ນັກການທູດ ຕ່າງປະເທດ ເວົ້າວ່າ ນັກເຄື່ອນໄຫວ ຄົນສຳຄັນ ທ່ານ ສົມບັດ ສົມພອນ ອາດເສັຽຊິວິດ ແລ້ວ.
ເປັນເວລາ ກວ່າ 6 ເດືອນ ຫລັງຈາກ ທ່ານສົມບັດ ສົມພອນ ຫາຍສາບສູນໄປ ກຸ່ມ ນັກການທູດ ຕ່າງປະເທດ ທີ່ ນະຄອນຫລວງ ວຽງຈັນ ຄິດວ່າ ທ່ານ ອາດ ເສັຽຊິວິດ ແລ້ວ. ທ່ານ ສົມບັດ ສົມພອນ ຖືກຢຸດຣົຖ ໂດຍ ຕຳຣວດ ທີ່ ນະຄອນຫລວງ ວຽງຈັນ ໃນ ແລງຂອງ ວັນທີ 15 ທັນວາ 2012 ຫລັງຈາກນັ້ນ ກໍບໍ່ເຫັນ ທ່ານເລີຍ ກ້ອງ ວົງຈອນປິດ ຂອງທາງການ ໃນມື້ນັ້ນ ໄດ້ ສະແດງ ໃຫ້ເຫັນຮູບພາບ ຂອງທ່ານ ຖືກຄົນ ເອົາຂຶ້ນຣົຖ ອີກ ຄັນນຶ່ງ ໄປ.
ອິງຕາມ ຂໍ້ມູນ ຈາກກຸ່ມ ນັກການທູດ ຕ່າງປະເທດ ຜູ້ ທີ່ບໍ່ປະສົງ ອອກຊື່ ເວົ້າວ່າ ຈາກ ການໂອ້ລົມ ກັບ ເຈົ້າຫນ້າທີ່ ລາວ ຮ່ວມທັງ ເຈົ້າຫນ້າທີ່ ຝ່າຍທະຫານ ຜູ້ທີ່ ມີສ່ວນພົວພັນ ກັບ ຂັ້ນສູງ ໃນລາວ ໃຫ້ ຄວາມເຫັນວ່າ ການມີຊິວິດ ລອດ ຂອງ ທ່ານ ສົມບົດ ສົມພອນ ນັ້ນ ມີຫນ້ອຍ.
ເຈົ້າຫນ້າທີ່ ລາວ ໄດ້ອອກບົດ ລາຍງານ ຄວາມບໍ່ຄືບຫນ້າ ສະບັບ ທີສາມ ກ່ຽວກັບ ການສືບຫາ ທ່ານ ສົມບັດ ສົມພອນ ວ່າງຫລັງໆ ມານີ້ ຫລັງຈາກ ທີ່ ທ່ານ ຫາຍສາບສູນໄປ ເປັນເວລາ ກວ່າ 6 ເດືຶອນ.
ນັກການທູດ ຕ່າງປະເທດ ໃຫ້ການ ສັນນິຖານ ວ່າ ທ່ານ ສົມບັດ ສົມພອນ ອາດ ຈະຖືກຂ້າ ໂດຍ ກຸ່ມທີ່ມີ ສ່ວນພົວພັນ ກັບ ຣັຖບານ ແລະວ່າ ແຫລ່ງຂ່າວ ທີ່ ຫນ້າເຊື່ອຖືໄດ້ ບອກວ່າ ທ່ານ ສົມບັດ ສົມພອນ ຖືກກຳຈັດແລ້ວ.
