ໂຄງການ ສ້າງໂຮງງານ ໄຟຟ້າ ຫົງສາ ລິກໄນ ຢູ່ແຂວງ ໄຊຍະບູຣີ ບໍ່ສາມາດ ຈ້າງ ຄົນງານລາວ ໄດ້ຕາມ ຈໍານວນ ທີ່ກົດໝາຍ ກໍານົດໄວ້.
ປັຈຈຸບັນ ໂຄງການ ກໍ່ສ້າງ ໂຮງໄຟຟ້າ ຫົງສາ ລິກໄນ ຍັງບໍ່ສາມາດ ຈ້າງຄົນງານລາວ ໃຫ້ໄດ້ຕາມ ທີ່ ກົດໝາຍກໍານົດ ທີ່ວ່າ ແຕ່ລະ ໂຄງການ ສັມປະທານ ຕ້ອງຈ້າງ ຄົນງານລາວ ບໍ່ລຸດ 80 ສ່ວນຮ້ອຍ ຂອງຄົນງານ ທັງໝົດ ແຕ່ໂຄງການ ຫົງສາ ລິກໄນ ສາມາດຈ້າງ ຄົນງານລາວ ໄດ້ພຽງ 57 ສ່ວນຮ້ອຍ ເທົ່ານັ້ນ. ຕາມຄໍາເວົ້າ ຂອງ ເຈົ້າໜ້າທີ່ ໂຄງການ ຫົງສາ ລິກໄນ:
"ຈໍານວນ ທັງໝົດ ທັງແຮງງານ ລາວ ແລະ ແຮງງານ ຕ່າງປະເທດ ນີ່ມີ 4425 ໃນນີ້ ແມ່ນເປັນ ແຮງງານລາວ ນີ່ 2537 ແລ້ວກໍເປັນ ແຮງງານ ຕ່າງປະເທດ ນີ່ 1888 ມາຈາກ ວຽດນາມ ສປຈີນ ແລ້ວກໍຈາກ ປະເທດ ໄທ".
ແລະວ່າ ປັຈຈຸບັນ ຍັງຕ້ອງການ ແຮງງານ ຕ່າງປະເທດ ຢູ່ເກືອບ 43 ສ່ວນຮ້ອຍ ຂອງ ຄົນງານ ທັງໝົດ ຍ້ອນຄົນງານ ລາວ ບໍ່ມີສີມື ຮອງຮັບ ວຽກງານ ກໍ່ສ້າງນີ້ໄດ້ ຂະນະທີ່ ແຮງງານ ບໍ່ມີສີມື ສ່ວນໜຶ່ງ ກໍຈໍາເປັນ ຕ້ອງໄດ້ ນໍາເຂົ້າ ຈາກປະເທດ ເພື່ອນບ້ານ ເພາະ ໂຄງການ ບໍ່ສາມາດ ຫາແຮງງານ ໃນທ້ອງຖີ່ນ ໄດ້ພຽງພໍ ກັບ ຄວາມຕ້ອງການ. ໂຄງການ ໂຮງໄຟຟ້າ ຖ່ານຫີນ ຫົງສາ ລິກໄນ ຕັ້ງຢູ່ໃນ ແຂວງ ໄຊຍະບູຣີ ຫາກ ກໍ່ສ້າງ ແລ້ວ ກໍຈະມີກໍາ ລັງຜລິດ 1878 ເມັກກາວັດ ແລະ ຈະເປັນໂຄງການ ຜລິດໄຟຟ້າ ໃຫຍ່ທີ່ສຸດ ໃນປະເທດລາວ.
ແລະ ຕາມຄໍາເວົ້າ ຂອງ ບໍຣິສັດ ບ້ານປູ ແລ້ວ ແມ່ນວ່າ ມີຄວາມຄືບໜ້າ ບໍ່ຫລຸດ 50 ສ່ວນຮ້ອຍ ໂດຍໄດ້ ສ້າງພື້ນຖານ ແລະ ຕົວໂຮງ ງານ ສ່ວນນຶ່ງແລ້ວ. ການໂຍກຍ້າຍ ຊາວບ້ານ ທັງ 450 ຄອບຄົວ ອອກຈາກ ພື້ນທີ່ກໍ່ສ້າງ ນັ້ນ ກໍແລ້ວໆ ເມື່ອປີກາຍ ແລະ ມີການຮັບ ຊາວບ້ານ ເຂົ້າເຮັດວຽກ ໃນ ໂຄງການນີ້ ສ່ວນນຶ່ງແລ້ວ.
