ອົງການ ທີ່ບໍ່ສັງກັດ ຣັຖບານ ໃນ ປະເທດໄທ ຢາກໃຫ້ ທາງການລາວ ອະທິບາຍ ເຣື່ອງ ເຈົ້າໜ້າທີ່ ຕໍາຣວດ ຢຸດຣົດ ທ່ານ ສົມບັດ ສົມພອນ.
ເມື່ອວັນທີ 15 ກໍຣະກະດາ 2013 ອົງການ ທີ່ ບໍ່ສັງກັດ ຣັຖບານ NGO ໄທ ທີ່ ບາງກອກ ໄດ້ຈັດການ ບັນລະຍາຍ ກ່ຽວກັບ ການຫາຍສາບສູນ ຂອງ ທ່ານ ສົມບັດ ສົມພອນ ຄົບຮອບ 7 ເດືອນ ພາຍໃຕ້ຫົ ວຂໍ້ “ການບັງຄັບ ໃຫ້ສູນຫາຍ ກັບ ທາງເລືອກ ສັນຕິວິທີ“. ຍານາງ ປະທັບຈິດ ນີລະຈິດ ຜູ້ຕາງໜ້າ ສະຫະພັນ ຕໍ່ຕ້ານ ການບັງຄັບ ໃຫ້ສູນຫາຍ ແຫ່ງ ເອເຊັຍ ກ່າວຕອນນຶ່ງ:
"ນາງວ່າ ເຫັນໄດ້ ວ່າ ຕໍາຣວດ ເອີ້ນ ຣົດ ທ່ານ ສົມບັດ ເຂົ້າໄປ ແລະ ຄົນ ທີ່ ເອີ້ນທ່ານ ເຂົ້າໄປນັ້ນ ເຖິງຈະອ້າງ ໃນ ພາຍຫຼັງວ່າ ບໍ່ເປັນຄົນ ເອົາ ທ່ານ ສົມບັດ ໄປ ແຕ່ເຂົາ ກໍເປັນ ເຈົ້າໜ້າທີ່ ຂອງ ຣັດ ຊຶ່ງຣັດ ກໍ ຈໍາເປັນ ທີ່ຈະຕ້ອງ ຕອບຄໍາຖາມ ນີ້ ຢ່າງໜ້ອຍ ທີ່ສຸດ ຕ້ອງນໍາຫາວ່າ ຄົນ ທີ່ເອີ້ນ ທ່ານ ສົມບັດ ເຂົ້າໄປ ແລ້ວຫາຍ ໄປນັ້ນ ຢູ່ໃສ?"
ນາງກ່າວ ຕໍ່ໄປວ່າ ເຖິງແມ່ນ ຣັຖບານ ລາວ ເວົ້າວ່າ ຕົນ ບໍ່ມີສ່ວນ ກ່ຽວຂ້ອງ ກັບ ການຫາຍສາບສູນ ຂອງ ທ່ານ ສົມບັດ ກໍຕາມ ແຕ່ ກໍເຫັນໄດ້ ແຈ່ມແຈ້ງ ວ່າ ຜູ້ທີ່ສັ່ງ ໃຫ້ ທ່ານ ສົມບັດ ຢຸດຣົດ ໃນ ວັນທີ 15 ທັນວາ 2012 ນັ້ນແມ່ນ ເຈົ້າໜ້າທີ່ ຂອງ ຣັຖບານລາວ. ດັ່ງນັ້ນ ຣັຖບານ ລາວ ຈຶ່ງຕ້ອງ ຮັບຜິດຊອບ ຕໍ່ສິ່ງທີ່ ເກີດຂຶ້ນ. ການ ປະຕິເສດ ຂອງ ທາງການລາວ ຍິ່ງເຮັດໃຫ້ ຊາວເອເຊັຍ ສັບສົນ ກັບ ເຣື່ອງ ທີ່ເກີດຂຶ້ນ.
ກ່ຽວກັບ ເຣື້ອງ ທີ່ວ່ານີ້ ຜູ້ສື່ຂ່າວ ໄດ້ຕິດຕໍ່ ໄປຍັງ ທາງການລາວ ເພື່ອ ຂໍຄວາມເຫັນ ແລະ ກໍໄດ້ ຄໍາຕອບ ຈາກ ເຈົ້າໜ້າທີ່ ທີ່ ຂໍສະຫງວນຊື່ ທ່ານນຶ່ງ ເວົ້າວ່າ ປັດຈຸບັນ ທາງການ ລາວ ກໍາລັງ ສືບສວນ ສອບສວນ ຫາ ທ່ານ ສົມບັດ ທຸກມື້ ແລະ ບໍ່ໄດ້ລົດ ຄວາມສໍາຄັນ ລົງ ແຕ່ຢ່າງໃດ. ທ່ານ ບໍ່ໄດ້ເວົ້າ ເຖິງ ເຈົ້າໜ້າທີ່ ຕໍາຣວດ ຜູ້ທີ່ສັ່ງ ຢຸດ ຣົດທ່ານ ສົມບັດ ນັ້ນ.
