ໂຄງການສ້າງທໍ່ນໍ້າມັນວຽດນາມ

ເຈົ້າໜ້າທີ່ ແຂວງຊຽງຂວາງ ທີ່ບໍ່ປະສົງ ອອກຊື່ ບອກກັບ ເອເຊັຽເສຣີ ເມື່ອມໍ່ໆ ມານີ້ວ່າ ເມື່ອບໍ່ດົນມານີ້ ຄນະຜູ້ແທນ ຈາກ ແຂວງແທງຮົ່ວ ຂອງ ວຽດນາມ ທີ່ເດີນທາງມາ ຢ້ຽມຢາມ ແຂວງຊຽງຂວາງ ແລະ ຫົວພັນ ໄດ້ລົງນາມສັນຍາຂໍ້ຕົກລົງ ການຮ່ວມມືກັບສອງແຂວງນີ້ 10 ຂໍ້. ໃນນັ້ນໂຄງການ ທີ່ໃຫຍ່ກວ່າໝູ່ ແມ່ນການສ້າງ ທໍ່ນໍ້າມັນ ຈາກທ່າເຮືອງີເຊີນ ແຂວງແທງຮົ່ວ ເຂົ້າສູ່ ແຂວງຫົວພັນ ແລະຊຽງຂວາງ.

ການລົງທຶນ ທັງໝົດ ຈະເປັນຂອງ ວຽດນາມ 100 ສ່ວນຮ້ອຍ ໂດຍມີຈຸດປະສົງ ຕອບສນອງນໍ້າມັນ ໃຫ້ແຂວງພາກເໜືອ ຂອງລາວ ແລະ ເພື່ອການຄອບຄອງ ຕລາດນໍ້າມັນ ໃນພາກເໜືອ ທີ່ມີຄວາມຕ້ອງການ ສູງຂື້ນເລື້ອຍໆ.

ທ່ານບອກວ່າບໍ່ພຽງແຕ່ເທົ່ານັ້ນ ວຽດນາມ ໄດ້ຄາດການລ່ວງໜ້າໄວ້ວ່າຈະຈັດແຂວງ ພາກເໜືອງຂອງລາວ ເຂົ້າເປັນສ່ວນນຶ່ງຂອງແຜນການ ພັທນາ ທ່າເຮືອ ງີເຊີນ ໃຫ້ເປັນເຂດ ການຄ້າປອດພາສີ ຂອງ ວຽດນາມ ອີກດ້ວຍ. ເພື່ອສ້າງ ເງື່ອນໄຂ ຮັບປະກັນ ໃຫ້ແຜນການ ຂອງ ວຽດນາມ ເກີດເປັນຈິງນັ້ນ ທ່ານວ່າ ແຂວງແທງຮົ່ວ ກັບ ແຂວງຊຽງຂວາງ ໄດ້ຕົກລົງ ໃຫ້ວຽດນາມ ສ້າງຖນົນຈາກເມືອງໜອງແຮດໄປຍັງ ດ່ານເຫລົ່າແຄວ ແຂວງຫົວພັນ ເພື່ອເຊື່ອມຕໍ່ ໄປຍັງທ່າເຮືອ ງີເຊີນ ໃຫ້ແລ້ວໄວ ເທົ່າທີ່ຈະໄວໄດ້.