ຊາວລາວຂໍເສຣີພາບ ແລະຄວາມເປັນທັມ

ປະຊາຊົນ ລາວ ຕ້ອງການ ການເສຣີພາບ ໃນການ ສະແດງອອກ ຄວາມຄິດ ຄວາມເຫັນ ແລະ ຢາກໃຫ້ ຣັຖບານ ມີຄວາມເປັນທັມ.

ຊາວລາວ ໃນ ເມືອງປາກເຊ ແລະ ໃນ ນະຄອນຫລວງ ວຽງຈັນ ຜູ້ບໍ່ປະສົງ ອອກຊື່ ໃຫ້ ຄວາມເຫັນວ່າ ທຸກມື້ນີ້ ປະຊາຊົນ ລາວ ສ່ວນໃຫຍ່ ຕ້ອງການ ເສຣີພາບ ໃນການປາກເວົ້າ ຕໍ່ໜ້າກົດໝາຍ ເນື່ອງຈາກວ່າ ສັງຄົມ ໃນຕົວເມືອງ ມີການລົງທຶນ ຂອງ ຕ່າງປະເທດ ມີການຂຍາຍຕົວ ຫລາຍຂື້ນ ແລະ ບັນຫາ ທີ່ ມີຜົນກະທົບ ຕໍ່ສິດທິ ຂອງ ປະຊາຊົນ ກໍມີຫລາຍຂື້ນ. ຊາວລາວ ຜູ້ນຶ່ງເວົ້າວ່າ:

“ຕ້ອງການ ເສຣີພາບ ທາງ ດ້ານເຊື່ອຖື ເສຣີພາບ ທາງດ້ານ ການໄປມາ ເປັນ ພົລເມືອງລາວ ເສຣີພາບ ໃນການສະແດງ ນຳສເນີ ປາກເວົ້າ ຕໍ່ໜ້າ ກົດໝາຍ”.

ຊາວນະຄອນຫລວງ ວຽງຈັນ ອີກທ່ານນື່ງ ທີ່ບໍ່ປະສົງ ອອກສຽງ ໃຫ້ຄວາມເຫັນວ່າ ຢາກໃຫ້ ປະເທດຊາດ ບ້ານເມືອງ ມີການປ່ຽນແປງ ໄປໃນທາງ ທີ່ດີ ແຕ່ມັກຖືກ ກ່າວຫາວ່າ ເປັນຄົນທີ່ ບໍ່ຫວັງດີ ຈື່ງເຮັດໃຫ້ ສັງຄົມລາວ ທຸກມື້ນີ້ ບໍ່ກ້າ ສະແດງ ຄວາມເຫັນ ທີ່ ແຕກຕ່າງ ຈາກ ການນຳພາ ຂອງ ພັກຣັຖ ແຕ່ຢ່າງໃດ ສ່ວນພວກທີ່ ສໍ້ໂກງ ມັກຖືກສັງຄົມ ສັລເສີນ ວ່າເປັນບຸກຄົນ ມີກຽດສັກສີ. ຊາວລາວ ທ່ານນຶ່ງ ໃນ ນະຄອນຫລວງ ວຽງຈັນ ເວົ້າວ່າ: ຕົນຢາກເຫັນການ ປະຕິບັດງານ ຂອງ ຣັຖບານໂປ່ງສັຍ ແລະມີຄວາມ ເປັນ ທັມ:

“ກໍຢາກຕ້ອງການ ຄວາມເປັນທັມ ຈາກການ ເຮັດວຽກ ຂອງຣັຖ ຕ້ອງການ ຄວາມເປັນທັມ ຍົກຕົວຢ່າງ ການແກ້ໃຂ ມີການ ກວດສອບ ການບໍຣິຫານ ຂອງການ ກວດກາ ແຫ່ງຊາດ”

ຊາວລາວ ທ່ານນີ້ ເວົ້າຕໍ່ໄປວ່າ ຕ້ອງການ ໃຫ້ຣັຖບານ ເຮັດວຽກ ເພື່ອ ຜົນປະໂຫຍດ ຂອງຊາດ ຫລາຍເທົ່າທີ່ ຈະຫລາຍໄດ້ ຖ້າເປັນໄປໄດ້ ຢາກໃຫ້ ຣັຖບານ ປະກາດ ໃຊ້ນິຕິກັມ ການແຈ້ງຊັບສິນ ຂອງ ພະນັກງານ ຊັ້ນນຳໄວໆ ແລະ ຢາກໃຫ້ ມີການ ກວດກາ ແລະ ການປະຕິບັດ ວິນັຍ ຂອງ ເຈົ້າໜ້າທີ່ ຢ່າງເຂັ້ມງວດ.