດຫມາຍ ອາຍາສບັບ ປັບປຸງ ເມື່ອປີ 2005.

ທັງລາວ ແລະ ວຽດນາມ ມີການເພີ້ມ ການກວດກາ ຫລາຍຂຶ້ນ, ຊາວມົ້ງ ຜູ້ທີ່ຖືກ ລົງໂທດນັ້ນ 1 ຄົນ ໃນນັ້ນເປັນມົ້ງ ວຽດນາມ ຫລື ມົ້ງວຽດ ທີ່ເດີນທາງ ເຂົ້າມາ ຕິດຕໍ່ພົວພັນ ກັບມົ້ງລາວ ຢູ່ ແຂວງຊຽງຂວາງ ຊຶ່ງທາງການລາວ ເຊື່ອວ່າ ອາວຸດ ສົງຄາມ ແລະ ວັດຖຸ ຣະເບີດ ທີ່ຢຶດໄດ້ ຈາກ ກຸ່ມດັ່ງກ່າວ ນັ້ນ ແມ່ນລັກລອບ ຂົນເຂົ້າມາ ຈາກວຽດນາມ ດ້ວຍເຫດນີ້ ຈຶ່ງເຮັດໃຫ້ ທາງການວຽດນາມ ເຊື່ອວ່າ ມີຂະບວນການ ຂອງຊາວມົ້ງ ກຸ່ມນີ້ທີ່ກຳລັງ ເຄື່ອນໄຫວ ໃນວຽດນາມ ຈຶ່ງເຮັດໃຫ້ ທາງການລາວ ແລະ ວຽດນາມ ເພີ້ມການ ເຝົ້າຣະວັງ ຫລາຍຂຶ້ນ.

ເຈົ້າຫນ້າທີ່ລາວ ກ່າວເພີ້ມອີກວ່າ ມົ້ງວຽດນາມ ທີ່ຖືກລົງໂທດ ນັ້ນມີຊື່ວ່າ ນາຍ ເຈີ້ຫວາລໍ້ ອາຍຸ 62 ປີ ຈາກການສືບສວນ ເຮັດໃຫ້ ເຈົ້າຫນ້າທີ່ ເຊື່ອວ່າ ເປັນຜູ້ມີ ບົດບາດ ໃນການປະສານງານ ຣະຫວ່າງ ກຸ່ມມົ້ງລາວ ກັບ ມົ້່ງວຽດ ເລົາຈຶ່ງຖືກ ຕັດສີນຈຳຄຸກ 15 ປີ ປັບໄຫມ 60 ລ້ານກີບ, ສ່ວນຜູ້ທີ່ຖືກ ຕັດສີນຈຳຄຸກ 18 ປີ ປັບໄຫມ 80 ລ້ານກີບ ນັ້ນ ຄືນາຍ ປາເຊັງຈ້າ ອາຍຸ 82 ປີ ແລະ ທ້າວ ປາເຢີ້ລໍ້ ອາຍຸ 61 ປີ ຖືກຈຳຄຸກ 17 ປີ ແລະ ຖືກປັບໄຫມ 70 ລ້ານກີບ. ສ່ວນທີ່ເຫລືອ ມີ 15 ຄົນ ຖືກຈຳຄຸກ 15 ປີ ແລະປັບໄຫມ ຄົນລະ 60 ລ້ານກີບ ແລະ ອີກ 6 ຄົນ ຖືກຈຳຄຸກ ຄົນລະ 1 ປີ ແລະ ປັບໄຫມ ຜູ້ລະ 1 ລ້ານກີບ, ແຕ່ທີ່ຫນ້າ ສັງເກດ ກໍແມ່ນວ່າ 7 ຄົນ ໃນຈຳນວນ 14 ຄົນນັ້ນ ເປັນເຍົາວະຊົນ ອາຍຸຕໍ່າກວ່າ 20 ປີ.