ນັກອະນຸຮັກ ສະພາບ ແວດລ້ອມ ເປັນຫ່ວງນຳ ຜົນກະທົບ ຈາກໂຮງໄຟຟ້າ ຖ່ານຫີນ ຫົງສາລິກໄນ໋ ຂອງລາວ.
ກຸ່ມອະນຸຮັກ ສະພາບແວດລ້ອມ ຊາວໄທ ເປັນຫ່ວງນຳ ບັນຫາ ອາກາດ ເປັນມົລພິດ ຍ້ອນການເຜົາໄໝ້ ຖ່ານຫີນ ຈາກ ໂຮງໄຟຟ້າ ຫົງສາ ລິກໄນ໊ ໃນເມືອງຫົງສາ ແຂວງ ໄຊຍະບູຣີ ທີ່ອາຈສ້າງ ຄວາມເດືອດຮ້ອນ ແລະ ຜົນກະທົບ ຕໍ່ ປະຊາຊົນ ຊາວໄທ ໃນແຂວງ ນ່ານ ຊຶ່ງຢູ່ໄກຈາກ ເຂຕເມືອງ Song khwer ພຽງແຕ່ 57 ກິໂລແມັຕ ແລະ ໄກຈາກ ເມືອງນ່ານ 110 ກິໂລແມັຕ ເທົ່ານັ້ນ ແລະ ຢ່ານວ່າ ມົລພິດ ຈະເປັນ ອັນຕຣາຍ ຕໍ່ສຸຂພາບ ຂອງ ປະຊາຊົນ.
ທ່ານ ນາຣົງຣິຕ ສີຣິວົງ ວໍຣະພັດ ສະມາຊິກ ຂອງເຄືອຂ່າຍ ຂອງອົງການ ຮັກສາ ແມ່ນ້ຳ ປະຈຳ ທ້ອງຖີ່ນ ທີ່ເມືອງ Khwer (ເມືອງຄິວ) ວ່າ ປະຊາຊົນ ແຂວງນ່ານ ມີຄວາມ ວິຕົກຢ້ານກົວ ນຳຜົນກະທົບ ຕໍ່ ສຸຂພາບ ຂອງເຂົາເຈົ້າ ຫລັງຈາກ ໂຄງການ ສ້າງໂຮງໄຟຟ້າ ຖ່ານຫີນ ຫົງສາ ເລີ້ມຜລິດ ໄຟຟ້າ ພາຍໃນ 2 ປີ ຂ້າງໜ້ານີ້.
ໜັງສືພີມ ບາງກອກໂປສຕ໌ ແຈ້ງໃນມື້ວັນທີ່ 21 ເມສາ ນີ້ວ່າ ບໍຣິັສັດ ໂຮງໄຟຟ້າ ຫົງສາ ເປັນບໍຣິສັດ ຮ່ວມມື ຣະຫວ່າງ ຣັຖບານລາວ ແລະ ບໍຣິສັທ ເອກກະຊົນ ໂດຽແມ່ນຊາວໄທ ຖືຫຸ້ນ ເປັນສ່ວນໃຫຍ່ ໄດ້ເຣີ້ມແຕ່ປີ 2009 ເປັນຕົ້ນມາ ໃນຈຸດປະສົງ ສ່ວນໃຫຍ່ ກໍເພື່ອສົ່ງ ກະແສໄຟຟ້າ ຂາຍໃຫ້ໄທ ພາຍໃນປີ 2015.
ທ່ານນາຣົງຣິຕ ໄດ້ແຈ້ງວ່າ ໂຮງໄຟຟ້າ ຖ່ານຫີນ ດັ່ງກ່າວນີ້ ໃນເມືອສ້າງແລ້ວ ຈະສາມາດ ຜລິຕ ກະແສໄຟຟ້າ ໄດ້ທັງໝົດ1,878 ເມກະວັຕ ແລະ ມີໂຄງການ ສົ່ງຂາຍໃຫ້ໄທ ປະມານ1,500 ເມກະວັຕ ສ່ວນທີ່ເຫລືອ ເພື່ອນຳໃຊ້ ໃນເຂຕພື້ນທີ່ ທ້ອງຖີ່ນ ພາກເໜືອ ຂອງລາວ ແຕ່ ປະຊາຊົນ ຊາວໄທ ໃນເຂຕແຂວງ ນ່ານ ກໍຈະໄດ້ຮັບ ຜົນກະທົບ ຮ້າຍໄປຕື່ມອີກ ຊຶ່ງ ປັດຈຸບັນ ນີ້ ກໍມີບັນຫາ ໝອກຄວັນ ຈາກໄຟໄໝ້ ປ່າຢ່າງຫລວງຫລາຍ ຢູ່ແລ້ວ.
ໃນຂະນະດຽວກັນ ຍານາງ Renu Vejaratpimol ນັກວິຊາການ ຈາກ ມະຫາວິທຍາລັຍ ສິລປະກອນ ທີ່ຕິດຕາມ ແລະ ສິ້ງຊອມ ດ້ານຜົນກະທົບ ຈາກ ໝອກຄວັນໄຟ ແລະ ຄວາມຄືບໜ້າ ຂອງໂຄງການ ສ້າງໂຮງໄຟຟ້າ ຫົງສາ ດັ່ງກ່າວນີ້ ກໍວ່າ ໃນເມືອ ສ້າງແລ້ວ ສຳເຣັດ ກໍຈະສ້າງ ຄວາມເດືອດຮ້ອນ ໃຫ້ແກ່ ປະຊາຊົນ ຢ່າງຫລວງຫລາຍ ເຖີງຈະຍັງ ບໍ່ທັນຮູ້ ໃນປະຣິມານ ຂອງ ມົລພິດ ທີ່ ຈະເກີດຂຶ້ນ ຈາກໂຮງໄຟຟ້າ ກໍຕາມ ແຕ່ພວກເຮົາ ກໍມີບົດຮຽນ ຈາກໂຮງໄຟຟ້າ ທີ່ແມ່ເມາະ ໃນປະເທດໄທ ມາກ່ອນແລ້ວ.
