ສະຖາບັນ ການເງີນ IFC ແລະ ທະນາຄານ ດອສ ຂອງ ເຍັຽຣະມັນ ເປັນຜູ້ ໃຫ້ເງິນກູ້ ແກ່ ບໍຣິສັດ ວຽດນາມ ປູກຢາງພາລາ ໃນລາວ ແລະ ກຳພູຊາ.
ອົງການ Global Witness ລາຍງານວ່າ ສະຖາບັນ ການເງິນ IFC ແລະ ທະນາຄານ ດອສ ຂອງ ເຍັຽຣະມັນ ເປັນຜູ້ໃຫ້ ເງິນກູ້ ແກ່ ບໍຣິສັດ ວຽດນາມ ສອງ ບໍຣິສັດ ໃນ ການປູກ ຢາງພາລາ ໃນລາວ ແລະ ກຳພູຊາ ທີ່ກວມເອົາ ດິນປູກຝັງ ຊາວບ້ານ ແລະ ບີບບັງຄັບ ໃຫ້ມີການ ໂຍກຍ້າຍ ປະຊາຊົນ ລາຍໃຫຍ່ ໃນສອງປະເທດ ດັ່ງກ່າວ. ນາງ ເມກັນ ເມກ ອິນແນສ ຫົວຫນ້າທິມງານ ກ່ຽວກັບ ເຣື້ອງດິນ ຈາກ ອົງການ Global Witness ກ່າວວ່າ:
"ສຳລັບ ພວກເຮົາແລ້ວ ສິ່ງທີ່ຫນ້າ ຕົກຕະລຶງ ທີ່ ພວກເຮົາໄດ້ ພົບເຫັນ ຈາກ ການຄົ້ນຄວ້າ ເທື່ອນີ້ ແມ່ນວ່າ ບໍຣີິສັດ ວຽດນາມ ໄດ້ຮັບເງິນ ອຸດຫນູນ ຈາກ ສະຖາບັນ ການເງິນ ຕ່າງປະເທດ ທີ່ຮ່ວມດ້ວຍ ອົງການ ການເງິນ IFC ທີ່ ເປັນພາກສ່ວນ ຂອງ ທະນາຄານ ໂລກ ແລະ ທະນາຄານ ດອສ ຈາກ ປະເທດ ເຍັຽຣະມັນ".
ລາຍງານໄດ້ ບົ່ງບອກ ຢ່າງແຈ່ມແຈ້ງ ກ່ຽວກັບ ຄວາມລຶກລັບ ຂອງ ໂຄງການ ປູກຢາງພາລາ ໃນລາວ ແລະ ກຳພູຊາ ຈາກ ບໍຣິສັດ ຍັກໃຫຍ່ ວຽດນາມ 2 ບໍຣິສັດ ທີ່ໄດ້ເງິນກູ້ ຈາກ ສະຖາບັນ ການເງິນ ດັ່ງກ່າວ ເຊັ່ນ ບໍຣິສັດ ຫົງອານ ໄກລານ ແລະ ບໍຣິສັດ ຣັຖວິສາຫະກິດ ຢາງພາລາ ວຽດນາມ ໃນພື້ນທີ່ 2 ແສນ ເຮັກຕາ ບາງສ່ວນ ເປັນດິນ ປູຸກຝັງ ຂອງ ປະຊາຊົນ ປາສຈາກ ຄວາມໂປ່ງໄສ ໂດຍໄດ້ຮັບ ຄວາມຮ່ວມມື ຈາກ ເຈົ້າຫນ້າທີ່ ຣັຖ.
ກຸ່ມ ບໍຣິສັດ ວຽດນາມ ໄດ້ສົມຮູ້ ຮ່ວມຄິດ ກັບ ເຈົ້າຫນ້າທີ່ ແລະ ນັກການເມືອງ ຈາກ ສອງປະເທດ ຜູ້ທີ່ ສໍ້ຣາຊ ບັງຫລວງ ໃນການຍຶດ ທີ່ດິນ ຊາວບ້ານ ມາໃຫ້ ບໍຣິສັດ ວຽດນາມ ປູກຢາງພາລາ. ກຸ່ມດັ່ງກ່່າວ ດຳເນີນ ທຸຣະກິດ ແບບຝ່າຝືນ ກົດຫມາຍ ສ້າງຄວາມເສັຽຫາຍ ຕໍ່ສິ່ງແວດລ້ອມ ແລະ ວິຖີ ຊິວິດ ຂອງ ປະຊາຊົນ ທ້ອງຖີ່ນ ຊຶ່ງ ທະນາຄານ ດອສ ຂອງ ເຍັຽຣະມັນ ເປັນຜູ້ອອກ ເງິນກູ້ ລາຍໃຫຍ່ ໃຫ້ແກ່ ບໍຣິສັດ ທັງສອງ ແຕ່ ສະຖາບັນ ການເງິິນ IFC ລົງທຶນ ໃນ ບໍຣິສັດ ຫົງອານ ໄກລານ ຢ່າງດຽວ.
ເລີ້ມແຕ່ປີ 2000 ເປັນຕົ້ນມາ ການຍຶດ ທິີ່ດິນ ຊາວບ້ານ ເພື່ອ ປູກຢາງພາລາ ໃນ ກຳພູຊາ ແລະ ລາວ ມີເຖິງ 3 ລ້ານ 7 ແສນ ເຮັກຕາ ຈາກ ສອງ ບໍຣິສັດ ດັ່ງກ່າວ ແລະ ປະຊາຊົນ ຫລາຍ ແສນຄົນ ຖືກບັງຄັບ ໃຫ້ໂຍກຍ້າຍ ຈາກ ທີ່ຢູ່ ອາສັຍ.
