ລາວໂຮມລາວ ເພື່ອປະຊາທິປະໄຕ

ການສໍ້ຣາສ ບັງຫລວງ ຢູ່ຕາມ ກະຊວງ ຕ່າງໆ

ທາງການລາວ ບໍ່ສາມາດ ຄວບຄຸມ ພຶດຕິກັມ ຄວາມ ບໍ່ຊື່ສັດ ຂອງ ພະນັກງານ ຂອງຕົນໄດ້.

ຈົນເຖິງ ປັດຈຸບັນນີ້ ຣັຖບານ ລາວ ກໍຍັງ ບໍ່ສາມາດ ຄວບຄຸມ ຄວາມ ບໍ່ຊື່ສັດ ຫລື ຄວາມບໍ່ໂປ່ງສັຍ ຂອງ ພະນັກງານ ຂອງຕົນໄດ້ ເຖິງຈະມີ ຫາງສຽງ ຈາກ ມວນຊົນ ໃນລາວ ກ່ຽວກັບ ເຣື້ອງ ທຸຈຣິດ ຫລື ການສໍ້ຣາສ ບັງຫລວງ ຢູ່ຕາມ ກະຊວງ ຕ່າງໆ ໂດຍສະເພາະ ກະຊວງ ການເງິນ ທີ່ເຮັດໃຫ້ ເງິນບໍ່ເຂົ້າ ງົບປະມານ ຕາມແຜນການ ຂະນະທີ່ ທາງການ ປະກາດວ່າ ໄດ້ອົບຮົມ ແລະ ເອົາຜູ້ ເຮັດຜິດ ມາລົງໂທດ ຕາມກົດໝາຍ ແລ້ວກໍຕາມ. ກ່ຽວກັບ ບັນຫານີ້ ເຈົ້າໜ້າທີ່ ຜແນກ ນິຕິກັມ ກະຊວງ ການເງິນ ຂອງລາວ ທ່ານນຶ່ງ ເວົ້າວ່າ:

"ຜູ້ທີ່ດື້ ກໍມີຫລາຍ ຜູ້ທີ່ມັນ ບໍ່ຢາກຟັງເຫດ ຟັງຜົນ ມີຫລາຍ ເພາະວ່າ ໃນເມື່ອ ຂະເຈົ້າ ເຮັດແບບເຖື່ອນ ຫລືວ່າ ເຮັດແບບ ຜິດກົດໝາຍ ເຮັດແບບນີ້ ໄດ້ເງິນໄວ ມັນຫລາຍ ແຕ່ວ່າ ເຮັດຖືກ ກໍໄດ້ໜ້ອຍ".

ທ່ານເວົ້າ ຕໍ່ໄປວ່າ ໃນທຸກມື້ນີ້ ເຣື່ອງທຸຈຣິດ ຂອງ ພະນັກງານ ຣັດ ເປັນບັນຫາ ສໍາຄັນ ໃນອັນດັບ ຕົ້ນໆ ແລະ ບັນຫານີ້ ມີມາແຕ່ ດົນແລ້ວ ເພາະປະເທດ ລາວ ມີເສຖກິດ ທີ່ບໍ່ຄ່ອຍ ໝັ້ນຄົງ, ພະນັກງານ ໄດ້ເງິນເດືອນ ໜ້ອຍ ບໍ່ກຸ້ມກິນ, ເຖິງແມ່ນວ່າ ຈະມີການ ຂຶ້ນເງິນເດືຶອນ ໃຫ້ແລ້ວ ກໍຕາມ ພ້ອມກັນນັນ ຍັງມີບັນຫາ ຄົນທຸກຍາກ, ດັ່ງນັ້ນ ຈຶ່ງເປັນເຣື່ອງ ປົກກະຕິ ຫາກມີການ ທຸຈຣິດ ໃນໝູ່ ພະນັກງານ ທຸກຣະດັບ ຢູ່ລາວ.

ເຈົ້າໜ້າທີ່ ເວົ້າອີກວ່າ ການທີ່ ພະນັກງານ ບໍ່ວ່າຈະເປັນ ພະນັກງານ ຣັດ ຫລື ເອກກະຊົນ ທີ່ທຸຈຣິດ ຕໍ່ໜ້າທີ່ ນັ້ນສາມາດ ເກີດຂຶ້ນໄດ້ ທຸກແຫ່ງ ບໍ່ແມ່ນແຕ່ ສະເພາະ ໃນລາວ ເທົ່ານັ້ນ ແຕ່ຂຶ້ນຢູ່ ກັບວ່າ ຣັຖບານ ຂອງປະເທດ ນັ້ນໆຈະ ປະຕິບັດ ມາຕການ ເດັດຂາດ ຕໍ່ພະນັກງານ ໜ້ອຍຫລາຍ ພຽງໃດ ເພື່ອຍຸຕິ ເຣຶ່ອງນີ້.