ລາວໂຮມລາວ ເພື່ອປະຊາທິປະໄຕ

ຊັບສິນເກັບເງິນບໍ່ໂປ່ງໃສ

ຮຽນ : ທ່ານລັດຖະມົນຕີວ່າການກະຊວງການເງິນ, ທ່ານ ຫົວໜ້າ ກົມຄຸ້ມຄອງຊັບສິນ, ທ່ານ ຫົວໜ້າ ພະແນກການເງິນ ນວ
ຂ້າພະເຈົ້າໃນນາມຜູ້ປະກອບການນຳເຂົ້າພາຫານະເປັນເວລາດົນນານສົມຄວນ ຢາກມີຄຳເຫັນກ່ຽວກັບການຈົດທະບຽນເອກະສານຂອງ ຫ້ອງການຊັບສິນນະຄອນຫລວງ ໂດຍສະເພາະໜ່ວຍປະຈຳການຢູ່ສາງທ່ານາແລ້ງດັ່ງນີ້ :
ການຈັດຕັ້ງປະຕິບັດຜ່ານມາເຫັນວ່າຍັງມີຫລາຍຢ່າງບໍ່ສອດຄ່ອງ ແລະ ບໍ່ມີຄວາມໂປ່ງໃສເທົ່າທີ່ຄວນ,ຊຶ່ງສາມາດແຍກອອກເປັນແຕ່ລະປະເດັນດັ່ງນີ້ :
1. ການເສຍເງິນຄ່າບໍລິການ ເຫັນວ່າການເກັບເງິນແມ່ນມີ 03 ລັກສະນະ
- ເສຍເງິນຄ່າບໍລິການຊຸດນຶ່ງ 20,000ກີບຫລື ຫລາຍກວ່າຕາມແຕ່ກໍລະນີ ໂດຍມີໃບຮັບເງິນເປັນເຈ້ຍຂາວ A4 ທຳມະດາມີກາມົນຈ້ຳໃສ່(ບາງຄົນກໍໄດ້ບາງຄົນກໍບໍ່ໄດ້ ແຕ່ຕ້ອງເສຍທຸກໆຊຸດ) ບໍ່ຮູ້ວ່າເກັບໄປໃສເພາະບໍ່ໄດ້ໄປຖອກຄັງເງິນ ຊັບສິນເກັບເອງ
- ເສຍເງິນຕາມການຄິດໄລ່ຂອງພະນັກງານ ແຕ່ໄປມອບຢູ່ຄັງເງິນ ແລະ ຄັງເງິນອອກໃບຮັບເງິນໃຫ້
- ເສຍຄ່າໃບຮັບເງິນຂອງຄັງເງິນອີກ 5000ກີບຕໍ່ໃບ
ສະຫລຸບລວມແລ້ວຖ້ານຳເຂົ້າລົດຄັນນຶ່ງຢູ່ຂອດຊັບສິນຕ້ອງໄດ້ເສຍເງິນ 03 ບ່ອນ ພ້ອມດຽວກັນກໍເພີ້ມຂອດບໍລິການອີກ ໂດຍການຈ້ຳກາໃສ່ໃບແຈ້ງພາສີ ແລະ ອັດສຳເນົາເອກະສານອີກ ນີ້ບໍແຈ້ງການຂອງທ່ານລັດຖະມົນຕີເລກທີ 1325/ກງ ລົງວັນທີ 05/07/2013 ຂໍ້ທີ 3 ຂໍໃຫ້ທ່ານພິຈາລະນາຄືນແດ່ ຄືມາມີຫລາຍຂອດແທ້ ເຫັນໃຈຜູ້ປະກອບການພວກເຮົາແດ່.
