ລາວໂຈະໃຊ້ດິນ ປູກຢາງພາລາ

ອົງການ ທີ່ ບໍ່ສັງກັດ ຣັຖບາລ ຫຼື NGO ສນັບສນູນ ເຫັນພ້ອມນໍາ ທາງການລາວ ທີ່ ປະກາດ ໂຈະ ການໃຫ້ ສໍາປະທານ ທີ່ດິນ ປູກ ຢາງພາລາ ແລະໄມ້ວິກ.

ອົງການ ທີ່ບໍ່ສັງກັດ ຣັຖບາລ ດ້ານ ສິ່ງແວດລ້ອມ ເຫັນພ້ອມນໍາ ການປະກາດ ຂອງ ກະຊວງ ກະສິກັມ ແລະປ່າໄມ້ ຂອງລາວ ເມື່ອວັນທີ 8 ເມສາ 2013 ກ່ຽວກັບ ການໂຈະ ອະນຸມັດ ທີ່ດິນ ຊົ່ວຄາວ ສໍາລັບ ໂຄງການ ປູກຢາງພາລາ ແລະ ໄມ້ວິກ ໃນທົ່ວປະເທດ, ເພື່ອສຶກສາ ຂໍ້ມູນ ໃຫ້ຄັກແນ່ ເຖິງຜົນກະທົບ ຕໍ່ສິ່ງແວດລ້ອມ, ບັນຫາ ການຂາດ ແຮງງານ ແລະ ຄວາມຕ້ອງການ ຂອງຕລາດ.

ເຈົ້າໜ້າທີ່ ອົງການ ດັ່ງກ່າວ ເຫັນວ່າ ປະເທດລາວ ໜ້າຈະເໝາະສົມ ກັບການປູກພືດ ຢ່າງອື່ນ ທີ່ໃຊ້ເນື້ອທີ່ ໜ້ອຍ ແທນທີ່ ຈະປູກພືດ ທີ່ໃຊ້ເນື້ອທີ່ ຫລາຍ ເຊັ່ນ ຢາງພາລາ ຊຶ່ງຈະຕ້ອງ ໄດ້ລົງທຶນຫລາຍ ແລະ ຊາວກະສິກອຣ ຈະບໍ່ສາມາດ ແຂ່ງຂັນ ເຣື່ອງຣາຄາ ກັບ ໂຄງການ ຂນາດໃຫຍ່ໄດ້:

"ຣັຖບານຄຸ້ມຄອງ ປູກຢາງພາລາ ເປັນໂອກາດ ກໍວ່າໄດ້ຄືກັນ ເພາະວ່າຄົນໜ້ອຍ ຜລິດ ຈໍານວນຫລາຍ ແຂ່ງໝູ່ ໃນພູມີພາກ ກໍສິບໍ່ໄດ້ ເນາະ".

ທ່ານເວົ້າຕື່ມວ່າ ໃນຊ່ວງ ຫລາຍປີ ຜ່ານມານີ້ ຣັຖບາລລາວ ໄດ້ໃຫ້ຕ່າງ ປະເທດ ສໍາປະທານ ປູກພືດ ອຸດສາຫະກັມ ຂນາດໃຫຍ່ ເປັນຈໍານວນ ຫລວງຫລາຍ ເຊັ່ນ ປູກຢາງພາລາ, ຕົ້ນວິກ, ປູກອ້ອຍ. ແຕ່ມີບັນຫາ ຕາມມາ ຄືປະຊາຊົນ ຈໍານວນຫລາຍ ບໍ່ມີທີ່ດິນ ທໍາກິນ.

ຈາກການ ເກັບກໍາຂໍ້ມູນ ພົບວ່າ ປັດຈຸບັນ ມີການປູກ ຢາງພາລາ ໃນທົ່ວປະເທດ ປະມານ 3 ແສນເຮັກຕາ ຊຶ່ງສ່ວນຫລາຍ ແມ່ນການລົງທຶນ ຂອງ ນັກທຸຣະກິດ ວຽດນາມ, ຈີນ ແລະ ໄທຍ໌ ຂະນະທີ່ ປູກໄມ້ວິກ ກໍບໍ່ໜ້ອຍ ກວ່າ 1 ແສນ ເຮັກຕາ.