ລາວໂຮມລາວ ເພື່ອປະຊາທິປະໄຕ

ໄພອັນຕະລາຍ ຕໍ່ສັງຄົມ

Corruption ເປັນໄພອັນຕະລາຍອັນໃຫຍ່ຫລວງທີ່ສຸດໃນລະບົບເສດຖະກິດມະຫາພາກ ຊຶ່ງໃຜ ໆ ກໍ່ຮູ້ດີ, ຫາກຈະອ້າງວ່າ ໃນໂລກມີການ Corruption ທຸກ ໆ ປະເທດກໍ່ຖືກ
ຢູ່, ແຕ່ມັນຕ່າງກັນບ່ອນວ່າ ອັດຕາການ Corruption ໃນແຕ່ລະປະເທດນັ້ນ ມີຄວາມແຕກຕ່າງ ໜ້ອຍຫຼາຍກວ່າກັນເທົ່າໃດທໍ່ນັ້ນ. ພວກເຮົາຍັງຈະພູມໃຈຢູ່ບໍວ່າ ປະເທດອື່ນຍັງມີ
ການ corruption ຄືກັນກັບປະເທດເຮົາ? Corruption ເປັນສິ່ງກີດຂວາງ ແລະ ເປັນເຫດການທີ່ພາໃຫ້ເກີດຄວາມເລື່ອມລ້ຳຕ່ຳສູງໃນສັງຄົມ, ເຮັດໃຫ້ລະດັບຊີວິດການເປັນຢູ່
ຂອງປະຊາຊົນໃນທົ່ວປະເທດເຮົາ ນັບມື້ ນັບຫ່າງອອກຈາກກັນ, ກຸ່ມຄົນນຶ່ງກາຍເປັນຄົນຂໍທານຕາມຂ້າງຖະໜົນ ແຕ່ກົງກັນຂ້າມ ກຸ່ມຄົນນຶ່ງ ພັດດຳລົງຊີວິດຢູ່ໃນແສງສີ ຟຸ້ມເຟີ້ ຊຶ່ງຈະເປັນສາເຫດພາໃຫ້ມີຄວາມແຕກແຍກກັນໃນສັງຄົມ, ເປັນສາເຫດເຮັດໃຫ້ລະບົບບໍລິຫານງານຂອງລັດອອ່ນແອລົງ ຍ້ອນຂາດງົບປະມານທີ່ຈະນຳມາບໍລິຫານປະເທດຊາດ, ຈະເຮັດໃຫ້ສັດຕູທີ່ຈ້ອງມອງເຮົາ ເຫັນຈຸດອອ່ນ ແລະ ຊ່ອງຫວ່າງຂອງເຮົາ. ໃນປະຫວັດສາລາວເຮົາກໍ່ເຄີຍພົບພໍ້ມາຫຼາຍສະໄຫມແລ້ວ. ແຕ່ກ່ອນຊົນຊາດລາວ ມີຖິ່ນຖານຢູ່ເຂດປະເທດຈີນ, ສຸດທ້າຍກໍ່ຖືກໄລ່ຕ້ອນລົງມາຕັ້ງຖິ່ນຖານຢູ່ບ່ອນນີ້ ສາເຫດກໍ່ຍ້ອນບໍ່ມີຄວາມສາມະຄີກັນ, ມີແນວຄິດທີ່ມັກສະຫງົບສ່ວນຕົວເກີນຂອບເຂດ, ມີແນວຄິດເອົາຕົວລອດເປັນຍອດດີ, ໃຜເຮັດຫຍັງຜິດກໍ່ບໍ່ຢາກເວົ້າ. ເມື່ອຖາມເຖິງຄວາມຮັກຊາດ, ທຸກຄົນກໍ່ອອກປາກເປັນສຽງດຽວວ່າ...ຮັກຊາດ...ແຕ່ໃນທາດແທ້ແລ້ວ ຄົນບາງກຸ່ມ ພັດເອົາຄຳວ່າ...ຮັກຊາດ...ມາບັງໜ້າເພື່ອຍາດເອົາຄວາມໄວ້ເນື້ອເຊື່ອໃຈຈາກພັກ ຈາກຂັ້ນເທິງ ເພື່ອສວຍໂອກາດເປັນຊ່ອງທາງໃນການໂກງກິນ.
- ເຖິງເວລາແລ້ວທີ່ທຸກຄົນຕ້ອງມີຄວາມສຳນຶກ, ໂດຍສະເພາະຜູ້ທີ່ມີແນວຄິດ ແລະ ການກະທຳທີ່ຫຍໍ້ທໍ້ນັ້ນ ຕ້ອງລົດ ຕ້ອງເລີກ ຕ້ອງລະ, ໃຫ້ເອົາແຕ່ພໍພຽງ ກໍ່ພໍແລ້ວ, ເຖິງວ່າທ່ານຈະໄດ້ຊັບສິນມາກມາຍມະຫາສານກໍ່ຕາມ ແຕ່ສິ່ງທີ່ທ່ານໄດ້ມານັ້ນ ກໍ່ບໍ່ພາໃຫ້ທ່ານມີຄວາມສຸກໃຈອັນແທ້ຈິງດອກ, ເພາະສິ່ງທີ່ທ່ານໄດ້ມານັ້ນ, ໃນໃຈຂອງທ່ານເອງກໍ່ຮູ້ຢູ່ແລ້ວວ່າ ທ່ານໄດ້ມາຈາກໃສກັນແທ້? ແລະ ທຸກມື້ ທຸກວັນກໍ່ຕ້ອງລະແວງ ແລະ ຄິດວ່າຊັບທີ່ໄດ້ມານັ້ນ ຕົນເອງຈະໄດ້ໃຊ້ມັນຫຼືບໍ?
ເພາະທ່ານໄດ້ມາໃນທາງທີ່ບໍ່ຊອບທຳ.
- ເຖິງເວລາແລ້ວ ທີ່ຜູ້ກະທຳຜິດຕ້ອງລະອາຍໃຈ ແລະ ເລີກການກະທຳຜິດ.
- ເຖິງເວລາແລ້ວ ທີ່ຜູ້ມີອຳນາດຕ້ອງໃຊ້ມາດຕະການຢ່າງເດັດຂາດໃນເຫດການນີ້, ດີກວ່າຈະປ່ອຍປະໃຫ້ຜູ້ກະທຳຜິດສືບກະທຳຜິດຕໍ່ໄປອີກ. ໃຫ້ຄິດໄວ້ວ່າ ປະຊາຊົນລໍຄອຍຢູ່.
- ເຖິງເວລາແລ້ວ ທີ່ທຸກຄົນໃນສັງຄົມຕ້ອງເດັດດ່ຽວລຸກຂຶ້ນຕໍ່ສູ້ກັບສັດຕູໂຕຮ້າຍກາດນີ້ຢ່າງສຽບຂາດ.