ສະຖານທູດ ສະຫະຣັຖ ປະຈຳ ລາວ ອອກ ຖແລງການ ສະແດງ ຄວາມຫ່ວງໄຍ ແລະ ເນັ້ນໜັກ ໃນຄວາມ ປອດໄພ ຂອງ ທ່ານ ສົມບັດ ສົມພອນ.
ທ່ານ ສົມບັດ ສົມພອນ ນຶ່ງ ໃນບັນດາ ນັກ ພັທນາກອນ ຊຸມຊົນ ທີ່ດີເດັ່ນ ໃນ ສປປລາວ ຖືກລັກພາໂຕ ໃນຕອນແລງ ຂອງ ມື້ວັນທີ 15 ທັນວາ ປີ 2012 ຢູ່ຕໍ່ຫນ້າ ປ້ອມຍາມ ຕຳຣວດ ເສັ້ນທາງ ສາຍຫລັກ ກາງ ນະຄອນຫລວງ ວຽງຈັນ. ການລັກພາໂຕ ດັ່ງກ່າວ ແມ່ນຖືກ ບັນທຶກໄວ້ ໂດຍກ້ອງ ວົງຈອນປິດ ຂອງ ຣັຖບານ ລາວ. ເລີ້ມແຕ່ ມື້ນັ້ນມາ ເປັນເວລາ 6 ເດືອນ ບໍ່ສາມາດ ໃຫ້ຄໍາ ອະທິບາຍ ໄດ້ ສະຖານທູດ ສະຫະຣັຖ ທີ ນະຄອນຫລວງ ວຽງຈັນ ໄດ້ຮ່ວມມື ກັບ ພາກສ່ວນ ປະຊາຄົມ ສາກົນ ໄດ້ຢ້ຳເຖິງ ຄວາມເປັນຫວ່ງ ເປັນໄຍ ຕໍ່ຄວາມ ປອດພັຍ ແລະ ສວັດດີພາບ ຂອງ ທ່ານ ສົມບັດ ສົມພອນ.
ຕລອດ ຣະຍະ ຫລາຍປີ ທີ່ຜ່ານມາ ໃນການ ເຮັດວຽກງານ ກັບອົງການ ທີ່ ບໍ່ຂຶ້ນກັບ ຣັຖບານ ທ່ານ ສົມບັດ ສົມພອນ ກໍເປັນທີ່ ນັບຫນ້າຖືຕາ ຢ່າງກວ້າງຂວາງ ຜູ້ນຶ່ງ ທາງດ້ານ ຄວາມສງົບສຸກ ແລະ ໄຫວພິກ ທີ່ເປັນ ປະໂຫຍດ ທີ່ທ່ານ ໄດ້ທຸ້ມເທ ເຮືອແຮງ ເຂົ້າໃນການ ປັບປຸງ ປະເທດ ແລະ ການດຳຣົງ ຊິວິດ ຂອງ ຍາດພີ່ນ້ອງ ຊາວລາວ ຂອງທ່ານ. ແຕ່ຫນ້າເສັຽໃຈ ການ ຮຽກຮ້ອງ ຫລາຍຄັ້ງ ຈາກອົງການ ຈັດຕັ້ງ ສາກົນ ແລະ ຣັຖບານ ປະເທດ ຕ່າງໆ ໃນໂລກ ທີ່ ຣັຖບານລາວ ຍັງບໍ່ປ່ອຍ ຂໍ້ມູນຢ່າງ ກະຈ່າງແຈ້ງ ເທົ່າທີ່ຄວນ ເຊັ່ນ ຣະຫວ່າງ ການຖແລງ ຂ່າວ ໃນວັນທີ 7ເດືອນ ມີຖຸນາ ຜ່ານມາ ກ່ຽວກັບ ການສືບສວນ ຢ່າງ ເປັນທາງການ. ທາງການລາວ ຍັງບໍ່ໄດ້ ສເນີໃຫ້ ສະມາຊິກ ຄອບຄົວ ຂອງ ທ່ານ ສົມບັດ ແລະ ບັນດາ ຜູ້ຕ່າງ ຫນ້າຈາກ ອົງການ ຈັດຕັ້ງ ສາກົນ ມີໂອກາດ ເບີ່ງກ້ອງວົງຈອນ ປິດຄືນ ຂອງ ຣັຖບານລາວ ທີ່ ໄດ້ລາຍງານ ໃຫ້ເຫັນ ກ່ຽວກັບ ສະພາບການ ລັກພາໂຕ ຂອງ ທ່ານ ສົມບັດ ສົມພອນ ຢ່າງລະອຽດ.
ການຫາຍສາບສູນ ຂອງທ່ານ ສົມບັດ ສົມພອນນັ້ນ ເຮັດໃຫ້ ຄວາມຊົງຈຳ ໃນເມື່ອກ່ອນ ກັບຄືນມາ ເມຶ່ອການ ຫາຍສາບສູນ ທີ່ ບໍ່ສາມາດ ອະທິບາຍ ໄດ້ນັ້ນ ກາຍເປັນເຣື້ຶ້ອງ ທັມມະດາ ໃນລາວ. ຄວາມຫຼົ້ມແຫຼວ ໃນການ ສືບສວນ ກ່ຽວກັບ ຄະດີ ດັ່ງກ່າວ ທີ່ ທາງການລາວ ໄດ້ດຳເນີນ ມານັ້ນ ສາມາດ ສ້າງຄວາມ ເຊຶ່ອມເສັຽ ໃຫ້ແກ່ຄວາມ ກ້າວຫນ້າ ທີ່ ທາງການລາວ ໄດ້ເຮັດມາ ເປັນເວລາ ຫລາຍປີ.
