ເຈົ້າໜ້າທີ່ ຣະດັບສູງ ໃນຄນະ ກັມມາທິການ ຄວບຄຸມແລະກວດກາ ຢາເສພຕິດ ແຫ່ງຊາດລາວ ຜູ້ບໍ່ປະສົງອອກຊື່ ທ່ານນື່ງ ເປິດເຜີຍຕໍ່ ເອເຊັຍເສຣີ ວ່າ: ເຂດຊາຍແດນ ລາວ-ວຽດນາມ ຖຶກແກ້ງຄ້າ ຢາເສພຕິດ ຂ້າມຊາດ ໃຊ້ເປັນທາງຜ່ານ ໃນການຂົນສົ່ງ ຢາເສພຕິດ ຈາກ “3 ຫລ່ຽມຄໍາ” ພາກເໜືອຂອງລາວ ໄປຕ່າງປະເທດ ນັບມື້ ຫລາຍຂື້ນ.
ເສັ້ນທາງ ລັກລອບ ຂົນສົ່ງ ຢາເສພຕິດ ທີ່ ພວກແກ້ງຄ້າຢາ ນິຍົມໃຊ້ ຫລາຍທີ່ສຸດ ໃນປັຈຈຸບັນ ກໍຄື ຖນົນເສັ້ນທາງ ເລກທີ່ 13 ຈາກ ພາກເໜືອຂອງລາວ ຕໍ່ໃສ່ຖນົນ ເລກ 9 ໃນແຂວງ ສວັນນະເຂດ. ຈາກນັ້ນ ກຸ່ມແກ້ງ ດັ່ງກ່າວ ທີ່ມີການ ຮ່ວມມືກັບຄົນລາວແລະວຽດນາມ ກໍຈະແຍກການ ຂົນສົ່ງ ຢາເສພຕິດ ອອກເປັນສອງທາງ ຄືສ່ວນນື່ງ ຈະສົ່ງໄປ ປະເທດວຽດນາມ ແລະ ອີກສ່ວນນື່ງ ຈະສົ່ງຂ້າມນໍ້າຂອງ ໄປເຂດ ພາກອິສານ ຂອງໄທ.
ທີ່ຜ່ານມາ ທາງການໄທ ໄດ້ໃຊ້ ມາຕການ ປາບປາມ ການລັກລອບ ຄ້າຢາເສພຕິດ ຢ່າງເຂັ້ມງວດ ເຮັດໃຫ້ ພວກແກ້ງຄ້າຢາ ໃນລາວ ປ່ຽນທິດທາງ ຫັນໄປໃຊ້ຖນົນ ເລກ 9 ເປັນເສັ້ນທາງ ຂົນສົ່ງ ຢາເສພຕິດ ໄປວຽດນາມ ເພື່ອສົ່ງຕໍ່ໄປຍັງ ປະເທດ ທີ່ 3 ຫລາຍຂື້ນ.
ອິງຕາມຣາຍງານ ການ ປະຕິບັດໜ້າທີ່ ຮ່ວມກັນ ຣະຫວ່າງ ເຈົ້າໜ້າທີ່ ລາວ ແລະວຽດນາມ ໃນຣະຫວ່າງ ຊາຍແດນ ລາວບາວ ແຈ້ງວ່າ ໃນຊ່ວງ 6 ເດືອນ ຕົ້ນປີ 2013 ນີ້ ທາງການ ສາມາດຈັບ ພວກຄ້າ ຢາເສພຕິດ ລາວແລະວຽດນາມ ໄດ້ 900 ຮ້ອຍ ກວ່າຄົນ ໃນນັ້ນ ເປັນນັກຄ້າຢາ ຣາຍໃຫຍ່ 76 ຄົນ ຣາຍກາງ 600 ຄົນ ແລະ ຣາຍນ້ອຍ 200 ກວ່າຄົນ ເປັນຜູ້ຍິງ 63 ຄົນ.
