ການໂຍກຍ້າຍ ເມືອງ ກະລຶມ ແຂວງ ເຊກອງ ໄປຕັ້ງຢູ່ ບ່ອນໃໝ່ ຍັງ ປະຕິບັດ ບໍ່ໄດ້ດີ ຕາມແຜນ ທີ່ວາງອອກ ຍ້ອນວ່າ ສໍາເຣັດໄປ ໄດ້ພຽງ 24% ແຕ່ ຄາດໝາຍວ່າ ຈະເຮັດໃຫ້ໄດ້ 70% ເມື່ອໝົດປີ 2013 ເຖິງແມ່ນວ່າ ປະຊາຊົນ ຈໍານວນ ບໍ່ໜ້ອຍ ບໍ່ພ້ອມ ທີ່ຈະໂຍກຍ້າຍ ກໍຕາມ. ດັ່ງ ເຈົ້າໜ້າທີ່ ກະຊວງ ໂຍທາທິການ ແລະ ຂົນສົ່ງ ເວົ້າເຖິງ ຄວາມຄືບໜ້າ ຂອງ ໂຄງການນີ້ວ່າ:
"ໂຄງການກໍ່ສ້າງ ທີ່ພວກເຮົາ ໄດ້ຣາຍງານ ໃຫ້ ຂັ້ນເທີງ ເພີ່ນຮັບຮູ້ ຈໍານວນນຶ່ງ ເຂົາກໍຍ້າຍ ຈໍານວນນຶ່ງ ເຂົາກໍຍ້າຍ ເຂົ້າມາອີກ 36 ເດືອນ ຈົນຮອດປີ 2014 ພຸ້ນແຫລະ".
ທ່ານເວົ້າ ຕໍ່ໄປວ່າ ຈໍານວນ ປະຊາກອນ ຢູ່ ເມືອງກະລຶມ ປ່ຽນແປງ ຢູ່ຕລອດ ມີຈໍານວນນຶ່ງ ກໍຍ້າຍເຂົ້າມາ ຢູ່ຕື່ມ. ການເອົາຕົວເລກ ເພື່ອໃຫ້ ຄ່າຊົດເຊີຍ ຄວາມ ເສັຍຫາຍ ຍັງບໍ່ສໍາເຣັດ. ປັດຈຸບັນ ຍັງບໍ່ມີ ຜູ້ຍ້າຍໄປ ຢູ່ບ່ອນໃໝ໋ ທີ່ ທາງການ ອະນຸຍາດ ໃຫ້ ຍ້ອນວ່າ ຍັງບໍ່ທັນມີ ຄວາມພ້ອມ ທັງທີ່ດິນ ທໍາກິນ ແລະ ບ້ານເຮືອນຢູ່.
ຕາມເປົ້າໝາຍ ໝົດປີ 2013 ນີ້ ຈະສ້າງ ຣະບົບ ນໍ້າປະປາ ໃຫ້ແລ້ວ, ບຸກເບີກ ບ່ອນທໍາກິນ ໃຫ້ ປະຊາຊົນ ໄດ້ 60% ແລະ ຈະຊົດເຊີຍ ຄ່າເສັຍຫາຍ ໃຫ້ ປະຊາຊົນ ທີ່ໄດ້ຮັບ ຜົນກະທົບ 50% ແລະ ວຽກງານ ອື່ນໆ. ໂຄງການ ສ້າງ ເມືອງ ກະລຶມໃໝ່ ມີຂຶ້ນ ຍ້ອນຄາດວ່າ ຈະຖືກນໍ້າຖ້ວມ ຫລັງຈາກ ທີ່ ເຂື່ອນໄຟຟ້າ ເຊກອງ 4 ຖືກສ້າງຂຶ້ນ ແລະ ນໍາໃຊ້ແລ້ວ.
ເມືອງ ກະລຶມໃໝ່ ຈະຕັ້ງຢູ່ ຫ່າງຈາກ ເມືອງເກົ່າ 32 ກິໂລແມັດ, ຈະໃຊ້ ງົບປະມານ ໃນການ ກໍ່ສ້າງປະມານ ພັນຕື້ ກີບ ແລະ ຈະໂຍກຍ້າຍ ປະຊາຊົນ ປະມານ 4,500 ຄົນ
ຫາທາງໃຫ້ເຂົາເຈົ້າຍົກຍ້າຍຍ້ອນຢາກໄດ້ດິນ ຕອນເຫລົ່ານັ້ນສ້າງຜົນປະໂຫຍດໃຫ້ຕົນເອງແລະພັກພວກ
