ຣັຖມົນຕຣີ ການ ຕ່າງປະເທດ ເກົາຫລີໃຕ້ ຈະພົບກັບ ຣັຖມົນຕຣີ ການ ຕ່າງປະເທດ ສປປ ລາວ ເພື່ອຫາຣື ກ່ຽວກັບ ເດັກນ້ອຍ ລີ້ພັຍ ເກົາຫລີເໜືອ 9 ຄົນ ທີ່ ຖືກສົ່ງກັບ ປະເທດ ໂດຍ ທາງການ ລາວ.
ທ່ານ Yun Byung-se ຣັຖມົນຕຣີ ການ ຕ່າງປະເທດ ເກົາຫລີໃຕ້ ມີແຜນ ຈະພົບກັບ ທ່ານ ທອງລຸນ ສີສຸລິດ ຣັຖມົນຕຣີ ການ ຕ່າງປະເທດ ສປປລາວ ເພື່ອຫາຣື ໃນກໍຣະນີ ທີ່ ທາງການລາວ ໄດ້ສົ່ງຊາວ ເກົາຫລີເໜືອ 9 ຄົນ ກັບຄືນ ປະເທດ ເມື່ອມໍ່ໆມານີ້ ຕາມຣາຍງານ ຂ່າວ Yonhap. ການພົບປະ ຣະຫວ່າງ ທ່ານ ທອງລຸນ ແລະ ທ່ານ Yun ຈະມີຂຶ້ນ ຢູ່ນອກ ກອງປະຊຸມ ຣັຖມົນຕຣີ ການຕ່າງປະເທດ ແລະ ຜູ້ຕາງໜ້າ ບັນດາ ປະເທດ ອະເມຣິກາ ລາຕິນ ແລະ ເອເຊັຽ ຕາເວັນ ອອກ ໃນວັນທີ 12 ແລະ 13 ມິຖຸນາ ນີ້ ທີ່ເກາະບາຫລີ ປະເທດ ອິນໂດເນເຊັຽ.
ເຈົ້າໜ້າທີ່ ເກົາຫລີໃຕ້ ເວົ້າວ່າ ຊາວ ເກົາຫລີເໜືອ 9 ຄົນ ຊຶ່ງເຊື່ອກັນວ່າ ເປັນເດັກກໍາພ້າ ແລະ ມີອາຍຸ ຣະຫວ່າງ 14 ຫາ 18 ປີ ນັ້ນ ຖືກຈັບ ຢູ່ລາວ ເມື່ອວັນທີ 10 ພຶສພາ ຜ່ານມາ ໃນຂໍ້ຫາ ເຂົ້າເມືອງ ຜິດກົດໝາຍ ຈຶ່ງຖືກສົ່ງກັບ ໄປຈີນ ໃນວັນທີ 27 ພຶສພາ ແລະ ໃນມື້ຕໍ່ມາ ກໍຖືກສົ່ງກັບ ເກົາຫລີເໜືອ ຊຶ່ງເປັນບ່ອນ ທີ່ພວກເຂົາ ຈະຕ້ອງ ປະເຊີນກັບ ການລົງໂທດ ຂັ້ນໜັກໜ່ວງ. ແລະວ່າ ຣັຖບານ ເກົາຫລີໃຕ້ ມີແຜນການ ຂຍາຍການ ຮ່ວມມື ຫລາຍຣະດັບ ກັບ ຣັຖບານ ລາວ ເພື່ອ ຄວາມເຂົ້າໃຈກັນ ຫລາຍຂຶ້ນ ກ່ຽວກັບ ບັນຫາ ຊາວ ເກົາຫລີເໜືອ ທີ່ໂຕນໜີ ອອກຈາກ ປະເທດ. ກະຊວງການ ຕ່າງປະເທດ ເກົາຫລີໃຕ້ ໄດ້ຮຽກຮ້ອງ ໃຫ້ ເກົາຫລີເໜືອ ຮັບປະກັນ ຄວາມປອດພັຍ ຂອງຊາວ ເກົາຫລີ ເໜືອ ທີ່ຖືກ ສົ່ງກັບນັ້ນ.
ຂ່າວຢອນຮັບ ຣາຍງານ ຕື່ມວ່າ ສະມາຊິກ ສະພາຜູ້ແທນ ເກົາຫລີໃຕ້ ທ່ານ Kim Jae-won ມີແຜນການ ຢ້ຽມຢາມລາວ ໃນ ວັນພະຫັດ ນີ້ ແລະ ຈະພົບປະກັບ ເຈົ້າໜ້າທີ່ ພັກ-ຣັຖ ຂອງລາວ ເພື່ອຂໍໃຫ້ ຮັບປະກັນ ວ່າ ຊາວເກົາຫລີ ເໜືອ ທີ່ໂຕນໜີມາ ຄືດັ່ງ ຊາວໜຸ່ມ 9 ຄົນ ນັ້ນ ຈະບໍ່ຖືກ ສົ່ງກັບຄືນອີກ.
ຂ່າວ Korea Times ກໍຣາຍງານວ່າ ໃນຣະຫວ່າງ ການປະຊຸມ ສຸດຍອດ ທີ່ຣັຖ California ສະຫະຣັຖ ອະເມຣິກາ ເປັນທີ່ ຄາດກັນວ່າ ປະທານາທິບໍດີ Barack Obama ຈະຮຽກຮ້ອງ ໃຫ້ ປະທານ ປະເທດຈີນ Xi Jinping ຫລີກລ້ຽງ ການບັງຄັບ ຊາວ ເກົາຫລີເໜືອ ໃຫ້ກັບຄືນ ປະເທດ ຂອງ ພວກເຂົາ ແລະ ໃຫ້ປະຕິບັດ ຕໍ່ພວກເຂົາ ແບບມີ ມະນຸສທັມ.
