ລາວແລະໄທ ພ້ອມທີ່ຈະ ຮ່ວມປະຊຸມ ຢ່າງບໍ່ເປັນ ທາງການ ເປັນ ຄັ້ງທີ 2 ໃນກາງເດືອນ ພຶສພາ ທີ່ ຈະມາເຖິງນີ້. ຕາມຣາຍງານ ຈາກ ບາງກອກ ປະເທດໄທ.
ຍານາງ ຍິ່ງລັກ ຊິນນະວັຕ ນາຍົກ ຣັຖມົນຕຣີໄທຍ ສະແດງ ຄວາມຍິນດີ ເມື່ອ ວັນອັງຄານ ຕ້ອນຮັບ ຍານາງ ປານີ ຢາທໍ່ຕູ້ ປະທານ ສະພາ ແຫ່ງຊາຕ ສປປ ລາວ ທີ່ໄປຢ້ຽມຢາມ ປະເທດໄທ ຢ່າງເປັນ ທາງການ ໃນນາມແຂກ ຂອງ ຣັຖສະພາໄທ.
ນາຍົກ ຣັຖມົນຕຣີ ຍິ່ງລັກ ໄດ້ເວົ້າເຖິງ ການພົວພັນ ທີ່ຂຍາຍຕົວ ແລະ ໃກ້ຊິດ ຣະຫວ່າງ ໄທ ແລະ ລາວ ຊຶ່ງຈະເຫັນໄດ້ ຈາກການແລກປ່ຽນ ການຢ້ຽມຢາມ ຊຶ່ງກັນແລະກັນ ຢູ່ເປັນປະຈໍາ ຂອງຜູ້ນໍາ ຣັຖບາລ ແລະ ເຈົ້າໜ້າທີ່ ຂອງ ທັງ 2 ປະເທສ. ການຢ້ຽມຢາມ ໄທ ຂອງ ຍານາງ ປານີ ປັດຈຸບັນ ເປັນໂອກາດ ໃຫ້ປະເທດ ເພື່ອນບ້ານ ທັງ 2 ໄດ້ປຶກສາ ຫາລືກັນ ກ່ຽວກັບ ອົງການ ນິຕິບັນຍັດ ແລະ ບັນຫາ ກົດໝາຍ ທີ່ພົວພັນ ກັບການ ກໍ່ໃຫ້ເກີດ ປະຊາຄົມ ເສຖກິດ ອາຊຽນ ໃນ ປີ 2015.
ພ້ອມກັນນັ້ນ ນາຍົກ ຣັຖມົນຕຣີໄທ ຍັງໄດ້ ສະແດງ ຄວາມຫວັງວ່າ ຈະໄດ້ຮັບຕ້ອນ ທ່ານ ທອງສິງ ທັມມະວົງ ນາຍົກ ຣັຖມົນຕຣີ ລາວ ແລະ ພັລຍາ ທີ່ ຈະຢ້ຽມຢາມ ຊຽງໃໝ່ ໃນໂອກາດ ເຂົ້າຮ່ວມ ກອງປະຊຸມ ຢ່າງບໍ່ເປັນ ທາງການ ຮ່ວມກັນ ຄັ້ງທີ 2 ຊຶ່ງຈະຈັດຂຶ້ນ ໃນວັນທີ 9 ພຶສພາ ແລະ ກອງປະຊຸມ ສຸດຍອດ ກ່ຽວກັບ ນໍ້າ ເອເຊັຍ-ປາຊີຟິກ ທີ່ຈະຈັດຂຶ້ນ ໃນວັນທີ 20 ພຶສພາ 2013 ນີ້.
