ທ່ານ ກິມຈົງອຸນ ເປັນຜູ້ ອອກຄຳສັ່ງ ໃຫ້ນັກສືບລັບ ຕິດຕາມ ນໍາເອົາ ເດັກນ້ອຍ ລີ້ພັຍ ເກົາຫລີເຫນືອ ກັບຄືນ ຈາກ ສປປລາວ.
ລາຍງານ ຈາກ ສະຖານີ ວິທຍຸ ເກົາຫລີເຫນືອ ເສຣີ ໃນມື້ວັນຈັນ ແຈ້ງວ່າ ຜູ້ນຳ ເກົາຫລີເຫນືອ ທ່ານ ກິມຈົງອູນ ເປັນຜູ້ ອອກຄຳສັ່ງ ໃຫ້ ນັກສືບລັບ ນໍາເອົາ ເດັກນ້ອຍ ຜູ້ລີ້ພັຍ ເກົາຫລີເຫນືອ 9 ຄົນ ທີ່ຖືກຈັບ ໃນລາວ ກັບຄືນ ເກົາຫລີເຫນືອ.
ສະຖານີ ວິທຍຸ ດັ່ງກ່າວ ລາຍງານ ຕໍ່ໄປວ່າ ເດັກນ້ອຍ ເກົາຫລີເຫນືອ 9 ຄົນ ຜູ້ ທີ່ມີອາຍຸ ຣະຫວ່າງ 15-23 ປີ ໃນເວລານີ້ ຖືກຂັງໄວ້ ໃນບ່ອນທີ່ ໂດດດ່ຽວ ໃກ້ກັບ ກຸງປີອົງຢັງ ເມືອງຫລວງ ຂອງ ເກົາຫລີເຫນືອ. ແຫລ່ງຂ່າວ ຈາກ ກຸງ ປີອົງຢັງ ລາຍງານວ່າ ກຸ່ມດັ່ງກ່າວ ໄດ້ມາເຖິງ ບ້ານພັກຂອງແຂກ ຂອງ ຣັຖບານ ຊູນານ ໃນວັນທີ 29 ພຶສພາ ແລະ ໃນເວລານີ້ ກຳລັງ ຖືກອົບຮົມ ສຳມະນາ ກ່ຽວກັບ ນະໂຍບາຍ ພັກຣັຖ ຢູ່.
ຄຳສັ່ງ ຈາກ ຣະດັບສູງສຸດ ໃຫ້ນັກສືບລັບ ເອົາເດັກນ້ອຍ ລີ້ພັຍ ເກົາຫລີເຫນືອ ກັບຄືນ ປະເທດ ດ້ວຍວິທີ ໃຊ້ ໃບຜ່ານແດນ ແບບນັກການທູດ ເພື່ອເຂົ້າເຖິງ ເດັກນ້ອຍ ກຸ່ມດັ່ງກ່າວ ໄດ້ງ່າຍ ແລະ ວ່ອງໄວ. ເດັກນ້ອຍ ລີ້ພັຍ ເກົາຫຼີເຫນືອ 9 ຄົນ ມີຂ່າວວ່າ ເປັນເດັກກຳພ້າ ໄດ້ລັກ ເຂົ້າມາລາວ ໃນມື້ວັນ 10 ພຶສພາ ຫລັງຈາກ ໄດ້ພາກັນ ເດີນທາງ ແສນລຳບາກ ຈາກຈີນ ແຕ່ຖືກ ທາງການລາວ ຈັບສົ່ງກັບຄືນ ເກົາຫລີເຫນືອ ບ່ອນທີ່ ຂະເຈົ້າ ຈະປະເຊີນ ກັບການລົງໂທດ ຢ່າງຫນັກ.
