ຣັຖບານລາວ ອອກຄໍາສ່ັງ ໃຫ້ ປະຕິບັດ ມາຕການ ເຂັ້ມງວດ ໃນການ ກວດກາ ທຸກການ ເຄື່ອນໄຫວ ໃນທົ່ວ ແຂວງ ຊຽງຂວາງ.
ສືບເນື່ອງມາຈາກ ການທີ່ ສານອາຍາ ແຂວງ ຊຽງຂວາງ ຂອງລາວ ໄດ້ຕັດສິນ ລົງໂທດ ຈໍາຄຸກ ຊາວມົ້ງ 14 ຄົນ ແຕ່ 1 ປີ ຫາ 18 ປີ ແລະ ທັງປັບໄໝ ເປັນເງິນແຕ່ 1 ລ້ານ ເຖິງ 80 ລ້ານກີບ ໃນຄວາມຜິດ ຖານມີ ອາວຸດ ສົງຄາມ ໄວ້ໃນ ຄອບຄອງ ເມື່ອ 3 ອາທິດ ຜ່ານມາ, ຈື່ງເຮັດໃຫ້ ທາງການລາວ ເກີດຄວາມ ຣະແວງວ່າ ຈະສ້າງ ຄວາມບໍ່ພໍໃຈ ຕໍ່ຊາວມົ້ງ ທີ່ອາດຈະ ພາກັນ ຕໍ່ຕ້ານ ອໍານາດ ການປົກຄອງ ພັກ-ຣັດ. ດັ່ງນັ້ນ ທາງການ ຈຶ່ງໄດ້ເຄັ່ງຄັດ ຕາມບ້ານ ຕາມເມືອງ ໃນການ ເຄື່ອນໄຫວຕ່າງໆ ເພື່ອເປັນການ ປ້ອງກັນ ເອົາໄວ້. ພົນຈັຕວາ ເສີມສຸກ ສິມພະວົງ ຮອງເລຂາ ຄະນະພັກແຂວງ ແລະ ຮອງເຈົ້າແຂວງ ຊຽງຂວາງ ຜູ້ຮັບຜິດຊອບ ດ້ານ ຄວາມໝັ້ນຄົງ ແລະ ປ້ອງກັນ ຄວາມສງົບ ເຜີຍແພ່ ຄໍາສັ່ງ ໃຫ້ ປະຕິບັດ ວຽກງານ ດັ່ງກ່າວ ຈາກ ສູນກາງ ຕລອດປີ 2013. ເຈົ້າໜ້າທີ່ ປ້ອງກັນ ຄວາມສງົບ ແຂວງ ຊຽງຂວາງ ເວົ້າວ່າ:
"ຄວາມໝາຍ ກໍແມ່ນເຮັດໃຫ້ ສະພາບ ມີຄວາມສງົບ ມີຄວາມໝັ້ນຄົງ ທາງການເມືອງ ຮັບປະກັນ ບໍ່ໃຫ້ມີ ບັນຫາ ໜໍ່ແໜງ ຫລືວ່າ ເຫດການ ທີ່ພົວພັນ ທາງການເມືອງ ເຊັ່ນການ ປະທ້ວງ ລຸກຮື ຮຽກຮ້ອງ ຕ່າງໆ ແນວໃດ ກໍແມ່ນ ພຍາຍາມ ບໍ່ໃຫ້ມັນເກີດ".
ກຸ່ມເປົ້າໝາຍ ທໍາອິດ ສໍາລັບ ການອົບຮົມ ໃນອາທິດ ທີ່ຜ່ານມາ ນັ້ນແມ່ນ ເຈົ້າເມືອງ, ຫົວໜ້າຫ້ອງການ ແລະ ກົມກອງ ອ້ອມຂ້າງ ແຂວງ ທັງໝົດ. ຕໍ່ມາ ໃນຂະນະນີ້ ກໍແມ່ນ ເຜີຍແພ່ ໃຫ້ພາກສ່ວນ ຣັດ ວິສາຫະກິດ, ບໍຣິສັດ ແລະ ນັກທຸຣະກິດ ຕ່າງໆ ຂອງລາວ ຮວມທັງ ຊາວມົ້ງ ທີ່ມາຈາກ ວຽດນາມ ຍ້ອນວ່າ ໃນຈໍານວນ 14 ຄົນ ທີ່ຖືກຕັດສິນ ນັ້ນມີ ຊາວມົ້ງ ວຽດນາມ 1 ຄົນ. ພ້ອມກັນນັ້ນ ທາງການລາວ ກໍປະສານງານ ກັບທາງການ ວຽດນາມ ເພື່ອ ບໍ່ໃຫ້ເກີດ ເຫດການ ຄວາມບໍ່ສງົບ, ເນື່ອງຈາກວ່າ ທາງການລາວ ເຊື່ອວ່າ ຍັງມີ ເຄືອຂ່າຍ ຂອງຊາວມົ້ງ ກໍາລັງ ເຄື່ອນໄຫວ ແບບລັບໆ ທັງຢູ່ລາວ ແລະ ວຽດນາມ ໃນເວລານີ້.
