ສປປລາວ ຍັງປະເຊີນ ກັບ ການທ້າທາຍ ກ່ຽວກັບ ການຂາດ ງົບປະມານ ການໃຊ້ຈ່າຍ ທາງດ້ານ ບໍຣິການ ສາທາຣະນະສຸຂ.
ເຖິງແມ່ນວ່າ ຈະມີຄວາມ ຄືບຫນ້າ ທາງ ດ້ານເສຖກິດ ສປປລາວ ຍັງສືບຕໍ່ ເປັນປະເທດ ທີີ່ໃຫ້ ບໍຣິການ ທາງດ້ານ ສຸຂພາບ ແມ່ແລະເດັກ ທີ່ຕ່ຳທີ່ສຸດ ໃນໂລກ ແລະ ໃນຂົງເຂດ ເອເຊັຽ ປາຊິຟິກ.ການບໍຣິການ ທີ່ຕ່ຳ ແລະ ຂາດ ຄຸນນະພາບ ດັ່ງກ່າວ ແມ່ນເປັນຍ້ອນ ຜົລສະທ້ອນ ຈາກ ງົບປະມານ ທາງດ້ານ ສາທາຣະນະສຸຂ ຂອງ ຣັຖບານ ບໍ່ພຽງພໍ ແລະ ບໍ່ໄດ້ ມາຕຖານ ເພາະ ທາງການລາວ ໄດ້ ອະນຸມັດ ພຽງແຕ່ 1.1% ຂອງ GDP ສຳລັບ ໃຊ້ຈ່າຍໃນ ຜແນກ ສາທາຣະນະສຸຂ ຂອງປະເທດ.
ຄ່າປິ່ນປົວ ສ່ວນໃຫຍ່ ແມ່ນຄົນໄຂ້ ແລະ ຄອບຄົວ ຂອງຜູ້ປ່ວຍ ເປັນຜູ້ຈ່າຍ ເອົາເອງ ຈຶ່ງເຮັດໃຫ້ ປະຊາຊົນ ຈຳນວນ ຫລວງຫລາຍ ບໍ່ສາມາດ ເຂົ້າເຖິງ ການ ບໍຣິການ ທາງດ້ານ ສາທາຣະນະສຸຂ ທີ່ຈຳເປັນ ຂອງ ຣັຖບານໄດ້ ຍ້ອນຄວາມ ທຸກຍາກ.
ການບໍຣິຈາກ ຈາກ ອົງການ ສາກົນ ມີຄວາມສຳຄັນ ຕໍ່ງົບປະມານ ທາງດ້ານ ສາທາຣະນະສຸຂ ໃນລາວ ຢ່າງຍີ່ງ ແຕ່ການ ບໍຣິຈາກ ດັ່ງກ່າວ ມີຂອບເຂດ ຈຳກັດ ແລະ ກໍບໍ່ມີ ຢູ່ຕຣອດ ດ່ັງນັ້ນ ຣັຖບານລາວ ຈຶ່ງມີແຜນ ເພີ້ມ ງົບປະມານ ການໃຊ້ຈ່າຍ ສຳລັບ ການ ບໍຣິການ ດ້ານ ສາທາຣະນະສຸຂ ໃນລາວ ໃຫ້ເປັນໄປຕາມ ສັດສ່ວນ ຂອງ ງົບປະມານ ແຫ່ງຊາດ ຄື ຈາກ 4.3% ໃນປັດຈຸບັນ ໄປເປັນ 9 % ໃນ ອະນາຄົດ.
