ຊາວລາວຕ້ອງການ ສິທທິຫຼາຍກວ່ານີ້

ປະຊາຊົນ ລາວ ຮຽກຮ້ອງ ສິດທິ ແລະ ເສຣີພາບ ຂອງຕົນ ຈາກ ຣັຖບານ ເພີ້ມຂຶ້ນ.

ຄົນລາວ ທ່ານນຶ່ງ ເວົ້າວ່າ ຊາວລາວ ສ່ວນໃຫຍ່ ຢາກໃຫ້ ຣັຖບານ ອະນຸຍາດ ໃຫ້ ປະຊາຊົນ ສາມາດ ຮຽກຮ້ອງ ຂໍ້ຂ້ອງໃຈ ຜ່ານ ສື່ມວນຊົນ ແທນທີ່ ຈະໃຫ້ສົ່ງຜ່ານ ສາຍດ່ວນ ຂອງ ຣັຖບານ ແຕ່ຢ່າງດຽວ ສິ່ງທີ່ ພວກຂະເຈົ້າ ຕ້ອງການຫລາຍ ທີ່ສຸດ ກໍຄື ຢາກເຫັນ ຣັຖບານ ມີຄວາມໂປ່ງໄສ ກ່ຽວກັບ ການຈ່າຍ ງົບປະມານ ຂອງຊາດ, ລົງໂທດ ຜູ້ສໍ້ຣາສ ບັງຫລວງ ແລະ ມີການເລືອກຕັ້ງ ຢ່າງເສຣີ. ດັ່ງທ່ານກ່າວ ໃນຕອນນຶ່ງວ່າ:

"ມັນກໍຈະດີຂຶ້ນ ເພາະຢ່າງນ້ອຍ ບັນດາ ຊາດຕ່າງໆ ຮູ້ຈັກ ເຣື້ອງຣາວວ່າ ຣະຫວ່າງ ເຈົ້າຫນ້າທີ່ຣັຖ ກັບ ປະຊາຊົນ ມີການເຊື່ອຖື ຣະຫວ່າງກັນ ເຂົາກໍຈະໄດ້ ຫລຸດຄວາມຂັດແຍ່ງ ພາຍໃນ ຣະຫວ່າງ ຣັຖບານ ກັບ ປະຊາຊົນ".

ທ່ານກ່າວ ຕໍ່ໄປວ່າ ກ່ຽວກັບ ສາຍດ່ວນ ທີ່ ປະຊາຊົນ ໂທໄປ ສະແດງ ຄວາມເຫັນນັ້ນ ເຖິງແມ່ນວ່າ ຈະມີການ ຮັບເຣື້ອງ ຮ້ອງຮຽນ ໄປແລ້ວ ແຕ່ບັນຫາ ກໍຍັງ ບໍ່ຖືກແກ້ໄຂ ເພາະຂາດ ຫນ່ວຍງານ ຕິດຕາມ ໂດຍສ່ວນໂຕ ຄິດວ່າ ຣັຖບານ ມີແຜນການ ຢາກ ຕົບຕາ ຕ່າງປະເທດ ທີ່ວ່າ ໂຄງການພັທນາ ຕ່າງໆໃນລາວ ມີທຸກພາກສ່ວນ ເຂົ້າຮ່ວມນຳ ໃນການແສດງ ຄວາມຄິດ ຄວາມເຫັນ ເປັນການ ປົກຄອງ ໂດຍ ປະຊາຊົນ ເພື່ອ ປະຊາຊົນ ແລະ ຮັບໃຊ້ ປະຊາຊົນ. ທ່ານວ່າ ບັນຫາ ທີ່ຫນ້າເປັນຫ່ວງ ທີ່ສຸດ ໃນເວລານີ້ ກໍແມ່ນ ບັນຫາ ການສໍ້ຣາສ ບັງຫລວງ ທີ່ ປະຊາຊົນ ບໍ່ສາມາດ ສະແດງ ຄວາມຄິດເຫັນ ກ່ຽວກັບ ເຣື້່ອງນີ້ໄດ້ ທ່ານກ່າວເພີ້ມວ່າ:

"ບໍ່ສາມາດ ຈະເປີດເຜີຍ ໃນການ ພັທນາເສຖກິດ ບາງຄັ້ງ ມັນ ຄໍຣັບຊັນ ຫລາຍໂພດ ເລີ້ມ ແຕ່ຣັຖບານ ມາຮອດ ກົມການເມືອງ ມາຮອດ ເຈົ້າແຂວງ ເຈົ້າເມືອງ ລ້ວນແຕ່ ຮັບສິນບົນ ທັງສິ້ນ ຜູ້ໃດເປີດເຜີຍ ຜູ້ນັ້ນຈະຖືກ ຕັດອອກຈາກ ການເຮັດວຽກ".

ຊາວລາວທ່ານນັ້ນ ເວົ້າວ່າ ຖ້າຣັຖບານ ຫາກ ອະນຸຍາດ ໃຫ້ ປະຊາຊົນ ສາມາດເປີດເຜີຍ ຂໍ້ຂ້ອງໃຈ ຕ່າງໆອອກມາ ສູ່ສັງຄົມໄດ້ ຢ່າງເສຣີ ບັນຫາຕ່າງໆ ໃນລາວ ກໍຈະຜ່ອນຄາຍ ລົງໄດ້.