ພຍາດອາດຍາສິດ ຣະບາດຢູ່ລາວ

ພຍາດ ອາດຍາສິດ ຢູ່ ສປປ ລາວ ໄດ້ຣະບາດ ຕັ້ງແຕ່ຂັ້ນ ສູນກາງ ເຖິງ ຂັ້ນທ້ອງຖິ່ນ ຮວມທັງ ຂັ້ນບ້ານ ໃນ ນະຄອນຫລວງ ວຽງຈັນ.

ເວົ້າສະເພາະ ຢູ່ຂັ້ນບ້ານ ໃນເຂດ ນະຄອນຫລວງ ວຽງຈັນ, ປັດຈຸບັນ ປກສ ແຕ່ລະບ້ານ ກໍານົດ ຄ່າທໍານຽມ ຕ່າງໆ ບໍ່ເປັນມາຕຖານ ດຽວກັນ, ສຸດແລ້ວແຕ່ ຈະວາງອອກ. ຊາວນະຄອນຫລວງ ວຽງຈັນ ຜູ້ນຶ່ງ ທີ່ບໍ່ປະສົງ ອອກຊື່ ເວົ້າວ່າ ເລົາໄປເຊັນ ໜັງສື ໂອນກັມສິດ ທີ່ດິນ ນໍານາຍບ້ານ 2 ຊຸດ. ເພີ່ນຈະເອົາ ນໍາຊຸດລະ 5 ແສນກີບ. ເມື່ອເຫັນວ່າ ເພີ່ນຈະເອົາ ນໍາຫລາຍ ກໍເລີຍຕໍ່ລອງ ໃຫ້ເພີ່ນ 650 ພັນກີບ. ກ່ອນເພີ່ນຈະ ຕົກລົງໃຫ້ ເພີ່ນກໍເວົ້າ ຫລາຍຢ່າງ ຮວມທັງວ່າ ຖ້າເພີ່ນ ບໍ່ເຊັນ ແມ່ນໃຜ ຈະເຊັນໃຫ້.

ນອກຈາກ ຄ່າທໍານຽມ ທີ່ວ່ານັ້ນແລ້ວ ຄ່າທໍານຽມ ອື່ນໆກໍສູງ ແລະ ການແຜ່ ບໍຣິຈາກ ຕ່າງໆ ກໍມີຢູ່ ຕລອດ ເຊັ່ນຄ່າທໍານຽມ ກູ້ຢືມເງິນ ຈໍານວນ 2-3 ລ້ານກີບ ກໍເກັບນໍາ 1 ແສນ ກີບ; ຄ່າໄກ່ເກັ່ຍ ເຣື່ອງຕ່າງໆ ນອກຈາກ ຣົດຕໍາກັນ ເທື່ອທໍາອິດ ກໍເອົາຝ່າຍລະ 1 ແສນ ກີບ ແລະ ເທື່ອຕໍ່ໄປ ກໍເກັບ 2-3 ແສນກີບ. ຊາວລາວ ຜູ້ນີ້ ເຄີຍຖາມ ນາຍບ້ານວ່າ  ຄືເກັບຄ່າ ທໍານຽມ ສູງແທ້ ເອົາໄປ ເຮັດຫຍັງ?. ເພີ່ນຕອບວ່າ ບໍ່ໄດ້ເອົາ ຜູ້ດຽວ, ໄດ້ແບ່ງ ຈໍານວນນຶ່ງ ໃຫ້ທາງເມືອງ.

ຄ່າທໍານຽມ ຢູ່ລາວ ເລົາເວົ້າວ່າ ປາກົດວ່າ ມີຣັຖບັນຍັຕ ຂອງ ປະທານ ປະເທສ ປີ 2008 ກ່ຽວກັບ ຄ່າທໍານຽມ ແລະ ຄ່າບໍຣິການ. ແຕ່ບໍ່ໄດ້ ກໍານົດ ຄ່າທໍານຽມ ຢູ່ຂັ້ນບ້ານ. ຫລືອາດເປັນຍ້ອນ ແນວນັ້ນ ຈຶ່ງເຮັດໃຫ້ ແຕ່ລະບ້ານ ເກັບຄ່າທໍານຽມ ບໍ່ເປັນ ເອກພາບ ກັນ ພ້ອມທັງ ໃຊ້ສິດ ໃຊ້ອໍານາດ ຕາມລໍາພັງໃຈ ຂອງຕົນ. ຜູ້ໃດບໍ່ ປະຕິບັດ ຕາມ ກໍຈະຖືກ ຖືວ່າ ບໍ່ເຊື່ອໝັ້ນ ນໍາພັກນໍາຣັຖ. ຮ້າຍແຮງ ໄປກວ່ານັ້ນ ກໍຈະຖືກ ກ່າວຫາວ່າ ຕ້ານພັກ ຕ້ານຣັຖ ເຮັດໃຫ້ ປະຊາຊົນ ບໍ່ກ້າຂັດຂ້ອງ.

ນັບຕັ້ງແຕ່ ໄດ້ມີການ ປ່ຽນແປງ ຣະບອບ ການປົກຄອງ ຢູ່ປະເທດລາວ ໃນ ປີ 1975 ມາ, ການຄຸ້ມຄອງຣັຖ, ຄຸ້ມຄອງສັງຄົມ ເຕັມໄປດ້ວຍ ການໃຊ້ສິດ, ໃຊ້ອໍານາດ ເກີນຂອບເຂດ ທີ່ ຣະບຽບ ກົດໝາຍ ກໍານົດໄວ້ ຮວມທັງ ລະເມີດຣະບຽບ ການເສັຍພາສີ ແລະ ສ່ວຍສາອາກອນ ຕາມກົດໝາຍ ບ້ານເມືອງ.