ການອອກ ໃບຕາດິນ ໃຫ້ ປະຊາຊົນ ທີ່ຍືດເຍື້ອ ຊັກຊ້າ ຂອງ ທາງການລາວ ເປັນຊ່ອງທາງ ໃຫ້ພະນັກງານ ຂອງຣັຖ ໃຊ້ສິດອໍານາດ ໂກງ ເອົາທີ່ດິນ ປະຊາຊົນ ໄປໃຫ້ ນັກລົງທືນ.
ເຈົ້າຫນ້າທີ່ ກະຊວງ ກະສິກັມ ປ່າໄມ້ລາວ ຜູ້ທີ່ຂໍສງວນຊື່ ທ່ານນື່ງ ກ່າວຕໍ່ນັກຂ່າວ ເອເຊັຽເສຣີ ວ່າ ການອອກ ໃບຕາດີນ ໃຫ້ປະຊາຊົນ ລາວ ທີ່ໄດ້ເລີ້ມ ມາແຕ່ປີ 1997 ມາຮອດປັຈຈຸບັນ ກໍເຖິງ 16 ປີແລ້ວ ຄະນະກັມມະການ ຮັບຜິດຊອບ ອອກໃບຕາດິນ ໄດ້ແຕ່ 7 ແສນ 5 ພັນແປງ ຫລື ຄິດເປັນສັດສ່ວນ ຂອງພື້ນທີ່ ທັງຫມົດ ໃນທົ່ວປະເທດ ກໍມີພຽງແຕ່ 30 ສ່ວນຮ້ອຍ ເທົ່ານັ້ນ. ຖືວ່າ ເປັນການຊັກຊ້າ ທີ່ສຸດ ເນື່ອງຈາກວ່າ ທາງການລາວ ໄດ້ຕັ້ງ ເປົ້າຫມາຍໄວ້ວ່າ ຣະຫວ່າງປີ 2011-2015 ຈະອອກ ໃບຕາດິນ ໃຫ້ໄດ້ຢ່າງນ້ອຍ 1 ລ້ານແປງ ໃນທົ່ວປະເທດ.
ການຊັກຊ້າ ໃນການອອກ ໃບຕາດີນ ເຮັດໃຫ້ເກີດ ບັນຫາ ການຍາດແຍ່ງ ເອົາທີ່ດີນ ຂອງປະຊາຊົນ ຢ່າງກວ້າງຂວາງ ເຖິງແມ່ນວ່າ ປະຊາຊົນ ຈະເປັນເຈົ້າຂອງ ກໍຕາມ ແຕ່ຫາກບໍ່ມີ ໃບຕາດິນ ທີ່ສະແດງເຂດທີ່ດິນ ຂອງຕົນ ຢ່າງຄັກແນ່ ກໍຈະເປັນ ຊ່ອງວ່າງໃນການ ສວຍໂອກາດ ຂອງ ພະນັກງານຣັຖ ຜູ້ທີ່ສແວງຫາ ຜົລປະໂຫຍດ ຈາກການຍຶດທີ່ດິນ ຂອງ ປະຊາຊົນ ໄປຂາຍໃຫ້ ນັກລົງທືນລາວ ແລະຕ່າງປະເທດ ໄດ້ຢ່າງງ່າຍດາຍ.
ກຸ່ມພະນັກງານຣັຖ ກຸ່ມນີ້ຈະໃຊ້ ກົດຫມາຍຂົ່ມຂູ່ ໃຫ້ ປະຊາຊົນ ຢ້ານກົວວ່າຈະມີ ຄວາມຜິດ ໃນຂໍ້ກ່າວຫາ ບຸກຣຸກທີ່ດິນ ຂອງສ່ວນຮວມ ແຕ່ເມື່ອເວລາ ປະຊາຊົນ ພາກັນຍ້າຍອອກ ພື້ນທີ່ໄປແລ້ວ ພວກຂະເຈົ້າ ກໍຈະຍຶດທີ່ດິນ ນັ້ນໄປຂາຍ ໃຫ້ນັກລົງທຶນ ໃນທັນທີ. ພຶດຕິກັມ ດັ່ງກ່າວ ກໍມີການ ຟ້ອງຮ້ອງກັນ ໃນສານ ປະຊາຊົນ ໃນທົ່ວປະເທດ ກວ່າໝື່ນ ກໍຣະນີແລ່້ວ ໃນເວລານີ້.
ສິເວົ້າຫລາຍກະເວົ້າບໍ່ໄດ້ ແຕ່ຄັນບໍ່ເວົ້າມັນກະໂພດອີຫລີ. ຢາກໃຫ້ບັນດາທ່ານບັນດາສະຫາຍເບິ່ງຄືນເນີ. ເອົາດິນປະຊາຊົນໄປຍົກໃຫ້ຕ່າງຊາດຈັງຊີ ມັນບໍ່ຖືກຕິລະ
