ການຂັດແຍ່ງ ທີ່ດິນ ໃນລາວ ມີສາເຫດ ເກີດມາຈາກ ການສໍ້ໂກງ ຂອງ ເຈົ້າໜ້າທີ່ ພະນັກງານ ຂັ້ນສູງ ທີ່ ຫາຜົນປະໂຫຍດ ໃສ່ຕົນເອງ.ພະນັກງານຣັດ.
ເຈົ້າຫນ້າທີ່ ຂັ້ນສູງ ຈາກອົງການ ສືບສວນ ແຫ່ງຣັຖ ຜູ້ບໍ່ປະສົງ ອອກຊື່ ທ່ານນື່ງ ເປີດເຜີຍຕໍ່ ເອເຊັຽເສຣີ ວ່າບັນຫາ ຄວາມຂັດແຍ່ງ ກ່ຽວກັບທີ່ດິນ ຣະຫວ່່າງ ບໍຣິສັດ ທີ່ໄດ້ຮັບ ສຳປະທານ ກັບ ປະຊາຊົນ ຜູ້ເປັນເຈົ້າຂອງດິນ ໃນທຸກມື້ນີ້ ເກີດຈາກ 4 ສາເຫດໃຫ່ຍໆ ຄື້:
1-ການອະນຸມັດ ສຳປະທານ ທີ່ດິນ ໂດຍທີ່ບໍ່ມີ ການກວດກາ ແລະ ວັດແທກ ພື້ນທີ່ດິນ ຕາມຄວາມເປັນຈີງ,
2-ການຫັນ ເອົາທີ່ດິນ ເປັນທຶນ ດ້ວຍການດຳເນີນ ໂຄງການພັທນາ ຕ່່າງໆ.
3-ການໂຍກຍ້າຍ ປະຊາຊົນ ຜູ້ທີ່ໄດ້ຮັບ ຜົລກະທົບ ຈາກໂຄງການ ພັທນາຕ່າງໆ ໄປຢູ່ພື້ນທີ່ ຈັດສັນໃຫມ່ ທີ່ມີການ ຊົດເຊີຍ ບໍ່ເຫມາະສົມ.
4-ການໃຊ້ອຳນາດ ແບບບໍ່ຖືກຕ້ອງ ຕາມກົດຫມາຍ ຂອງພັກຣັຖ ເພື່ອບີບບັງຄັບ ເອົາທີ່ດິນ ຂອງ ປະຊາຊົນ ແລ້ວກໍເອົາໄປໃຫ້ ນາຍທຶນ ສຳປະທານ ໂດຍພັກຣັຖ ໄດ້ຮັບຜົລ ຕອບແທນ ເປັນການສ່ວນຕົວ.
ການໃຊ້ອຳນາດ ທີ່ບໍ່ຖືກຕ້ອງ ຕາມກົດຫມາຍ ຂອງພັກຣັຖ ນັ້ນເປັນບັນຫາ ທີ່ເກີດຂຶ້ນ ຢ່າງກວ້າງຂວາງ ໃນລາວ ຈາກຜົລຂອງການ ກວດສອບ ໃນຣະຍະ 3 ປີ ທີ່ຜ່ານມາ ພົບວ່າ ການໃຊ້ອຳນາດ ບໍ່ຖືກຕ້ອງ ຂອງ ເຈົ້າຫນ້າທີ່ຣັຖ ກໍມີທັງການ ຂົ່ມຂູ່ ແລະ ບັງຄັບ ອາສັຍກົດຫມາຍ ເປັນເຄື່ອງມື ໃນການ ບີບບັງຄັບ ປະຊາຊົນ ໃຫ້ໂຍກຍ້າຍ ອອກຈາກພື້ນທີ່ ຂອງຂະເຈົ້າ. ເຫດການເຫຼົ່ານີ້ ຖືກຟ້ອງຮ້ອງ ຈາກ ປະຊາຊົນ ກວ່າ 4 ພັນ ກໍຣະນີ ໃນ ທົ່ວປະເທດ. ຮ້າຍໄປກວ່ານັ້ນ ຍັງມີການໃຫ້ ສຳປະທານ ທີ່ດິນ ໄປກວມເອົາ ດິນຊາວບ້ານ ຫຼື ປ່າສງວນ ແຫ່ງຊາດ ໃນຫລາຍ ພື້ນທີ່ນຳອີກ ຊື່ງຈາກການ ກວດກາພົບວ່າ ບັນດາ ບໍຣິສັດ ທີ່ໄດ້ຮັບ ສຳປະທານ ທີ່ດິນ ຍັງໄດ້ຣຸກລ້ຳ ເຂົ້າໄປ ລັກຕັດໄມ້ ແລ້ວ ສົ່ງອອກໄປ ປະເທດ ເພື່ອນບ້ານ ຫລາຍຂື້ນ ຢ່າງຕໍ່ເນື່ອງ.
ອົງການຟື້ນຟູ ສີ່ງແວດລ້ອມ ຕາມລຳ ແມ່ນ້ຳຂອງ ເຊື່ອວ່າ ມີການລັກ ຂົນໄມ້ເຖື່ອນ ອອກຈາກລາວໄປ ວຽດນາມຈີນແລະໄທ ຫລາຍກວ່າ 4 ແສນແມັດກ້ອນ ໃນແຕ່ລະປີ.
