ຊາວຫົວພັນ ຮັບໄດ້ ຖ້າຫາກວ່າ ມີການສ້າງ ໂຮງງານ ອຸດສາຫະກັມ ພາຍໃນ ແຂວງ ແຕ່ຕ້ອງມີ ການສຶກສາ ຜົລກະທົບ ຢ່າງລະອຽດ.
ປະຊາຊົນ ແຂວງຫົວພັນ ເວົ້າວ່າ ຖ້າຫາກວ່າ ມີນັກລົງທຶນ ມາສ້າງ ໂຮງງານ ອຸດສາຫະກັມ ຢູ່ແຂວງຫົວພັນ ໃນອະນາຄົດ ກໍຮັບໄດ້, ແຕ່ຢາກໃຫ້ ມີການສຶກສາ ຜົລກະທົບ ຢ່າງຈິງຈັງ ເພື່ອຫລີກລ້ຽງ ຜົລກະທົບ ຕໍ່ ສິ່ງແວດລ້ອມ ແລະ ຊີວິດ ການເປັນຢູ່ ຂອງ ປະຊາຊົນ.
“ໂຮງງານ ອຸດສາຫະກັມ ນີ້ ຄັນພໍ ເປັນໄປໄດ້ ກໍຮັບ ແຕ່ວ່າ ມັນຕ້ອງມີ ເອກສານ ຮອບດ້ານ ທຸກຢ່າງ ຄົບວົງຈອນ ເພາະຢ້ານມັນ ຈະເກີດບັນຫາ ມົນລະພິດບໍ່ ຫລືວ່າ ສິ່ງກະທົບ ຕໍ່ສັງຄົມ ໃນອະນາຄົດ.”
ແຂວງຫົວພັນ ບໍ່ທັນມີ ໂຮງຈັກ ໂຮງງານ ຫລາຍເທື່ອ ແຕ່ປະຊາຊົນ ທີ່ອາສັຍຢູ່ ແຄມນ້ຳມາ ເຂດເມືອງຊຽງຄໍ້ ແລະ ເມືອງສົບເບົາ ໄດ້ຮັບຜົລກະທົບ ຈາກການດູດຊາຍ ແລະ ການຜລິດເຍື່ອເຈັ້ຍ ຂອງວຽດນາມ ທີ່ໄດ້ຖິ້ມ ສານເຄມີ ລົງໃສ່ແມ່ນ້ຳ ເຮັດໃຫ້ເກີດ ມົລພິດ.
ທ່ານ ກ່າວຕື່ມວ່າ ຖ້າຫາກມີ ການສ້າງ ໂຮງງານ ອຸດສາຫະກັມ ໂດຍບໍ່ໄດ້ ມີການຄວບຄຸມ ຢ່າງລະອຽດ ກໍຈະສົ່ງ ຜົລເສັຍ ຕາມມາ ຢ່າງແນ່ນອນ ຄືກັນກັບ ແຂວງອື່ນໆ ທີ່ໂຮງງານ ອຸດສາຫະກັມ ໄດ້ປ່ອຍຄວັນ ແລະ ນ້ຳເສັຍ ລົງສູ່ນ້ຳ ທັມມະຊາດ ແລ້ວເກີດຜົລ ກະທົບ ຕໍ່ປະຊາຊົນ ແລະ ສິ່ງແວດລ້ອມ, ແຕ່ ທ່ານ ກໍບໍ່ຢາກໃຫ້ ການລົງທຶນ ປະເພດນີ້ ມີຫລາຍ ຈົນເກີນໄປ.
ເຖິງຢ່າງໃດ ກໍຕາມ, ໃນອະນາຄົດ ອັນໃກ້ໆນີ້ ແຂວງຫົວພັນ ອາດມີການ ສ້າງໂຮງງານ ຕ່າງໆຂຶ້ນ ເນື່ອງຈາກ ເມື່ອບໍ່ດົນມານີ້ ທາງແຂວງໄດ້ ເປີດ ໂຄງການ ສ້າງສນາມບິນ ຢູ່ເມືອງຊຳເໜືອ, ຊຶ່ງເປັນສັນຍານ ທີ່ບົ່ງບອກວ່າ ທາງແຂວງ ກຳລັງ ຍົກຣະດັບ ທາງດ້ານ ເສຖກິຈ ເພື່ອຮອງຮັບ ນັກລົງທຶນ ຕ່າງຊາດ ທີ່ເຂົ້າມາ ລົງທຶນ.