ຕາມທັດສະນະສ່ວນຕົວແລ້ວຂ້າພະເຈົ້າເຫັນວ່າຍັງບໍ່ຈະແຈ້ງປານໃດໂດຍສະເພາະການເກັບເງິນໂດຍທີ່ບໍ່ໄດ້ອອກໃບຮັບເງິນ ແລະ ອອກໃບຮັບເງິນທີ່ເປັນເຈ້ຍA4 , ບໍ່ຮູ້ວ່າເກັບຄ່າຫຍັງກັນແທ້ ແລະ ເງິນຈໍານວນດັ່ງກ່າວເອົາໄປໃສ.ເປັນຫຍັງຄືເກັບຫລາຍຂອດແທ້ ສ້າງຄວາມຫຍຸ້ງຍາກໃຫ້ຜູ້ປະກອບການ . ສ່ວນກໍລະນີໄປຖອກຢູ່ຄັງເງິນ ຖືວ່າຈະແຈ້ງແລ້ວເຂົ້າງົບປະມານແນ່ນອນ. ຢາກຝາກຄຳຖາມຫາຜູ້ທີ່ໃສ່ນາມວ່າ “ ກົມຄຸ້ມຄອງຊັບສິນຂອງລັດ” ທີ່ອອກມາຕອບໃນເວບໄຊກະຊວງການເງິນວັນທີ 17/07/2013 ໂດຍສະເພາະຂໍ້ 4 , ທ່ານ ແນ່ໃຈແລ້ວບໍ່ ວ່າເງິນທີ່ເກັບເຂົ້າງົບປະມານທັງໝົດ? ການທີ່ທ່ານຟ້າວອອກມາຕອບໂດຍບໍ່ກວດສອບຂໍ້ມູນສາມາດຕີ ຄວາມໝາຍໄດ້ 2 ຢ່າງ ຄື ທ່ານມີເຈດຕະນາຢາກອອກມາປົກປ້ອງບາງສິ່ງບາງຢ່າງ ຫລື ຖ້າທ່ານບໍ່ມີສ່ວນໃດນຶ່ງ ສະແດງເຖິງການບໍ່ລົງໃກ້ຊິດຕິດແທດ ລໍຖ້າຟັງແຕ່ ການລາຍງານຢ່າງດຽວ ສະນັ້ນ ຖ້າຫາກທ່ານ ມີເວລາ ອ່ານຄຳເຫັນຂ້າພະເຈົ້າແລ້ວ ສະເໜີທ່ານລົງມາເບິ່ງຕົວຈິງແດ່ ຄິດວ່າບໍ່ໄກດອກ ແຕ່ ກົມຊັບສິນ ຫາດ່ານທ່າ ນາແລ້ງ ( ຖ້າແມ່ນໃນນາມກົມຄຸ້ມຄອງຊັບສິນຂອງລັດແທ້) ວ່າຄວາມຈິງເປັນຕາມຂ້າພະເຈົ້າເວົ້າມາບໍ່.
2. ການຈັດຕັ້ງປະຕິບັດກົດໝາຍ ວ່າດ້ວຍຊັບສິນຂອງລັດສະບັບປັບປຸງເລກທີ 14/ສພຊ ລົງວັນທີ 05/07/2012 ແລະ ລັດຖະບັນຍັດຂອງປະທານປະເທດເລກທີ 03/ປປທ ລົງວັນທີ 09/01/2008 ແລະ ເອກະສານອື່ນໆທີ່ກ່ຽວຂ້ອງເພາະມີຫລາຍສະບັບ ຕາມຄວາມເຂົ້າໃຈຂອງຂ້າພະເຈົ້າແລ້ວ ແມ່ນຕ້ອງໄດ້ຈັດຕັ້ງປະຕິບັດໃນ ຂອບເຂດ ທົ່ວປະເທດ ບໍ່ແມ່ນຈັດຕັ້ງສະເພາະນະຄອນຫລວງ ຫລື ດ່ານໃດນຶ່ງ ສະເພາະກົດໝາຍຊັບສິນປະກົດວ່າຫາກໍຮ່າງດຳລັດຢູ່ສາມາດຈັດຕັ້ງປະຕິບັດໄດ້ເລີຍບໍ ຂໍໃຫ້ທ່ານ ຜູ້ຮູ້ແທ້ອອກມາໃຫ້ຄວາມກະຈ່າງແຈ້ງແດ່. ເປັນຫຍັງຈຶ່ງຕັ້ງບັນຫານີ້ຂື້ນກໍເນື່ອງຈາກວ່າການຈັດຕັ້ງປະຕິບັດບໍ່ມີຄວາມເປັນເອກະພາບ ເຮັດໃຫ້ສັງຄົມບໍ່ມີຄວາມຍຸຕິທຳ ໂດຍສະເພາະຂອດການນຳເຂົ້າຢູ່ດ່ານອື່ນພັດບໍ່ໄດ້ເສຍຄ່າຫຍັງເພີ້ມ ແຕ່ນຳເຂົ້າຢູ່ດ່ານທ່ານາແລ້ງພັດໄດ້ເສຍຄ່າບໍລິການຈົດທະບຽນຊັບສິນເພີ້ມ, ຊຶ່ງເປັນການ ເພີ້ມຕົ້ນ ທືນຂອງສິນຄ້າ ສະນັ້ນເວລາພວກຂ້າພະເຈົ້າຂາຍລົດອອກກໍໄດ້ບວກເຂົ້າເພີ້ມ ສຸດທ້າຍກໍຕົກເປັນພາລະຂອງຜູ້ຊົມໃຊ້ ຫລື ຜູ້ຊື້ລົດ ບໍ່ແມ່ນຜູ້ນຳເຂົ້າ .ແຕ່ສ່ວນກະທົບຕໍ່ ຜູ້ນຳເຂົ້າແມ່ນຕົ້ນທືນຈະສູງກວ່າຜູ້ນຳເຂົ້າລາຍອື່ນໆ ທີ່ນຳເຂົ້າຢູ່ດ່ານອື່ນ, ເປັນການເພີ້ມຂອດບໍລິການອີກຂອດນຶ່ງ ແທນທີ່ຈະລົດຂອດບໍລິການ.
3. ຄວາມເໝາະສົມໃນການເພີ້ມຈຸດບໍລິການຢູ່ດ່ານຂອງຂະແໜງຊັບສິນ : ປະຈຸບັນລາວເຮົາໄດ້ເຂົ້າເປັນສະມາຊິກອົງການການຄ້າໂລກແລ້ວ ນັບແຕ່ເດືອນ 02/2013 ເປັນຕົ້ນມາ ແລະ ອີກບໍ່ເທົ່າໃດປີຂ້າງໜ້າພວກເຮົາກໍຈະໄດ້ເຂົ້າຮ່ວມປະຊາຄົມເສດຖະກິດອາຊຽນ(AEC) ໃນປີ 2015 ຍັງພຽງ 02 ປີ ກວ່າ ສະນັ້ນ ສະເໜີໃຫ້ການ ນຳທີ່ມີສ່ວນໃນການຕັດສິນໃຈ ສ້າງຕັ້ງຈຸດບໍລິການຂອງຂະແໜງຊັບສິນຢູ່ດ່ານພິຈາລະນາຄືນ ວ່າສົມຄວນຫລື ບໍ່ ?ມີນິຕິກຳອັນໃດທີ່ຮອງຮັບ ເພາະໃນໂລກນີ້ ຢູ່ດ່ານສາ ກົນໂດຍລວມເຂົາຈະມີສະເພາະ (CIQ=Customs&Immigration and Quarantine) ເຈົ້າໜ້າທີ່ພາສີ, ເຈົ້າໜ້າທີ່ ຕ ມ ແລະ ກັກກັນພືດເທົ່ານັ້ນ, ກົງກັນຂ້າມປະ ເທດເຮົາຮູ້ສຶກວ່າມີຫລາຍຂະແໜງການສົມຄວນ ສະນັ້ນ ເພື່ອໃຫ້ສອດຄ່ອງກັບລະບຽບການສາກົນ ກໍຄືຄຳສັ່ງຕ່າງໆ ຂອງຂັ້ນເທິງສະເໜີພິຈາລະນາຄືນໃໝ່ ຫລື ທ່ານ ຄິດວ່າເຮັດແບບບ້ານເຮົານີ້ລະເໝາະສົມແລ້ວພວກເຮົາເປັນນັກທຸລະກິດບໍ່ມີສິດເກີນກວ່າການສະເໜີ ແຕ່ຢາກໃຫ້ທ່ານໄປເອົາເນື້ອໃນສີ່ບຸກທະລຸມາທ່ອງຄືນໃໝ່ . ໄລຍະຜ່ານມາກໍເຫັນຫລາຍຂະແໜງ ການໄດ້ພະຍາຍາມສ້າງໜ່ວຍບໍລິການຢູ່ດ່ານ ແຕ່ແລ້ວກໍຍົກເລີກໄປ ໂດຍສະເພາະ ຄົມມະນາຄົມ ແລະ ການຄ້າ. ປະຈຸບັນພັດແມ່ນກະຊວງການເງິນເອງ ແຕ່ຄົງຈະຍົກເລີກຍາກ ເພາະ ໄດ້ຕັ້ງຂື້ນແລ້ວ.
