ລາວ-ສະຫະຣັດ ເພີ້ມຄວາມໃກ້ຊິດ

ສປປລາວ ແລະ ສະຫະຣັຖ ອະເມຣິກາ ເສີມສ້າງ ຄວາມສຳພັນ ຣະຫວ່າງ ສອງປະເທດ ໃຫ້ ແໜ້ນແຟ້ນ.

ທ່ານ Ike Reed ຫົວຫນ້າ ຫ້ອງການ ກິຈການເອເຊັຽ ກະຊວງ ຕ່່າງປະເທດ ສະຫະຣັຖ ໄດ້ເດີນທາງ ມາຢ້ຽມຢາມ ສປປລາວ ຣະຫວ່າງ ວັນທີ 2 ຫາ 4 ເມສາ 2013 ເພື່ອທົບທວນ ຖານະ ຄວາມຮ່ວມມື ຣະຫວ່າງ ສະຫະຣັຖ ກັບ ສປປລາວ ດ້ວຍການ ພົບປະກັບ ເຈົ້າຫນ້າທີ່ ຣະດັບສູງ ຂອງລາວ ຫລາຍທ່ານ ແລະ ຄູ່ຮ່ວມ ການພັທນາ ໃນລາວ.

ອິງຕາມຂ່າວ ຈາກ ສະຖານທູດ ສະຫະຣັຖ ປະຈຳລາວ. ທ່ານ ຣີດ ເປັນເຈົ້າຫນ້າທີ່ ຣະດັບສູງ ຂອງ ກະຊວງ ຕ່າງປະເທດ ສະຫະຣັຖ ທີ່ເຮັດວຽກ ໂດຍກົງ ກ່ຽວກັບ ກິຈກັມ ໃນລາວ ການຢ້ຽມຢາມ ຂອງ ທ່ານ ຖືວ່າສຳຄັນ ເພື່ອຍົກຣະດັບ ພັນທະ ກໍຣະນີ ກັບລາວ ໃຫ້ແຫນ້ນແຟ້ນ ຂື້ນກວ່າເກົ່າ ໂດຍສະເພາະ ທາງດ້ານການ ຊ່ອຍເຫລືອລາວ ແລະ ການສົ່ງເສີມ ຄວາມສຳພັນ ປະເພດອື່ນໆ.

ໃນຊ່ວງການຢ້ຽມຢາມ ທ່ານ ຣີດ ໄດ້ໃຫ້ຄວາມສົນໃຈ ເປັນພິເສດ ກ່ຽວກັບ ການຊ່ອຍເຫລືອ ລາວ ໃນປັດຈຸບັນ ແລະ ໃນອະນາຄົດ ໂດຍສະເພາະ ໃນບັນຫາ ການເກັບກູ້ ຣະເບີດ ທີ່ບໍ່ທັນແຕກ ແລະ ໃນໂຄງການ ບຳບັດ ຜູ້ປະສົບ ເຄາະຮ້າຍ ຈາກຣະເບີດ ດັ່ງກ່າວ ຮ່ວມດ້ວຍ ໂຄງການ ຄວບຄຸມ ການຜລິດ ແລະ ຄ້າ ຢາເສບຕິດ ການປົກປ້ອງ ສັດປ່າ ໂຄງການປັບປຸງ ສານອາຫານ ແລະ ສຸຂອະນາມັຍ ໃນລາວ.

ທ່ານຣີດ ໄດ້ພົບກັບ ທ່ານ ສຸທັມ ສາກົນນີນຫອມ ເອກອະທິບໍດີ ຫ້ອງການ ຢູໂຣບ ແລະ ອະເມຣິກັນ ກະຊວງ ຕ່າງປະເທດລາວ ທັງສອງໄດ້ ໂອ້ລົມກັນ ໃນຫລາຍບັນຫາ ຂອງ ການຮ່ວມມື ທີ່ຮ່ວມດ້ວຍ ຜົລປໂຍດ ຂອງ ທັງສອງຝ່າຍ.