ບ້ານພັກ ຫາດດອນຈັນ ຂອງ ASEM ລາວຕົ້ມເຈັກ ຫລືເຈັກຈະຕົ້ມລາວ?ໂດຍ: ລູກດອນໂຂງຍ້ອນພັກລັດ ແຫ່ງ ສປປລ ຢາກໄດ້ໜ້າ ຢາກໄດ້ຕາ ເລີຍອາໄສ ຈີນ ປຸກບ້ານຮັບແຂກ ວິນລາ 50 ຫລັງ ແລະໂຮງແຮມຊັ້ນຍອດ ນຶ່ງຫລັງຢູ່ຫາດ ດອນຈັນ ແລະທຸ້ມເທເງິນເຖິງ 240 ຕື້ກີບ, ໃນນັ້ນ 40% ຫລື 96 ຕື້ກີບຊື້ ຍວດຍານພາຫານະ. ແຕ່ເມື່ອບໍ່ນານມານີ້ ທາງການລາວ ກໍ່ໄດ້ຂາຍຣົດໃນລັກ ສນະປະມູນ ອັນມີຣົດ ເບັ໋໋ນຊ໌ຈໍານວນ 105 ຄັນແລະຣົດ ໂຕໂຢຕາ ແຄມຣີ 62 ຄັນຊຶ່ງທັງໝົດ ຜລິດໃນປີ 2012 ນີ້, ນອກນັ້ນ ກໍ່ຍັງມີ ຣົດເບັ໋ນຊ໌ ປີ 2004 ອີກ 15 ຄັນ.ແຕ່ແທນທີ່ຈະໄດ້ໜ້າໄດ້ຕາ ແລະຖືກຍົກຍ້ອງຈາກ ສາກົລ ຈາກການຈັດພິທີອັນໃຫຍ່ໂຕ ເກີນຄວາມສາມາດຂອງຊາດຕົນນັ້ນ, ແຕ່ທຸກຢ່າງມັນກົງກັນຂ້າມກັບຄວາມຄາດຫວັງ ຂອງພວກຜູນໍາຜເດັດການ ໃນເມື່ອທາງການ ສປປ ລາວໄດ້ເຮັດໃຫ້ທ່ານ ສົມບັດ ສົມພອນ ຫາຍສາບສູນ ໂດຍມີພະຍານຫລັກຖານ ຢ່າງຊັດແຈ້ງ ຈາກຮູບຂອງກ້ອງວົງຈອນປິດ, ອັນເປັນເຫດໃຫ້ ພັກລັດແຫ່ງສປປລ ກືນບໍ່ເຂົ້າ ຄາຍບໍ່ອອກ ແລະກໍາລັງຖືກຕີກະນໍ່າ ໃຫ້ເຂົ້າທ່າ ຈົນຕາແຈ ຈາກອົງການຈັດຕັ້ງ ສາກົລ ທະວີຂຶ້ນທຸກໆມື້.ເວົ້າເຖິງບ້ານພັກ ຫາດດອນຈັນ, ມາເຖິງປັດຈຸບັນ ກໍ່ກໍາລັງກາຍເປັນ ບ້ານຜີ ເພາະບໍ່ມີຄົນເຂົ້າໄປຢູ່ເລີຍ. ຕາມການຄາດຄະເນຂອງພວກ ຈີນ ທີ່ລົງທຶນປຸກສ້າງ, ພວກເຂົາຄິດວ່າ ຫລັງຈາກກອງປະຊຸມ ASEM ສິ້ນສຸດລົງແລ້ວ, ຈະມີຄົນມາຊື້ເຮືອນ ວິນລາ ແລະຈະມີນັກທ່ອງທ່ຽວຈໍານວນຫລວງຫລາຍ ມາພັກເຊົາຢູ່ໂຮງແຮມອັນ ຫລູຫລາ. ແຕ່ຕົວຈິງມັນກົງກັນຂ້າມໝົດ, ພວກເຂົາປະກາດຂາຍເຮືອນ ວິນລາ ຫລັງລະ ສອງລ້ານ ໂດລາ (US$ 2.000.000.00). ເຖິງວ່າໄດ້ມີນາຍທຶນຕ່າງຊາດ ເປັນຈໍານວນຫລວງຫລາຍ ພາກັນຫລຸຫລັ່ງທັ່ງເທກັນເຂົ້າໄປລົງທຶນ ເພື່ອປຸ້ນສະດົມເອົາ ຊັພຍາກອນທັມຊາດ ອັນອຸດົມສົມບຸນຢູ່ໃນດິນດອນຂອງ ລາວ ແລະຊື້ຈ້າງຈອບອອຍ ເຮັດໃຫ້ພວກຜູ້ນໍາ ຂາຍຊາດຂອງທາງການ ລາວ ລໍ້າລວຍກັນຂຶ້ນຢ່າງ ອະຍັມທັນຕາ, ແຕ່ທັງພວກນາຍທຶນ ແລະຜູ້ນໍາທີ່ຮັ່ງມີຂອງລາວ ບໍ່ຊື້ເຮືອນທີ່ມີ ຣາຄາແພງເຖິງ ສອງລ້ານ ໂດລານັ້ນ. ເຫດຜົນອັນສໍາຄັນກ່ວານັ້ນແມ່ນ ອາຍຸ ການຂອງສັນຍາສໍາປະທານ. ໃນຕົວຈິງແລ້ວ, ດິນຫາດດອນຈັນ ແມ່ນຊັບສົມບັດ ອັນຖືກຕ້ອງຕາມກົດໝາຍຂອງ ປະຊາຊົນລາວ ກໍາແພງນະຄອນວຽງຈັນ, ສ່ວນຫລາຍແມ່ນຂອງຊາວບ້ານ ທາດຂາວ. ແຕ່ໃນຣະຍະບໍ່ດົນຜ່ານມານີ້, ອໍານາດການປົກຄອງພັກ ລັດ ໄດ້ໃຊ້ອໍານາດຢຶດເອົາຂອງປະຊາຊົນ ຫລືໃຫ້ຄ່າຊົດເຊີຍແບບບໍ່ສົມເຫດສົມຜົນ ແລ້ວເອົາດິນນັ້ນໄປໃຫ້ນາຍທຶນຕ່າງປະເທດ ສໍາປະທານ ໂດຍທີ່ພວກຜູ້ນໍາພັກລັດທີ່ມີສິດ ມີອໍານາດກ່ຽວຂ້ອງກັບການໃຫ້ ສໍາປະທານທີ່ດິນຫາດດອນ ຈັນນີ້ ໄດ້ຮັບສິນບົນ ຫລືເງິນໃຕ້ໂຕະໃນລັກສນະ ເງິນອອຍລີງ ຄ່າຂາຍຊາດ ເປັນຈໍານວນມະຫາສານ. ດິນທີ່ໃຫ້ຈີນ ປຸກບ້ານພັກໃນໂຄງການ ASEM ນີ້ມີອາຍຸສັນຍາ ສໍາປະທານຢູ່ 30 ປີ. ການທີ່ຄົນບໍ່ໄປຊື້ເຮືອນນີ້ກໍ່ເພາະວ່າ: 1. ເຮືອນນີ້ ມີຣາຄາແພງເກີນໄປ ( ສອງລ້ານ ໂດລາ ) ແລະ 2. ສິ່ງທີ່ເຈົ້າຂອງເຮືອນຢ້ານຫລາຍກ່ວາແມ່ນ ຈະມີບັນຫາອັນຄາດຄິດບໍ່ເຖິງ ເກີດຂຶ້ນພາຍໃນ ສາມສິບປີຂ້າງໜ້າ ເມື່ອສັນຍາສໍາປະທານໝົດອາຍຸແລ້ວ ເພາະວ່າທຸກຄົນກໍ່ຮູ້ດີ ເຖິງຄວາມບໍ່ແນ່ນອນຂອງສະພາບການໃນປະເທດລາວ ຊຶ່ງພວກຜູ້ນໍາຜເດັດການ ພັກລັດ ເປັນໂຈນທັງໝົດຄນະ. ຄົນລາວນອກທີ່ເມືອຢາມບ້ານເກີດ ຫລືຊາວຕ່າງປະເທດທີ່ໄປທ່ອງທ່ຽວຢູ່ວຽງຈັນ ຕ່າງກໍ່ອອນຊອນນໍາຄວາມສະງ່າງາມ ຂອງໂສມໜ້າໂຮງແຮມອັນຫລູ ຫລາ ແລະເຮືອນວິນລາອັນງົດງາມ ເມື່ອມອງຈາກຫ່າງໄກ ຍາມກາງເວັນ, ແຕ່ໜ້ອຍຄົນ ທີ່ຈະຮູ້ເຖິງຄວາມເປັນຈິງໃນເຮືອນວິນລານັ້ນ ໃນຍາມກາງຄືນທີ່ຂາດຄົນຢູ່, ບໍ່ມີໄຟໄຕ້ຂ້າງໃນ ແລະເປັນບ່ອນຢູ່ຂອງຜີ. ເຊັ່ນດຽວກັບຂ້າງໃນຂອງໂຮງແຮມອັນ ຫລູ ຫລາ ທີ່ອ້າງວ້າງ ຂາດແຂກເຂົ້າມາພັກເຊົາ. ການທີ່ບໍ່ມີຄົນໄປເຊົ່າໂຮງແຮມ ອັນຫລູ ຫລານີ້ ກໍ່ຍ້ອນວ່າຣາຄາແພງ ແລະແຂ່ງຂັນກັບບ້ານຮັບແຂກ ຫລືໂຮງແຮມນ້ອຍທີ່ມີຢູ່ຢ່າງຫລວງຫລາຍ ແລະຣາຄາຖືກກ່ວານັ້ນ ບໍ່ໄດ້. ສະພາບແບບນີ້, ຖ້າສຶກສາເບິ່ງໃນແງ່ຕື້ນໆແລ້ວ, ເຫັນວ່າເປັນລັກສນະ ລາວຕົ້ມເຈັກ ແຕ່ຖ້າສຶກສາເບິ່ງເລິກໆແລ້ວເຫັນວ່າ ເຈັກຈະຕົ້ມລາວ ໃນອະນາຄົດ. ເປັນຫຍັງຈິ່ງຕີຣາຄາແນວນັ້ນ? ໂຄງການບ້ານພັກຫາດດອນຈັນ ຫາກໍ່ມີອາຍຸພຽງແຕ່ ສີ່ເດືອນ ຊຶ່ງຝ່າຍເປັນ ຈີນ ຜູ້ລົງທຶນຖືວ່າຢູ່ໃນຣະຍະ ໃຫ້ໂອກາດ. ອີກບໍ່ດົນ, ຖ້າຫາກບໍ່ທັນມີຄົນຊື້ ແລະສະພາບການຍັງເໝືອນເດີມ, ຝ່າຍ ຈີນ ຈະມີແຜນການໃໝ່ຢ່າງແນ່ນອນ ເພາະຈີນກໍາລັງຢູ່ໃນທ່າ ບຸກ ຕາມແນວທາງຂອງ ລັດທິແຜ່ຂຍາຍອໍານາດຊາດ ໃຫຍ່ ຈີນ. ຕໍ່ໄປຄົນຈີນເອງ ຈະເປັນຜູ້ຢຶດເອົາໝົດທຸກຊິ້ນສ່ວນຂອງບ້ານພັກຫາດດອນຈັນນີ້, ແລ້ວເຂົາກໍ່ຈະສົ່ງຄົນທີ່ລົ້ນແຜ່ນດິນນັ້ນລົງມາຢູ່ເຊັ່ນດຽວກັບໂຄງການອື່ນໆຂອງ ຈີນ ໃນປະເທດລາວ ຊຶ່ງຄົນລາວທຸກຄົນກໍ່ເຫັນກັບຕາແລ້ວວ່າ ຄົນລາວ ກໍາລັງກາຍເປັນພົລເມືອງ ຊັ້ນສອງ ໃນປະເທດຂອງຕົນເອງ.
