ເຈົ້າຂອງ ຮ້ານຂາຍນໍ້າ ໃນ ນະຄອນຫລວງ ວຽງຈັນ ເວົ້າວ່າ ນໍ້າດື່ມ ທີ່ຂາຍຢູ່ ຕາມຮ້ານຄ້າ ມີບັນຫາ ເຣື້ອງ ສະອາດ ແລະ ຄວາມຕ້ອງການ ກໍມີຫລາຍກວ່າ ປົກກະຕິ ພວກຣົດສົ່ງນໍ້າ ບາງຄັນ ກໍມັກງ່າຍ ຮ່າຍ ນໍ້າປະປາ ໃສ່ ກະຕຸກນໍ້າ ແທນ.
ສ່ວນທາງ ເຈົ້າໜ້າທີ່ ກວດກາ ນໍ້າ ບາງຄົນ ກໍເຮັດວຽກ ແບບລະເລີຍ ຕໍ່ໜ້າທີ່ ເລີຍມີບັນຫາ ຕາມມາ ຄືນໍ້າດື່ມ ບໍ່ສະອາດ ຈຶ່ງເກີດມີການ ຮ້ອງຮຽນ ເຣື່ອງນໍ້າດື່ມ ບໍ່ສະອາດ ຂຶ້ນມາອີກ. ເຈົ້າຊອງຮ້ານຄ້າ ເວົ້າວ່າ:
"ຍາມຮ້ອນມາ ກໍຮ່າຍນໍ້າ ປະປາໃສ່ແທ້ ລະໄປໂຮງງານ ກໍມີຫລາຍຄັນຣົດ ຫລາຍບ່ອນ ມັນກໍແຍ້ງກັນ ຫລາຍ ບໍ່ທັນກັບ ລູກຄ້າ ກໍເລີຍ ສວຍໂອກາດ ໄປຮ່າຍເອົາ ນໍ້າຕ່າງໆແຫລະ ຕາມ ທີ່ເຮົາຕ້ອງການ ໄປຂາຍ ມັນກໍມີການ ປະປົນ ກັນໄປ ບາງເທື່ອ ປະຊາຊົນ ກໍໄດ້ກິນ ເອົານໍ້ານີ້ຄື ເປັນນໍ້າສ້າງ ຂອງ ໂຮງງານນັ້ນ ໂຮງງານນີ້ ຂະເຂົ້າ ຟ້ອງຮ້ອງ ກັນມາ ມາເບິ່ງແລ້ວ ບັດນີ້, ຕົວຢ່າງ ເຈົ້າໜ້າທີ່ ກວດກາກໍບໍ່ ເຮັດຕາມໜ້າທີ່ ຂອງຕົວເອງ ເຮັດວຽກ ກວມລວມ".
ທ່ານວ່າ ບັນຫາ ນໍ້າດື່ມ ບໍ່ສະອາດ ບັນຫາ ຮ້ອງຮຽນ ເຣື່ອງນໍ້າດື່ມ ເປິເປື້ອນນີ້ ເຄີຍເກີດຂຶ້ນແລ້ວ ເທື່ອໜຶ່ງ ເມື່ອປີ 2012. ເຖິງແມ່ນວ່າ ກະຊວງ ສາທາຣະນະສຸຂ ຈະໄດ້ສົ່ງ ເຈົ້າໜ້າທີ່ ລົງກວດກາ ແລະ ສັ່ງປິດ ໂຮງງານ ຜລິດນໍ້າດື່ມ ທີ່ບໍ່ໄດ້ ມາຕຖານ ໃນແຂວງ ວຽງຈັນ ແລະ ທາງ ສະມາຄົມ ຜູ້ຜລິດນໍ້າດື່ມ ນະຄອນຫລວງ ວຽງຈັນ ໄດ້ອອກ ສະຕິກເກີ ຢັ້ງຢືນ ໃຫ້ຣົດນໍ້າ ຂອງ ບໍຣິສັດ ຕິດ ສະເພາະ ເພື່ອແກ້ໄຂ ບັນຫານໍ້າ ທີ່ບໍ່ແມ່ນ ຂອງ ບໍຣິສັດ ລັກລອບ ແລ່ນສົ່ງນໍ້າ ແລ້ວ ແຕ່ກໍຍັງມີ ຣົດສົ່ງນໍ້າ ບາງຣາຍ ເຮັດ ສະຕິກເກີ ປອມ ຕິດເອງ.
ເຈົ້າຂອງ ຮ້ານຂາຍນໍ້າ ຜູ້ດຽວກັນນີ້ ເວົ້າອີກວ່າ ເປັນການຍາກ ທີ່ຈະໃຫ້ທາງ ພາກຣັຖ ເອົາໃຈໃສ່ ໃນເຣື່ອງນີ້ຕື່ມ ຍ້ອນວ່າ ຖ້າມີບັນຫາ ຮ້ອງຮຽນ ເຣື່ອງ ຄຸນນະພາບ ນໍ້າ ຢູ່ເລື້ອຍ ກໍຈະກະທົບ ຕໍ່ການຂາຍ ນໍ້າດື່ມ ຂອງ ຮ້ານຕ່າງໆ ທົ່ວໄປ ແຕ່ເຣື່ອງທີ່ວ່າ ກະທົບໃສ່ ສຸຂພາບ ຂອງ ປະຊາຊົນ ນີ້ລະ ເປັນເຣື່ອງສໍາຄັນ.
