ກໍຣະນີ ຊາວລາວ ຈາກ ສະຫະຣັຖ ອະເມຣິກາ ທີ່ຫາຍສາບສູນ ຢູ່ລາວ ນັ້ນ ຍັງບໍ່ຄືບໜ້າ ແລະ ແຈ້ງຂາວເທື່ອ.
ການສືບສວນ ຫາຊາວລາວ ສັນຊາຕ ອະເມຣິກັນ 2 ຄົນ ກັບ ອີກຄົນນຶ່ງ ໃນຖານະ ຢູ່ອະເມຣິກາ ແບບຖືກຕ້ອງ ຕາມກົດໝາຍ ທີ່ຫາຍສາບສູນ ໄປເກືອບ 6 ເດືອນ ໃນເວລາເມືອ ຢາມບ້ານ ຢູ່ແຂວງ ສວັນນະເຂດ ເວລານີ້ ຍັງບໍ່ມີ ຄວາມຄືບໜ້າ ແລະ ບໍ່ແຈ້ງຂາວ ເທື່ອ ຫລັງຈາກໄດ້ ສອບຖາມ ໄປຍັງ ກະຊວງການ ຕ່າງປະເທດ ສປປ ລາວ ເມື່ອອາທິດ ທີ່ແລ້ວ ແລະ ລ້າສຸດ ໄດ້ສອບຖາມ ໄປຍັງ ສະຖານທູດ ສະຫະຣັຖ ອະເມຣິກາ ຕື່ມ ໃນວັນຈັນ ວັນທີ 13 ພຶສພາ ນີ້. ຖ້ອຍຖະແຫລງ ຂອງ ກົມການຂ່າວ ກະຊວງການ ຕ່າງປະເທດ ຕໍ່ ເອເຊັຽເສຣີ ເມື່ອຕອນບ່າຍ ຂອງ ວັນສຸກ ວັນທີ 10 ພຶສພາ ຜ່ານມາ ແຈ້ງໃຫ້ຊາບວ່າ:
“ກົມການຂ່າວ ຍັງລໍຖ້າ ຜົນຂອງການ ກວດ DNA ຂອງ 3 ຄົນ ທີ່ ສະຖານທູດ ສະຫະຣັຖ ອະເມຣິກາ ປະຈໍາລາວ ເອົາໄປກວດ ແລະ ບອກວ່າ ລາຍລະອຽດ ຂໍໃຫ້ ສອບຖາມນໍາ ສະຖານທູດ ສະຫະຣັຖ ຢູ່ວຽງຈັນ”.
ແຕ່ບໍ່ໄດ້ ໃຫ້ລາຍລະອຽດ ຫຍັງຫລາຍ ກ່ວານີ້. ໃນຕອນບ່າຍໆ ວັນຈັນ ວັນທີ 13 ພຶສພາ ນີ້ ສະຖານທູດ ສະຫະຣັຖ ແຈ້ງໃຫ້ ຊາບວ່າ:
“ ທາງສະຖານທູດ ບໍ່ໄດ້ດໍາເນີນ ການກວດ DNA ກໍຣະນີ ຜູ້ ຫາຍສາບສູນ. ທາງ ສະຖານທູດ ໃຫ້ຂໍ້ມູນ ກ່ຽວກັບວ່າ ສະມາຊິກ ຄອບຄົວ ຂອງ ພົລເມືອງ ສະຫະຣັຖ ທີ່ ຫາຍສາບສູນ ສາມາດ ດໍາເນີນ ການກວດ DNA ແບບໃດ ຖ້າຫາກວ່າ ສະມາຊິກ ຄອບຄົວ ຮູ້ສຶກວ່າ ການກວດ DNA ຈະຊ່ວຍໃຫ້ ພວກເພິ່ນ ຮູ້ໄດ້ ກ່ຽວກັບວ່າ ຄົນຮັກທີ່ ຫາຍສາບສູນ ໄປນັ້ນຢູ່ໃສ. ທາງ ສະຖານທູດ ຖືວ່າ ພົລເມືອງ ສະຫະຣັຖ 2 ຄົນ ຫາຍສາບສູນ ແລະ ຈະສືບຕໍ່ ຊອກຫາ. ຣັຖບານລາວ ໄດ້ໃຫ້ຂໍ້ມູນ ທຸກຢ່າງທີ່ ທາງສະຖານທູດ ຂໍມາ ແລະຍັງເວົ້າວ່າ ທາງສະຖານທູດ ບໍ່ໄດ້ກ່ຽວຂ້ອງ ນໍາການສຶບສວນ ອັນໃດ ທີ່ ຣັຖບານລາວ ອາດ ຫລືບໍ່ອາດ ດໍາເນີນ ການສືບສວນ”.
ເມື່ອວັນທີ 8 ພຶສພາ ຜ່ານມານີ້ ສະຖານທູດ ສະຫະຣັຖ ທີ່ນະຄອນຫລວງ ວຽງຈັນ ບອກກັບ ເອເຊັຽເສຣີ ວ່າ ຄົນທັງ 3 ຄົນນີ້ ຍັງຖືວ່າ “ຫາຍສາບສູນຢູ່”. ຫລາຍເດືອນ ຜ່ານມາ ທາງຄອບຄົວ ຢູ່ຣັຖ ມີນນີໂຊຕາ ໄດ້ແຈ້ງໄປຍັງ ສະຖານທູດ ຢູ່ ນະຄອນຫລວງ ວຽງຈັນວ່າ ຜູ້ຊາຍຊາວລາວ ທັງ 3 ຄົນດັ່ງກ່າວ ຄືທ່ານ ສຸລິ ກອງດາລາວົງ, ທ່ານ ບຸນມາ ພັນໂຍທາ ທັງສອງຄົນ ສັນຊາດ ອະເມຣິກັນ ແລະທ່ານ ບຸນທ່ຽງ ອິນສີຊຽງໃໝ່ ຖື ບັດຂຽວ ຂອງ ສະຫະຣັດ ອະເມຣິກາ ໄດ້ຫາຽສາບສູນໄປ ຕັ້ງແຕ່ວັນທີ 6 ມົກກະຣາ ໃນຣະຫວ່າງ ໄປ ສົ່ງສະການ ອ້າຽເຂີຍ ຂອງທ່ານ ບຸນທ່ຽງ ອິນສີ ຊຽງໃໝ່ ທີ່ ບ້ານແກ້ງກອກ ເມືຶອງ ຈໍາພອນ.
