ກຸ່ມປົກປ້ອງ ສິທທິມະນຸສ ບໍ່ພໍໃຈ ທີ່ ສປປລາວ ສົ່ງ ອົພຍົບ ເກົາຫລີເໜືອ ກັບຄືນ ປະເທດ.
ກຸ່ມປົກປ້ອງ ສິທທິມະນຸສ ແລະ ກຸ່ມລີ້ພັຍ ຊາວເກົາຫລີ ເໜືອ ໄດ້ສະແດງ ທ່າທີ ບໍ່ພໍໃຈ ແລະ ເປັນຫ່ວງ ກ່ຽວກັບ ການບັງຄັບ ສົ່ງ ຊາວເກົາຫລີ ເໜືອ 9 ຄົນ ກັບຄືນ ປະເທດ ຂອງພວກຂະເຈົ້າ ພາຍຫລັງ ທີ່ຖືກຈັບ ໃນປະເທດລາວ, ອີງຕາມຣາຍງານ ຂອງແຫລ່ງຂ່າວ ເອ ແອັຟ ພີ ໃນມື້ວັນທີ 30 ພຶສພາ ນີ້.
ກໍຣະນີ ດັ່ງກ່າວ ໄດ້ສ້າງ ຄວາມກັງວົນ ໃຫ້ແກ່ ສາທາຣະນະຊົນ ໃນເກົາຫລີໃຕ້, ຊຶ່ງຈຳນວນນຶ່ງ ຖິ້ມໂທດໃສ່ ກະຊວງການ ຕ່າງປະເທດ ທີ່ບໍ່ສາມາດ ປະຕິບັດ ໜ້າທີ່ ຂອງຕົນ ເພື່ອປົກປ້ອງ ອົພຍົບ ເຫລົ່ານັ້ນ ໃນເວລາ ທີ່ ພວກຂະເຈົ້າ ໄປເຖິງ ປະເທດລາວ.
ອົພຍົບ ເກົາຫລີເໜືອ ສ່ວນຫລາຍ ຫລົບໜີ ອອກຈາກ ປະເທດ ໂດຍ ຂ້າມຊາຍແດນ ເຂົ້າໄປໃນ ປະເທດຈີນ, ຈາກນັ້ນ ກໍເດີນທາງໄປ ປະເທດທີ 3, ຊຶ່ງສ່ວນຫລາຍແລ້ວ ແມ່ນ ປະເທດເອເຊັຍ ຕາເວັນອອກ ສ່ຽງໃຕ້, ບ່ອນທີ່ ພວກຂະເຈົ້າ ຊອກຫາ ຊ່ອງທາງ ເພື່ອໄປຕັ້ງ ຖິ່ນຖານ ໃນປະເທດ ເກົາຫລີໃຕ້. ຖ້າຫາກວ່າ ພວກຂະເຈົ້າ ຖືກຈັບ ແລະ ຖືກສົ່ງກັບ ເກົາຫລີເໜືອ, ພວກຂະເຈົ້າ ອາດປະເຊີນກັບ ການລົງໂທດ ຢ່າງສາຫັດ.
ທ່ານ ຟີລ ໂຣເບີດເຊິນ, ຮອງອຳນວຍການ ສິທທິມະນຸສ ໃນເຂດເອເຊັຍ, ເວົ້າວ່າ ປະເທດລາວ ແລະ ຈີນ ໄດ້ສະແດງ ທ່າທີ່ ບໍ່ສົນໃຈ ກັບເຣື້ອງ ສິທທິມະນຸສ ໂດຍ ອະນຸຍາດ ໃຫ້ ຣັຖບານ ເກົາຫລີເໜືອ ບັງຄົບ ໃຫ້ສົ່ງ ຊາວເກົາຫລີ ເໜືອ 9 ຄົນ ກັບຄືນປະເທດ ປາສຈາກ ໃຫ້ພວກຂະເຈົ້າ ໄດ້ຮັບ ຖານະ ອົພຍົບ ແຕ່ຢ່າງໃດ. ສະນັ້ນ, ຣັຖບານ ທັງ 3 ປະເທດ ຄວນຮັບຜິດຊອບ ຖ້າຫາກວ່າ ຊາວເກົາຫລີ ເໜືອ ເຫລົ່ານີ້ ໄດ້ຮັບ ອັນຕຣາຍ.
ອົພຍົບ ເກົາຫລີເໜືອ 9 ຄົນ ຖືກຈັບ ຢູ່ໃນ ປະເທດລາວ ປະມານ 3 ສັປດາ ຜ່ານມາ ກ່ອນຖືກສົ່ງ ໄປປະເທດຈີນ ເມື່ອວັນຈັນ ຜ່ານມາ ແລະ ຈາກນັ້ນ ພວກຂະເຈົ້າ ຖືກສົ່ງຕໍ່ ໃຫ້ກັບ ເກົາຫລີເໜືອ ໃນມື້ຕໍ່ມາ.
