ສານລາວຕັດສິນ ແບບລໍາອຽງ

ຫ້ອງການສານ ບາງບ່ອນ ຕັດສິນ ຄະດີ ແບບບໍ່ໃຫ້ ຄວາມເປັນທັມ ຕໍ່ ປະຊາຊົນ.

ສານບາງແຫ່ງ ຂອງລາວ ບໍ່ໃຫ້ຄວາມ ເປັນທັມ ແກ່ ປະຊາຊົນ ໃນການ ຕັດສິນ ຄະດີ. ມີຫລາຍ ກໍຣະນີ ສານບໍ່ຖື ເອົາຕາມຄໍາ ຮ້ອງທຸກ ຂອງ ປະຊາຊົນ ແຕ່ຖືເອົາ ຄໍາເຫັນ ຂອງ ພັກພວກ ຫລາຍກວ່າ. ບາງຄັ້ງ ເວລາເກີດ ບັນຫາ ຣະຫວ່າງ ເຈົ້າໜ້າທີ່ ຣັຖ ກັບ ປະຊາຊົນ ປະຊາຊົນ ຈະເປັນຝ່າຍ ເສັຽປຽບ ຢູ່ສເມີ. ດັ່ງຊາວເມືອງ ໂພນສະຫວັນ ແຂວງຊຽງຂວາງ ຜູ້ນຶ່ງ ເວົ້າວ່າ:

"ມັນມີບັນຫາ ຢູ່ບ່ອນວ່າ ມັນບໍ່ມີ ອໍານາດ ຕຸລາການ ທີ່ມີລັກສນະ ເປັນກາງ ເພື່ອວ່າດູແລ ຖ້າວ່າ ເຈົ້າໜ້າທີ່ ຣັຖ ເຮັດອັນໃດ ເພິ່ນຍ່ອມ ປົກປ້ອງວ່າ ຂະເຈົ້າຖືກ ຈະພິສູດວ່າ ທີ່ເຂົ້າໃຈ ມັນບໍ່ຖືກ ມັນຍາກ ທີ່ສຸດ ເພາະວ່າ ບໍ່ມີ ໜັງສືພິມ ບໍ່ມີຫຍັງ ທີ່ຈະສ່ອງແສງ ໄດ້ຄວາມຈິງ ໜັງສືພິມ ກໍເປັນ ໜັງສືພິມ ຂອງຣັຖ ເຂົາກໍຂຽນ ຕາມການຊີ້ນໍາ ຂອງຣັຖເທົ່ານັ້ນ".

ລາວເວົ້າ ຕໍ່ໄປວ່າ ຢູ່ໃນ ສັງຄົມລາວ ເວລາ ປະຊາຊົນ ມີເຣື່ອງກັບ ເຈົ້າໜ້າທີ່ ສ່ວນຫລາຍແລ້ວ ປະຊາຊົນ ຈະຍອມ ເຈົ້າໜ້າທີ່ ແລະ ບໍ່ກ້າໃຊ້ສິດ ຂອງຕົນເອງ ເພາະ ບໍ່ຢາກມີ ບັນຫາ ຕາມມາ ພາຍຫລັງ:

"ປະຊາຊົນ ມັນກໍບໍ່ສູ້ ໄດ້ໃຊ້ ສິດສຽງ ຂອງຕົນ ພໍປານໃດ ຖ້າວ່າເຮົາ ໃຊ້ສິດສຽງ ຂອງ ປະຊາຊົນ ທົ່ວໄປແລ້ວ ບາງເທື່ອ ອາຈບໍ່ຖືກ ນິສັຍ ໃຈຄໍ ຂອງຂະເຈົ້າ ຂະເຈົ້າ ກໍອາຈມີ ບັນຫາ ກັບຄືນ ກໍເປັນໄດ້ ສ່ວນຫລາຍ ມັນຈະເປັນ ທໍານອງນັ້ນ".

ແລະວ່າ ສ່ວນຕົວແລ້ວ ລາວຢາກໃຫ້ ມີໜ່ວຍງານໜຶ່ງ ອີກ ຕ່າງຫາກ ມາກວດ ສອບການເຮັດວຽກ ຂອງສານ ເພື່ອວ່າການ ຕັດສິນ  ຄະດີ ເປັນທັມ ແກ່ທຸກຄົນ.