ແຂວງ ສວັນນະເຂດ ບໍ່ສາມາດ ບັນລຸ ເປົ້າຫມາຍ ສຫັດສວັດ ສະຫະປະຊາຊາດ ທາງດ້ານ ການສຶກສາ.
ກະຊວງ ສຶກສາ ທິການ ສປປລາວ ເປີດເຜີຍວ່າ ແຂວງ ສວັນນະເຂດ ຍັງບໍ່ສາມາດ ພັທນາ ການສຶກສາ ໄດ້ຕາມ ເປົ້າຫມາຍ ສະຫັດສວັດ ອົງການ ສຫະປະຊາຊາດ ໂດຍ ສະເພາະ ໃນເຣື້ອງການ ຊຸກຍູ້ ໃຫ້ນັກຮຽນ ປະຖົມ ສາມາດ ຮຽນຈົບປໍ 5 ໃຫ້ຫມົດໄດ້ ໃນປີ 2012 ຜ່ານມາ. ດັ່ງເຈົ້າຫນ້າທີ່ ຈາກ ກະຊວງ ສຶກສາ ທ່ານນຶ່ງ ເວົ້າວ່າ:
"ຄົນໃນເມືອງ ການສຶກສາ ກໍຖືວ່າ ບໍ່ມີບັນຫາ ຜ່ານມາ ແຖວນອກພຸ້ນແຫລະ ມີບັນຫາ ຮຽນບໍ່ຮອດ ປໍ 5 ມີແຕ່ວ່າ ໂຍກຍ້າຍ ຕາມຄອບຄົວ ຣະດັບ ນັກຮຽນ ການຮຽນ ຊູ່ມື້ນີ້ ກໍຖືວ່າ ບໍ່ເກັ່ງ ຄືເກົ່າ".
ຈາກການ ປະເມີນຜົລ ອັດຕຣາ ການສຶກສາ ຂອງນັກຮຽນ ໃນແຂວງ ສວັນນະເຂດ ທີ່ ສາມາດ ຮຽນຈົບ ການສຶກສາ ຮອດປໍ 5 ມີພຽງແຕ່ 61% ເທົ່ານັ້ນ ຍັງບໍ່ຮອດເປົ້າ ທີ່ຣັຖບານ ໄດ້ວາງໄວ້ 95% ບັນຫາ ດັ່ງກ່າວ ເຈົ້າຫນ້າທີ່ ສຶກສາ ອະທິບາຍ ວ່າ ສ່ວນໃຫຍ່ ມັນຈະເກີດຂື້ນ ໃນໂຮງຮຽນ ໃນເຂດ ຊົນນະບົດ ຫ່າງໄກ ຍ້ອນພໍ່ແມ່ ເປັນຊາວນາ ທີ່ທຸກຈົນ ບໍ່ມີເງິນ ສົ່ງລູກໄປ ໂຮງຮຽນ. ພໍ່ແມ່ບາງຄົນ ໄດ້ໃຫ້ລູກອອກ ໂຮງຮຽນ ເພື່ອມາຊ່ອຍ ວຽກໃນໄຮ່ນາ.
ນາງກ່າວ ຕຶ່ມວ່າ ບັນຫາ ອັນດັບສອງ ແມ່ນບັນຫາ ເຣື້່ອງ ຄຸນນະພາບ ການສຶກສາ ໃນແຂວງ ສວັນນະເຂດ ຊື່ງໃນ ປັດຈຸບັນ ຈາກການ ປະເມີນ ຜົລພົບວ່າ ຄຸນນະພາບ ການສຶກສາ ຂອງ ນັກຮຽນ ທີ່ແຂວງ ສວັນນະເຂດ ຕ່ຳກວ່າຣະຍະ ທີ່ຜ່ານມາ ແມ້ແຕ່ນັກຮຽນ ໃນໂຮງຮຽນ ໃນເມືອງ ກໍມີບັນຫາ ດັ່ງກ່າວ ເປັນຍ້ອນ ການຮຽນ ການສອນ ແລະ ນາຍຄຣູສອນ ທີ່ຂາດ ຄຸນນະພາບ.
