ລາວໂຮມລາວ ເພື່ອປະຊາທິປະໄຕ

ຊາວລາວ ຮຽກຮ້ອງ ຂໍໃຫ້ ຣັຖບານ ເປີດເຜີຍ ເຣື່ອງເງິນ ຊ່ວຍເຫລືອ ຈາກ ຕ່າງປະເທດ.

ຊາວລາວ ສົງສັຍວ່າ ເປັນຫຍັງ ໂຄງຮ່າງ ພື້ນຖານ ຂອງເຂດ ຫ່າງໄກ ຈຶ່ງຍັງບໍ່ໄດ້ ຮັບການພັທນາ ເທົ່າທີ່ຄວນ ທັ້ງໆທີ່ ຣັຖບານ ກໍໄດ້ຮັບ ເງິນຊ່ວຍເຫລືອ ຈາກ ຕ່າງປະເທດ ແລະ ອົງການ ຈັດຕັ້ງ ສາກົນຕ່າງໆ ເປັນຈໍານວນ ຫລວງຫລາຍ ໃນແຕ່ລະປີ, ຈຶ່ງຢາກ ຮຽກຮ້ອງ ໃຫ້ຣັຖບານ ເປີດເຜີຍ ເງິນຊ່ວຍເຫລືອ ຈາກ ຕ່າງປະເທດ ໃຫ້ປະຊາຊົນ ໄດ້ຮັບຮູ້. ດັ່ງຊາວລາວ ຜູ້ນຶ່ງ ຢູ່ແຂວງ ບໍຣິຄໍາໄຊ ເວົ້າວ່າ:

"ບໍຣິຈາກ ຫລາຍ ແຕ່ບໍ່ຮູ້ວ່າ ມັນໄປໃສ ດຽວນີ້ ເງິນ ບໍຣິຈາກ ຄົນລາວ ຢາກຮູ້ ວ່າມັນເຖິງ ບໍ່ດຽວນີ້ ເງິນ ບໍຣິຈາກ ກໍບໍ່ຮູ້ ບໍ່ຮູ້ໃຜ ເອົາໄປໃຊ້ ເງິນເຂົາ ເອົາໄປໃຫ້ ຣັຖບານ ລາວ ປະຊາຊົນ ລາວ ຢາກຮູ້ ມັນໄປຢູ່ທີ່ໃດ".

ຊາວລາວ ຜູ້ນີ້ ເວົ້າຕໍ່ໄປວ່າ ຣັຖບານ ມົວນໍາແຕ່ ການພັທນາ ສະເພາະ ໃນຕົວເມືອງໃຫຍ່ ເພື່ອໃຫ້ ນັກລົງທຶນ ເຂົ້າມາ ຂະນະທີ່ ປະຊາຊົນ ໃນແຂວງອື່ນໆ ຈໍານວນຫລາຍ ຍັງທຸກຍາກ ແລະ ຄອຍຖ້າ ການຊ່ວຍເຫລືອ ແຕ່ທີ່ຜ່ານມາ ຣັຖບານ ກໍໄດ້ໃຫ້ ການຊ່ວຍເຫລືອ ຢູ່ ແຕ່ກໍຍັງຖືວ່າ ໜ້ອຍຫລາຍ ເມື່ອທຽບກັບ ເຄື່ອງຂອງ ແລະ ເງິນ ທີ່ຕ່າງປະເທດ ໄດ້ໃຫ້ ການຊ່ວຍເຫລືອ ມານັ້ນ.

ທາງເຈົ້າໜ້າທີ່ ສໍານັກງານ ນາຍົກ ຣັຖມົນຕຣີ ກໍໄດ້ ອະທິບາຍ ເຖິງເຣື່ອງ ງົບປະມານ ວ່າ ຣັຖບານ ຈະນໍາມາ ເພື່ອຊ່ວຍເຫລືອ ທັງໝົດ ແຕ່ຍັງບໍ່ເຖິງ ເວລາ:

"ເພິ່ນຈະເອົາ ໄປຊ່ວຍເຫລືອ ໃຫ້ໝົດເລີຍ ກໍແບບວ່າ ເພິ່ນຊິຟື້ນຟູ ແບບວ່າ ກໍຍັງ ບໍ່ທັນເຖິງ ຣະດູການ ແຕ່ວ່າເພິ່ນ ກໍສິເອົາໄປ ຊ່ວຍເຫລືອ ໃຫ້ໝົດ".

ຢ່າງໃດກໍຕາມ ທ່ານກໍວ່າ ທີ່ຜ່ານມາ ການກວດກາ ງົບປະມານ ຊ່ວຍເຫລືອນັ້ນ ບໍ່ມີ ປະສິດທິພາບ ເທົ່າທີ່ຄວນ ຈຶ່ງເຮັດໃຫ້ ເງິນຊ່ວຍເຫລືອ ເພື່ອການພັທນາ ບໍ່ໄປເຖິງ ເຂດ ທີ່ຕ້ອງການ ຫລືໄປເຖິງ ແຕ່ບໍ່ຄົບ ຈໍານວນ ຕາມທີ່ ຕ້ອງການ.