ເຂດເສຖກິຈ ພິເສດ ມະຫານາທີ ສີ່ພັນດອນ ຈະກວມເອົາ ພື້ນທີ່ ປູກຝັງ ຂອງ ຊາວບ້ານ ບາງສ່ວນ.
ເຂດເສຖກິດ ພິເສດ ມະຫານາທີ ສີ່ພັນດອນ ໃນເມືອງໂຂງ ແຂວງຈໍາປາສັກ ຊຶ່ງເປັນເຂດ ກວ້າງຂວາງ ແຕ່ຍັງບໍ່ໄດ້ ລົງມືສ້າງ, ຕາມແຜນທີ່ ການສໍາຣວດ ຈະກວມເອົາ ພື້ນທີ່ ປູກຝັງ ຂອງຊາວບ້ານ ຈໍານວນໜຶ່ງ ແຕ່ຍັງ ບໍ່ຮູ້ວ່າ ຫລາຍປານໃດ ເພາະຍັງ ສໍາຣວດ ບໍ່ແລ້ວ ສົມບູນເທື່ອ. ດັ່ງ ເຈົ້າໜ້າທີ່ ຜແນກແຜນການ ແລະ ການລົງທຶນ ແຂວງ ຈໍາປາສັກ ເວົ້າວ່າ:
"ເມືອງໂຂງ ຢູ່ແຖບແຖວ ບ້ານນາແປງ ຂຶ້ນໄປແຖວ ຄອນພະເພັງ ເພິ່ນຊີ່ເຮັດ ຢູ່ພຸ້ນ ເຂດເສຖກິດ ພິເສດ ເຂດໄຮ່ເຂດນາ ບາງບ່ອນ ກະມີ ແຕ່ວ່າບາງບ່ອນ ກະບໍ່ຖືກ".
ນາງເວົ້າ ຕໍ່ໄປວ່າ ທາງການ ໄດ້ຈັດຫາ ພື້ນທີ່ປູກຝັງ ບ່ອນໃໝ່ ໄວ້ໃຫ້ ຊາວບ້ານ ທີ່ຖືກ ຜົລກະທົບ ນັ້ນແລ້ວ ແລະ ຊາວບ້ານ ກໍພໍໃຈ ແຕ່ຍັງ ບໍ່ສາມາດ ບອກໄດ້ວ່າ ມີຊາວບ້ານ ຈັກຄອບຄົວ ທີ່ຕ້ອງເສັຽເນື້ອທີ່ ປູກຝັງ ໃຫ້ໂຄງການນີ້. ນອກຈາກນັ້ນ ແລ້ວ ການກໍ່ສ້າງ ເຂດເສຖກິດ ແຫ່ງນີ້ ຍັງຈະກວມເອົາ ເນື້ອທີ່ ປ່າໄມ້ ຊຶ່ງຈໍາເປັນ ຕ້ອງໄດ້ຕັດໄມ້ ອອກຫລາຍ ສົມຄວນ, ພ້ອມດຽວກັນ ໂຄງການນີ້ ຍັງຈະກວມ ເອົາພື້ນທີ່ ທ່ອງທ່ຽວ ໃນເຂດ ຄອນພະເພັງ ຈໍານວນໜຶ່ງ ນໍາດ້ວຍ.
ໂຄງການ ເສຖກິດພິເສດ ມະຫານາທີ ສີ່ພັນດອນ ຈະກິນເນື້ອທີ່ ທັງໝົດ ປະມານ 5 ພັນ ເຮັກຕາ ເປັນ 1 ໃນ 3 ເຂດເສຖກິດ ທັງໝົດ ຂອງ ແຂວງຈໍາປາສັກ ທີ່ໄດ້ຜ່ານ ດໍາຣັຖ ຣັຖບານ ແລ້ວ.