4. ບໍ່ວ່າກໍລະນີໃດກໍຕາມ ຖ້າຂັ້ນເທິງຍັງຢືນຢັນຈະສືບຕໍ່ຮັກສາ ແລະ ຂະຫຍາຍຈຸດບໍລິການຂອງຊັບສິນໄປຂອບເຂດທົ່ວປະເທດຂ້າພະເຈົ້າມີຂໍ້ສະເໜີດັ່ງນີ້ :
-ຄວນໃຊ້ເຄື່ອງມື ແລະ ລະບົບອັນທັນສະໄໝ ເຂົ້າມາຊ່ວຍ ເພາະປະຈຸບັນແມ່ນຊ້າຫລາຍເພາະທຸກຢ່າງແມ່ນຂຽນດ້ວຍມື ມັນສວນທາງກັບແນວທາງຂັ້ນເທິງທີ່ວ່າບໍລິການວ່ອງໄວ
- ຄວນໃຫ້ມີການຊໍາລະເງິນຜ່ານທະນາຄານ ຫລື ຄັງເງິນ ເພື່ອຄວາມໂປ່ງໃສ ຄວນຍຸຕິການເກັບເງິນຫລາຍຂອດ(ເກັບ20,000ກີບຕໍ່ຊຸດ ແມ່ນອີງໃສ່ມາດຕາໃດບອກແດ່ ເພາະເສຍ 3ເທື່ອ ເຊັ່ນ: ລົດກະບະວີໂກຄັນນຶ່ງຈະເສຍ
20,000+1,000,000+5,000=1,025,000ກີບ ແທນທີ່ຈະເປັນ 1,000,000ກີບ)ແລະ ເພື່ອໃຫ້ສອດຄ່ອງກັບແຈ້ງການແນະນຳຂອງລັດຖະມົນຕີວ່າການກະຊວງການເງິນເລກທີ 3013/ກງ ລົງວັນທີ 24/11/2010 ຊັບສິນບໍ່ຄວນເກັບເງິນເອງ.
- ຄວນກໍານົດໃຫ້ຈະແຈ້ງວ່າຈະຈົດທະບຽນຫຍັງແທ້ : ໃບແຈ້ງພາສີ, ໃບອິນວອຍ ຫລື ວ່າສັນຍາຊື້-ຂາຍລະຫວ່າງປະເທດ ເພາະໄລຍະຜ່ານມາ ຂ້າພະເຈົ້າໄດ້ອ່ານ ທຸກໆເອກະສານແລ້ວ ຍັງບໍ່ມີເອກະສານ ຫລື ບົດແນະນຳສະບັບໃດລະບຸກ່ຽວກັບໃບແຈ້ງພາສີ ,ຄວນມີບົດແນະນຳລະອຽດຊັດເຈນກວ່ານີ້ໃນການ ຈັດຕັ້ງປະຕິບັດ ລັດຖະບັນຍັດປະທານປະເທດເລກທີ 03 ໂດຍສະເພາະມາດຕາ 6
- ກໍານົດລະອຽດຈະເອົາມູນຄ່າໃດເປັນຕົວຕັ້ງ ມູນຄ່າໃນອິນວອຍ, ມູນຄ່າໃນສັນຍາຊື້ຂາຍ ຫລື ມູນຄ່າ ອິນວອຍ+ຄ່າພາສີອາກອນ ເນື່ອງຈາກໄລຍະຜ່ານມາພະນັກງານ ຊັບສິນເອງກໍຍັງບໍ່ຮູ້ຊິກຳນົດເອົາໂຕໃດແທ້. ຕາມຄຳຄິດເຫັນສ່ວນຕົວຖ້າໃຫ້ສອດຄ່ອງຄິດວ່າເອົາມູນຄ່າໃນສັນຍາຊື້ຂາຍ ແລະ ຈົດທະບຽນສັນຍາຊື້ຂາຍ ແຕ່ບໍ່ແມ່ນໃບແຈ້ງພາສີ ເພາະໃບແຈ້ງພາສີບໍ່ແມ່ນສັນຍາ.