..
ເກີດເຫດ ໄຟໄໝ້ ໃນ ບໍຣິເວນ ຕລາດ ເມືອງຫົງສາ ສ້າງຄວາມເສັຍຫາຍ ຢ່າງຫລວງຫລາຍ.
ເມື່ອເວລາ ປະມານ 1:00 ເຊົ້າ ຂອງວັນທີ 18 ເດືອນເມສາ ເກີດເຫດໄຟໄໝ້ ຮ້ານຂາຍເຄື່ອງ ຂອງຊາວຈີນ, ໃກ້ກັບ ຄິວຣົຖ ໃນບໍຣິເວນ ຕລາດຫົງສາ, ແຂວງໄຊຍະບູຣ. ໄຟດັ່ງກ່າວ ໄດ້ໄໝ້ລາມ ໃສ່ ຮ້ານຂາຍເຄື່ອງ ຫລາຍຫລັງ, ຮວມທັງ ຮ້ານຂາຍ ໂທຣະສັບ, ຮ້ານຂາຍ ຄຳເງິນ ແລະ ໄໝ້ຣົຖໃຫຍ່ ແລະ ຣົຖຈັກ ອີກຫລາຍຄັນ, ດັ່ງຜູ້ເຫັນ ເຫດການ ຄົນນຶ່ງ ເວົ້າວ່າ:
“ເປັນຮ້ານຂາຍເຄື່ອງ ຂອງຈີນ ຢູ່ບ່ອນຄິວຣົຖ ຄິວຣົຖຫັ້ນ ກໍໄໝ້ ໝົດເລີຍ 3, 4, 5 ຫລັງ ຢູ່ຫັ້ນນະ ບ່ອນຕິດ ຄິວຣົຖນະ ໄໝ້ໝົດເລີຍ ຕັ້ງແຕ່ 1 ໂມງ ຫາ 2 ໂມງ ປາຍນັ້ນ ຍັງບໍ່ໝົດເທື່ອ.”
ຍານາງ ກ່າວຕໍ່ໄປວ່າ ຖືວ່າ ເກີດຄວາມເສັຍຫາຍ ຢ່າງຫລວງຫລາຍ, ຊຶ່ງຄາດວ່າ ຈະບໍ່ຕ່ຳກ່ວາ 250 ລ້ານກີບ ເນື່ອງຈາກວ່າ ເປັນຮ້ານຂາຍເຄື່ອງ ແລະ ເຄື່ອງໃນຮ້ານ ເສັຍຫາຍ ທັງໝົດ. ເຖິງຢ່າງໃດ ກໍຕາມ, ຍັງໂຊກດີ ທີ່ ເຈົ້າຂອງຮ້ານ ຮູ້ໂຕທັນ ແລະ ພາຄອບຄົວ ໜີອອກມາໄດ້, ຈຶ່ງບໍ່ມີຜູ້ ເສັຍຊີວິດ, ແຕ່ຍັງບໍ່ທັນຮູ້ວ່າ ມີຜູ້ໄດ້ຮັບ ບາດເຈັບ ຈັກຄົນ.
ຍານາງ ກ່າວຕື່ມວ່າ ເຈົ້າຂອງຣົຖ ທີ່ຈອດຢູ່ໃກ້ ບໍຣິເວນ ໄຟໄໝ້ ມີຫລາຍຄົນ ທີ່ພະຍາຍາມ ເຂົ້າໄປເອົາຣົຖ ອອກມາຈາກພື້ນທີ່, ແຕ່ຍ້ອນ ຄວາມຮຸນແຮງ ຂອງໄຟ ແລະ ຣົຖ ທີ່ໃສ່ກຸນແຈ ຄໍໄວ້, ຈຶ່ງບໍ່ສາມາດ ເອົາອອກມາໄດ້. ຣົຖເຫລົ່ານັ້ນ ຖືກໄຟໄໝ້ ດົນພໍສົມຄວນ ແລະ ເກີດລະເບີດ ຂຶ້ນ.
ກ່ຽວກັບ ກໍຣະນີ ດັ່ງກ່າວ, ວິທຍຸ ເອເຊັຍ ໄດ້ສອບຖາມ ໄປຍັງ ປກສ ແຂວງ ໄຊຍະບູຣີ ເພື່ອເອົາ ຣາຍລະອຽດ ເພີ້ມຕື່ມ ແຕ່ທາງ ເຈົ້າໜ້າທີ່ ບໍ່ສາມາດ ທີ່ຈະໃຫ້ ຂໍ້ມູນໄດ້ ໂດຍໃຫ້ ເຫດຜົນວ່າ ຍັງບໍ່ທັນໄດ້ ຮັບຣາຍງານ ແຕ່ຢ່າງໃດ.
