ຊາວວຽດນາມ ແລະຊາວຈີນ ພາກັນ ເປີດ ທຸຣະກິດ ໃນທົ່ວ ປະເທດລາວ ສ່ວນຫລາຍ ບໍ່ມີໃບ ອະນຸຍາດ. ປັດຈຸບັນ ຕາມຫົວເມືອງ ໃຫຍ່ ຢູ່ລາວ ມີຮ້ານຂາຍເຄື່ອງ ຂອງ ຊາວວຽດນາມ ແລະຈີນ ເຕັມທຸກບ່ອນ ຕົວຢ່າງຢູ່ ເມືອງພົນສວັນ ແຂວງຊຽງຂວາງ ມີຮ້ານຕັດຜົມ ຮ້ານ ເສີມສວຍ ຮ້ານ ຄາຣາໂອເຄະ ຮ້ານອາຫານ ວຽດນາມແລະຊາວຈີນ ກໍມີຮ້ານອາຫານ ຮ້ານຂາຍເຄື່ອງໄຟຟ້າ ແລະເຄື່ອງ ເອເລັກໂຕຣນິກ ຕ່າງໆຫລາຍໆ ຮ້ານ.
ເຈົ້າໜ້າທີ່ ຂັ້ນສູງ ຂອງ ກະຊວງ ອຸດສາຫະກັມ ແລະ ການຄ້າ ຂອງລາວ ທ່ານນຶ່ງ ທີ່ບໍ່ປະສົງ ບອກຊື່ ເປີດເຜີຍວ່າ ຊາວວຽດນາມ ແລະ ຊາວຈີນສາມາດຂຍາຍທຸຣະກິດ ຂອງພວກເຂົາ ອອກໄປ ທົ່ວປະເທດລາວ ໄດ້ຢ່າງງ່າຍດາຍວ່ອງໄວ ແລະສ່ວນຫລາຍ ບໍ່ມີໃບ ອະນຸຍາດ ຢ່າງຖືກຕ້ອງ ຕາມກົດໝາຍ ກໍເພາະວ່າ ພວກເຂົາອາສັຍ ຣັຖບານ ຂອງປະເທດເຂົາ ທີ່ມີຄວາມ ສຳພັນອັນດີ ພິເສດ ກັບ ຣັຖບານລາວ ແຕ່ບັນຫາ ກໍຄື ຣັຖບານລາວ ຂາດຣາຍໄດ້ ຣາຍຮັບ ເພາະບໍ່ສາມາດ ເກັບພາສີ ອາກອນຈາກ ທຸຣະກິດ ເຫລົ່ານີ້ໄດ້.
ເຈົ້າໜ້າທີ່ ກະຊວງ ອຸດສາຫະກັມ ແລະການຄ້າ ທ່ານນີ້ ເວົ້າອີກວ່າ ໃນທົ່ວປະເທດລາວປັດຈຸບັນມີໜ່ວຍ ທຸຣະກິດ ເຊັ່ນຮ້ານຄ້າຮ້ານຂາຍ ຂອງຊາວວຽດນາມ ແລະຊາວຈີນ ຫລາຍເຖິງ 5,000 ຫົວໜ່ວຍ ແລະ ມີແນວໂນ້ມວ່າ ຈະເພິ້ມຂື້ນ ເລື້ອຍໆ. ອີກບັນຫານຶ່ງ ທີ່ສຳຄັນ ພວກພໍ່ຄ້າ ແມ່ຄ້າ ຊາວວຽດນາມ ແລະຈີນ ເຫລົ່ານີ້ ສ່ວນຫລາຍ ກໍເປັນຄົນ ເຂົ້າເມືອງ ຜິດກົດໝາຍ ຢູ່ແລ້ວ ແຖມຍັງນຳເອົາ ຄົນງານ ຈາກປະເທດ ຂອງພວກເຂົາ ເຂົ້າມາເຮັດວຽກ ຢູ່ລາວ ແບບບໍ່ຖືກ ຕາມກົດໝາຍ ນຳອີກ ລວມແລ້ວ ຄົນງານ ປະເພດນີ້ ອາຈມີເຖິງ 1 ແສນຄົນ ໃນລາວ.
